1 कुरींथी 4

मसीन नेवताळु सेवान काम

1 माणसे हामुक कम सी कम मसीन पावर्‌या ने भगवानेन सातायली वातेन हीसाब-किताप करन्‌यु समजे। 2 पछेन जां हीसाब-किताप करन्‌या मां ज्‌य वात देखी जाय की चु भुरसा वाळु हवे। 3 बाकुन मारे देखणे मां जी बेसकी नानली वात छे की तुहुंं नीते माणसेन कुय नीयाव करन्‌यु मेसे पारखे, बाकुन मे खुद आपणे आप काजे नी पारखतु। 4 काहाकी मारो मन मेसे काजे काहाली बी वात मां गुनाळु नी ठेरावे, बाकुन हेरेसी मे नी-गुनाळु*4:4 नी-गुनाळु निर्दोष नी ठेरावतु, काहाकी मेसे पारखणे वाळु मालीक छे।✝4:4 भजन सहीता 19:12 5 हेरेसी जत्‌यार लग मालीक नी आवे, टेम सी पेहल काहाली बी वातेन नीयाव मां करु; हयुत आंदारला मां डुकायली वात*4:5 डुकायली वात छिपी बातें उजाळा मां देखाड़से, ने मनेन इरादा*4:5 इरादा उद्देश्यों काजे उजेंतु करे तत्‌यार भगवान एक-एक काजे तु बेसकु वारु छे करीन कह्‌वे।

6 ए भायसे, मे हीनु वाते मां तुंद्‌रे वाटे आपणी ने अपुल्‌लोस खबर दाखलान रीत पर कर्‌यु, हेरेसी की तुहुंं हामरे साहरे गुयो सीकु की लिखला सी अगा घुण हवु, ने एकुन एळु ने दीसरान वीरुद मां खुस घुण हवे। 7 काहाकी तारे मां ने दीसरा मां कुण संका कर सके? ने तारे धड़े काय छे जु तुसे दीसरा सी नी जड़्‌यो? ने जत्‌यार की तुसे दीसरा सी जड़्‌यो, ती असु मटाय काहा करे की मानु की नी जड़्‌यु? 8 तुहुंं ते आफरी गुया, तुहुंं पयस्‌या वाळा हय गुया, तुहुंं हामरे पाखुर राज कर्‌या, बाकुन वारु हवतो की तुहुंं राज करता की हामु बी तुंद्‌रे साते राज करता। 9 मारी समज मां भगवान हामु नेवताळान काम काजे आखान पछे हीनु माणसेन तसा ठेरायु, की तींद्‌री मरनेन हुकुम हय गुयो; हव काहाकी हामु कळीन ने सरग वाळा काहवाळ्‌यान ने माणसे वाटे एक तमासु बण गुया। 10 हामु मसी वाटे डेड़-अकल्‌या छे, बाकुन तुहुंं ईसु मसी मां अकलवाळा छे; हामु लुल्‌ला छे, बाकुन तुहुंं ताकत वाळा छे। तुहुंं काजे माणसे आव-भाव करे, बाकुन हामु काजे कुय नी आव-भाव करे। 11 हामु हीनी टेम लग भुकला पीसला ने नांगरला छे, ने मार खाजे ने मार्‌या-मार्‌या फीरजे; 12 ने आपणात हात सी काम करीन मेहनत करजे। माणसे हामु काजे भुंडात कह्‌वे, हामु बरकत आपजे; ने चे एला-पाड़े, हामु सेण करजे। 13 चे नाव-बद्‌दी करे, हामु लीलघायजे हामु आज लग कळीन कुहड़ु ने आखी चीजेन खुरचणेन तसा ठेहर्‌या।

चेतीन रहु करीन कह्‌वे

14 मे तुहुंं काजे सरमाणने वाटे जी वात नी लिखतु, बाकुन आपणु लाटेक्‌लु पुर्‌यु जाणीन तुहुंंक चेतीन रहु करीन लिख रयु। 15 काहाकी कदी मसी मां तुंद्‌रा सीकाड़ने वाळा दस हजार बी हवता, ती बी तुंद्‌रा बास बेसका नी हय; हेरेसी की ईसु मसी मां खुस-खबरेन साहरे मे तुंद्‌रु बास छे। 16 हेरेसी मे तुंद्‌रे सी लीलघाय्‌न कह्‌वो की तुहुंं मारेन तसा चाल चालु। 17 हेरेसी मे तीमुथीयुस काजे जु मालीक मां मारु लाटेक्‌लु ने भुरसा मां काठु पुर्‌यु छे, तुंद्‌रे धड़े मकल्‌यु। चु तुहुंं काजे ईसु मसी मां मारा वेहवारेन बारामां हेर कराड़से, जसों की मे आखी जागा आखी एक मंडळी मां परचार करो।

18 काहानाक ते असा फुगी गुया, की जाणु की मे तुंद्‌रे धड़े आवतु नी। 19 बाकुन मालीक चाह्‌यु ती मे तुंद्‌रे धड़े छाटु आवीस, ने हीनु फुगलान वात काजे नी, बाकुन हींद्‌री ताकत काजे जाणी लीस। 20 काहाकी भगवानेन राज वात मां नी बाकुन ताकत मां छे। 21 तुहुंं काय चाहवु? काय मे लाकड़ी लीन तुंद्‌रे धड़े आवो, नीते परम ने नमरेन आत्‌मा साते आवो?