1 देखु, बास हामरे सी कसु परम कर्‌यु, की हामु भगवानेन अवल्‌यात कवाया, ने हामु छे बी; हेरे वजे सी कळीन माणसे हामुक नी जाणता, काहाकी कळीन माणसे भगवान काजे बी नी जाणे। 2 ए लाटेक्‌ला साथी, हय हामु भगवानेन अवल्‌यात छे, ने हय लग उजेंतो नी हयो, की हामु काय नी हवसुन! अतरो जाणजे, की जत्‌यार ईसु मसी उजेंतु हवसे ती हामु बी हेरेन तसा रवसुन, काहाकी हामु हेरेन असुत देखसुन जसु चु छे। 3 ने जे कुय हेरे पर जी आस राखे, चु आपणे आप काजे बी असुत चुखु करे, जसु मसी चुखलु छे।

4 जु कुय पाप करे, चु मुसान साहरे लिखला कायदान वीरुद करे; ने पाप ते कायदान वीरुद मां छे। 5 ने तुहुंं जाणु, की ईसु मसी हेरसी उजेंतु हयु, की पाप काजे सार देय; ने हेरेमां काय पाप नी हय। 6 जु कुय मसी मां बणीन रवसे, चु पाप नी करे; जु कुय पाप करे, चु नी ते हीनाक देख्‌यु, ने नी हीनाक जाण्‌यु।

7 लाटेक्‌ला पुर्‌या, काहालाकेन भुलवाड़ मां घुण आवु; जु धरमीन काम करे, हयुत हेरेन तसु धरमी छे। 8 जु कुय पाप करे, चु भुतड़ा भीणी सी छे, काहाकी भुतड़ु सुरु सी पाप करतु आवलु छे। भगवानेन पुर्‌यु हेरसी उजेंतु हयु की भुतड़ान काम काजे खत्‌तम कर देय।

9 जु कुय भगवान सी पयदा हयु चु पाप नी करे; काहाकी भगवानेन बीज हेरेमां बणीन रवे; ने चु पाप करी नी सके, काहाकी चु भगवान सी पयदा हयु। 10 हेरसी भगवानेन अवल्‌यात, ने भुतड़ान अवल्‌यात जाणी जाय; जे कुय धरमीन काम नी करे, चु भगवान सी नी, ने नी चु जु आपणा भायस सी परम नी राखे।

11 काहाकी जु खबर तुहुंं सुरु सी सामळ्‌या, चो ज्‌य छे, की हामु एक दीसरा सी परम राखजे। 12 ने केनेन तसा मां बणु, जु हीना भुतड़ा सी हतलु, ने चु आपणा भायसेक मार नाखलु। ने हीनाक कसु मारलु? हेरसी की हेरा काम भुंडा हतला, ने हेरु भायसेन काम धरमी हतलो।✝

13 ए भायस्‌यो, कदी कळीन माणसे तुंद्‌रे सी कुहराय करे ती चकरायु घुण। 14 हामु जाणजे, की हामु मरलाम सी जीवता हयन जीवन मां पुग्‌या; काहाकी हामु भायसे सी परम राखजे जु परम नी राखे, चु मरलान तसु रवे। 15 जु कुय आपणा भायस सी कुहराय राखे, चु हत्‌यारु छे; ने तुहुंं जाणु, की काहालाक हत्‌यारा मां जलमेन जीवन नी रवे। 16 हामु परम हेरेसी जाण्‌या, की मसी आपणे वाटे आपसान जीव आप देदु; ने हामुक बी भायस्‌यो वाटे जीव आपणु चाहजे। 17 बाकुन तीना काहानाक धड़े कळीन धन रवे ने चु आपणा भायस काजे जरुवत मां देखीन हेरे पर तरस नी खाणे चाहे, ती हेरेमां भगवानेन परम कसु बणीन रय सके?✝ 18 ए मारा लाटेक्‌ला पुर्‌या, हामु बुल ने जीप सी नी, बाकुन काम ने छाचाय्‌न साहरे बी परम करनु चाहजे।

19 हेरसी हामु जाणसुन, की हामु छाचला छे; ने जीनी बात मां हामरो मन हामुक गुनु आपसे, हेरे बारामां हामु हेरे अगळ आपणा मन मां हिम्‌मत दी सकजे। 20 ने कदी गलत करजे ती हामुक रुके, काहाकी भगवान हामरे मन सी मटु छे; ने आखो काय जाणे। 21 ए लाटेक्‌ला, कदी हामरो मन हामुक गुनु नी लागाड़े ती हामु भगवान अगळ हामुक हिम्‌मत बणीन रवे। 22 ने ज्‌य काय हामु मांगजे, चो हामुक हेरसी जड़्‌यो; काहाकी हामु हेरा हुकुम काजे माने; ने ज्‌य हीनाक भावे चत करजे। 23 ने हेरु हुकुम ज्‌य छे की हामु हेरा पुर्‌या ईसु मसीन नाव पर भुरसु करजे ने जसु हयु हामुक हुकुम आप्‌यु हेरे अनसारे एक दीसरा सी परम राखे। 24 ने जु भगवानेन हुकुम काजे माने, चु हेरेमां, ने भगवान हींद्‌रे मां बणीन रवे। ने हेरसी, मतलब हयु चुखली-आत्‌मा सी जु हयु हामुक आपलु छे, हामु जाणजे, की चु हामरे मां बणीन रवसे।