1 मे दारा नावेन मादी राजान राज सी पेहले साल, मां तीनाक हिम्‌मत आपणे ने ताकत देणे वाटे मे उबु हय गुयु।

2 हय मे तुहुंक खरली वात देखाड़ो, देखु फारस्‌यान राज मां हय तीन अळी राजा बणसे, ने चोवथु राजु तीनु आखा सी अदुस मालदार रवसे। ने तत्‌यार चु राजु मे मालदार छे, करीन बेसकु ताकतवाळु रवसे, तत्‌यार आखा माणसे काजे युनान राज्‌येन वीरुद मां लड़ाय कराड़से।

3 तेरे पछेन एक सक्‌तीवाळु राजु आवसे चु आप्‌सो बेसको राज वदाड़से, ने आपसी मरजीन अनसारेत चु काम करसे। 4 जत्‌यार चु मटु हवसे, तत्‌यार तेरु राज्‌य टुटीन च्‌यारे-मेर वाटाय जासे, ने चारु खुणा मां वाटायन अलग-अलग हय जासे, ने नी आपसा राजेन ताकतेन असर तीना देस पर पड़से, ने नी आपसी अवल्‌यात काजे काय जड़से; काहाकी आपसा राजेन हक आपसे धड़े सी हापकीन दीसराक आप देसे।

5 तत्‌यार मीसरे देसेन राजु ताकत वाळु बणसे, बाकुन तेरु एक मुख्‌यु तेरेसी अदुस ताकतवाळु हवसे, ने चु एक नवलु देस बणावसे, जां लग की चु बेसकु ताकत वाळु हवसे। 6 काहीं साल वीतणे पर, जे दुयु एक दीसरा साते भेळा हवसे ने मीसरे देसेन राजान पुरे धुराव देसेन राजा धड़े सांतीन वायदु करने आवसे बाकुन चां राजान पुरेन ताकत जलम वाटे नी चाले, ने चु राजा ने तेरो नाव रवे, बाकुन ची बायरी आपसा मकलने वाळा ने आपसा बास ने आपसा समाळने वाळा समेत छेटे कर देसे। 7 अळतेन तत्‌यारुत पछेन हेरु एक रीस्‌तेदार राजु बण जासे चु सीरीया देसेन राजान सीपायड़ा पर हमलु कर देसे हींद्‌रा कीला मां बी भराय जासे ने हीनुक हाराड़ देसे। 8 तत्‌यार चु तीनु देवतान उदरली मुरती, ने सना चांदीन बणावली मंहगली मुरतीन चीज काजे हापकीन मीसरे देस मां ली जासे। तेर पछेन चु थुड़ाक साल तक सीरीया देसेन राजान वीरुद मां हमलु नी करे। 9 तत्‌यार चु राजु सीरीया देसेन राजान देस भीणी आवसे, बाकुन अळी चु राजु आपसा देस मां पछु जाती रवसे।

10 आपसा पुर्‌या लड़ाय करने करीन तीयारी करसे ने बेसका मटला टुळा काजे भेळा करसे, जु नी रुके असला जळडुबेन तसा दवड़ीन अगा बड़से, ने वेरीन कीला तक लड़ाय करता जासे। 11 तत्‌यार सीरीया देसेन राजाक रीस लागसे, ने जाय्‌न मीसरे देसेन राजा सी लड़ाय करसे, ने चु राजु लड़ाय करने करीन मटलु टुळु भेळु करसे, बाकुन तीना टुळाक दखवाण देसेम सी आवला राजान हात मां आप देसे। 12 रीस मां आवीन मीस्‌रे देसेन राजु सीरीया देसेन राजान वीरुद मां लड़ाय करसे ने हेरा बेसका सीपायड़ा सी जीत नी सके।

13 काहाकी सीरीया देसेन राजा आयन पेहेल सी बी मटलु टुळु भेळु करसे, ने काही दाहड़ा ने साल वीतणेन पर चु छाचलीन बेसका सीपायड़ा ने धन लीन आवसे। 14 तीनु दाहड़ाम बेसका माणसे मीसरे देसेन राजान वीरुद मां बुलसे, बाकुन तारा माणसे मां सी बी लड़ाय करन्‌या माणसे नीकळसे, तेरेसी ईना सपनान वात पुरी हय जासे, ने चे ठुकर खाय्‌न हीट पड़से। 15 तत्‌यार सीरीया देसेन राजु आयन कीला काजे घेरवी लेसे ने तेरे उपर हक कर लेसे। ने मीसरे देसेन नी ते मुखी उबा रवसे, ने नी काहनाक मटला ताकतवाळान उबा रवणेन ताकुत नी रवे। 16 तत्‌यार जे बी तींद्‌रे वीरुद मां आवसे, चु आपसी मरजी पुरी करसे, ने चु आपसा हातेम नास करने वाटे वादु करलो वारलु देस मां बी उबु हवसे, ने तेरु मुकाबलु करने वाळु कुय नी रवसे।

17 तत्‌यार चु आपसा राजेन आखी ताकत भेळ काही वारलु माणसे काजे साते लीन आवसे, ने आपसी मरजीन अनसारे काम कर्‌या करसे। चु तीनुक आपसी बायरीन पुरे साते ईयाव बी कराड़नेन युजना बणावसे, तेबी तेरी युजना पुरी नी हवे, ने तेरु काय बी फायदु नी हवे। 18 ने तत्‌यार चु मटला समुदर भीणी मुंहडो कर लेसे ने बेसका माणसे काजे साते ली लेसे, बाकुन एक सीपायड़ान मुख्‌यु आपसी मटाय काजे सार देसे, बाकुन तेरी मटाय्‌न अनसारे तेरेसी बदलु लेसे। 19 तत्‌यार चु आपसा देसेन कीला भीणी आपसो मुंहडो कर लेसे, ने चु ठुकर खाय्‌न हीट पड़से, ने तेरु काय पतु नी लागे।

20 "हेरे पछेन एक अळी राजु आवसे, जु आपणा राज्‌येन धन बड़ावणे वाटे माणसे पर पयस्‌या मांगीन परेसान करने वाटे एक आफसर काजे मकलसे। थुड़ीक टेम मां हीना राजा काजे मार देसे, बाकुन माणसे अगळ नी ने नी लड़ाय मां।"

21 तीना जागा मां एक एकहेट्‌यु राजु उबु हवतेत चु राजगादी पर बठसे, बाकुन चु तेरे लायक नी रवे, तेबी चु वारु-वारु वात करीन राज हात कर लेसे। 22 तत्‌यार बेसका सीपायड़ा तेर साहरे सर जासे, ने वायदान मुख्‌यु बी हेरे अगळ सी उहवीन खत्‌तम हय जासे। 23 काहाकी चु तेरे साते वाचा बांदणे पर बी धुकु करसे, ने थुड़ाक माणसे काजे साते चहड़ीन ताकत वाळु बणसे। 24 चु वारु आरामेन दाहड़ाम सी देसेन मटला सहर पर लड़ाय करसे। ने जो काम तेरा डाहा-डाहा ने नी तेरा डाहा डाहान डाहा-डाहा करतेला, तीनाक चु करसे, ने लुटला धन काजे आपसा माणसे मां वाट देसे, चु थुड़ीक टेम लग मटला सहर काजे लेणेन वीच्‌यार करतु रवे।

25 तत्‌यार चु मीसरे देसेन राजा भीणी एक मटला सीपायड़ान टुळा लीन आवसे ने आपसी ताकत ने हिम्‌मत वदाड़से, ने मीसरे देसेन राजु बेसका मटा ताकतवाळा सीपायड़ा लीन आवसे ने लड़ाय ते करसे, बाकुन टीकी नी सके, काहाकी माणसे तेर वीरुद मां वीच्‌यार करसे। 26 तेरो खाणो खाणेवाळा बी तीनाक खत्‌तम करनेन कुसीत करसे, ने कदी तेरा सीपायड़ा जळडुबेन तसा चहड़से, तेबी तींद्‌रा बेसका माणसे लड़ाय करीन मर जासे। 27 तत्‌यार तीनु दुह्‌यु राजान मन बुराई करने मां लाग जासे, जां तक की चे एकुत टेबल पर बसीन आपसात आपसा लुच्‌चाय करसे, बाकुन तेरेसी काय नी हवे, काहाकी ईनी आखी वातेन आकरी टेम संय टेम मां हवसे। 28 तत्‌यार सीरीया देसेन राजु आपसा देस काजे बेसकु लुटीन खासे, ने तेरो मन भगवानेन चुखला वायदा भीणी रीस करसे, ने चु आपसी मरजी पुरी करीन आपसा देसेम पछु जाती रवसे।

29 अळी पछेन चु राजु मीसरे देस भीणी अळी पछु जासे, बाकुन तीनी पेहली कावान तसु पछेन तीनाक नी लुटीन खावाये। 30 काहाकी रोमी माणसेन ढंड्‌या तेरी वीरुद करसे, ने चु उदास हयन पछु जाती रवसे,

ने चुखला कायदा पर रीस करीन आपसी मरजी पुरी करसे। चु पछु आयन चुखला कायदाक नी माने तींद्‌री खबर लेसे। 31 तत्‌यार तींद्‌री मदत करन्‌या उबा हयन काठा चुखला जागाक ईटाळ देसे, ने तत्‌यारुत आकठान बादा काजे बंद कर देसे। ने चे तीनी बेकार चीज काजे उबी करसे, जी तीनी चीज काजे सारी देय। 32 ने जे माणसे वेरी हयन तीना वायदा काजे तुड़से, तीनुक जु चीकनी-चुपड़ी वात कंय-कंयन भटकाड़ देसे, बाकुन जे माणसे आपसा भगवानेन अक्‌कल राखसे, चे हिम्‌मत सी वीरुद करसे। 33 तींद्‌रेम सी थुड़ाक अक्‌कल वाळा माणसे, जे दीसरा माणसेक समजाड़से, तेबी चे बेसका दाहड़ा लग तलवार सी मारीन ने आकठा मां धपाड़ीन, ने गुलामी मां जाय्‌न ने लुटायन, मटला दुख मां पड़ी रवसे। 34 ने चे दुख मां पड़ीन मारायणु चालु रवसे, तत्‌यार थुड़ाक माणसे मदत सी बची जासे, बाकुन बेसका माणसे वारु-वारु वात कय्‌न दीसरा माणसे साते भेसकाय जासे। 35 ने सीकाड़ने वाळा माणसे मां सी थुड़ाक माराय जासे, चे हेरेसी हीट पड़से की चे पारखाय जाय, ने वारु ने चुखला बणे ने आकरी टेमे तक नी-गुनाळा रवसे, काहाकी हीनी आखी वातेन हवणु संय टेमे पुरो हवसे।

36 तत्‌यार चु राजु आपसी मरजीन अनसारे काम करसे, ने आपसुत आखा देवता सी उचु ने मटु छे करीन कवसे, ने आखा देवतान ने भगवानेन वीरुद मां बी गलत वात करसे, जां तक भगवानेन रीस सेळाय नी जाय, चां तक तीना राजान काम पुरो हवतो रवसे, काहाकी जो नख्‌खी करलो छे चो जरुड़ पुरो हवसे। 37 चु नी ते आपसा डाहा-डाहान देवतान फीकुर करसे, ने नी चु बायरीन देवतान फीकुर करसे। ने नी काहनाक देवतान ईज्‌जत करे, बाकुन चु आपसुत कवसे की मे आखा सी मटु छे। 38 चु आपसान राजान पद पर टीकी रय्‌न कीलान देवतान ईज्‌जत करसे, एक असु देवता तीनाक तेरा आड़ा-बुड़ा बी नी जाणतेला, चे सोनो, चांदी, मंहगली मणी अळी जसो चाहजे तसो मंहगलो भेट चड़ावीन तींद्‌री बड़ाय करसे। 39 चु एक पारका देस वाळा देवतान मदत सी आखाम ताकतवाळा कीला पर लड़ाय करसे ने जु काहनुक तीनाक माने तीनाक चु मटी ईज्‌जत आपसे, जे तीनुक राजान रुप मां मानसे, चु तीनुक बेसका माणसे पर राजु बणावसे ने तीनुक ईनाम वाटे आपसा देसेन जागा काजे वाट देसे।

40 आकरी टेम आवसे ती मीसरे देसेन राजु तीनाक सींगड़ा सी मारसे, बाकुन सीरीया देसेन राजु तींद्‌रे पर भुत्‌यान तसु बेसकु लड़ाय करने आवसे ने बेसका घुड़ा गाड्‌या ने ढंड्‌या लीन लड़ाय करसे, हेरे वजे सी चु आखा देसो मां पुगी जासे, ने तींद्‌रेम सी नीकळी आवसे। 41 चु वायदान देस पर बी लड़ाय करसे, ने बेसका देस उजड़ी जासे, बाकुन एदोमी, मोआबी ने अम्‌मोनी राजेन मुख्‌या आपसा हातेम सी बची जासे। 42 चु काही देस पर हमलु करसे ने मीसरे देस पर बी हमलु करसे। 43 चु मीसरे देसेन आखा सनो, चांदीन खजाना ने आखी चीजेन मालीक हय जासे, ने लुबीया देसेन ने कुसी देसेन* माणसे बी तेरे पछळ हय जासे। 44 तीनी टेमे चु उगेवणु ने बुडेवणु सी खुस-खबर सामळीन घाबराय जासे, ने चु बेसकु रीसवायन बेसका माणसेक सारने करीन नीकळसे। 45 चु दर्‌यान ने बयड़ान ईचमां चुखली वाचान वारका देसेन बयड़ा धड़े राजपाटेन तम्‌बु उबु कराड़से; अतरो करने पर बी तेरो आकरी आय जासे, ने कुय बी तेरु मदत करने करीन नी आवे।