1 नबुकदनेस्‌सर राजु आपसा राजेन बारामां दीसरे साल बेसको वारु सपनो देख्‌यु, ने जाग गुयु ने तेरु जीव घाबराय गुयु, ने तीनाक नींदुत नी आवी। 2 तत्‌यार राजु हुकुम आप्‌यु, की रासी देखण्‌या, बड़वाय-भुपाय करने वाळा काजे बुलावु की चे राजा तेरा सपनान मतलब देखाड़े; तेरेमां चे आवे ने राजा अगळ हजुर हवे। 3 तत्‌यार राजु तीनुक कह्‌यु, "मे एक सपनो देख्‌यु, ने मारो मन बेसकु परेसान हय ज्‌यु, की मे तीना सपनाक कसु समजो।"

4 तत्‌यार कसदी माणसे राजा सी अरामी बुली मां कह्‌या, "ए राजा, तु जलम जीवतेलु रह्‌वे! तारा चेलाक सपनो देखाड़, ने हामु तेरो मतलब देखाड़सुन।"*

5 राजु कसदी माणसे काजे जपाप आप्‌यु, "मे जी हुकुम आप देदु की, कदी माणसे तुहुंं सपनान मतलब नी देखाड़ु, ती तुहुंं काजे मारायन बटका-बटका कर देसे, ने तुंद्‌रा घर काजे उजाड़ देसे। 6 कदी तुहुंं फळ समेत सपना काजे देखाड़ देवु, ती तुहुंं भाती-भातीन दान ने मटली ईज्‌जत हात करसु। ने मटा-मटा फळ हात करसु करीन तुहुंं मेसेक सपनान मतलब देखाड़ु।"

7 चे दीसरी कावा अळी कह्‌या, "ए राजा सपनो तारा चाकर्‌या काजे देखाड़ु, ने हामु तेरो मतलब समजाड़ देसुन।"

8 राजु जपाप आप्‌यु, "मे पाक्‌को जाणो की तुहुंं जो देख्‌या, की राजान मुंहडाम सी जी हुकुम नीकळी गुय की, राजान टेम बड़ावणे चाही रया। 9 तेरेमां कदी तुहुंं मेसे सपनो नी देखाड़ो ती तुंद्‌रे वाटे एकुत हुकुम छे। काहाकी तुहुंं एकु कर्‌या हसे की जत्‌यार लग टेम नी बदले, तत्‌यार लग हामु राजा अगळ झुटी वात कर्‌या करसुन। तेरेमां तुहुंं मेसे मारो सपनो देखाड़ु, तत्‌यार मे जाणीस की तुहुंं तेरा फळेन मतलब बी देखाड़ सक्‌सु।"

10 कसदी माणसे राजा सी कह्‌या, "ईनी धरती पर असु काहनु माणुस नी हय, जु राजान मन मां काय छे, चो देखाड़ सके। ने नी काहनुक असु राजु हय नीते डाहलु मुखी हय नीते सीपायड़ु हय जु काहनाक हात देखण्‌याक, नीते मंतर नीते जादु सी असी वात पुछला हय। 11 जी वात राजु पुछतेलु तसी वात दीसरा काहना बी भीणी नी हय, ने देवता काजे छुड़ीन तींद्‌रो रह्‌णु माणसे साते नी हय, ने काहनुक दीसरु नी हय, जु राजा काजे जो बताड़ सके।"

12 तींद्‌री वात सामळीन राजु बेसकु रीसवाय गुयु, ने बेबीलोन सहर मां रवण्‌या आखा अक्‌कल वाळाक मार नाखणेन हुकुम आप देदु। 13 हेरेसी जु हुकुम नीकाळ्‌यु, ने जानकार्‌या माणसे काजे मार नाखणे करीन, माणसे दानीयल काजे ने तेरा दुस्‌तीदार्‌या काजे हेरने बाजी रह्‌ला की तीनुक बी मार नाखु।

14 तत्‌यार दानीयल, राजान राखवाळ्‌यान मुखी अर्‌योक सी, जो बेबीलोनेन जानकार्‌या माणसे काजे मारने करीन नीकळी रवला, सुचीन वीच्‌यार कर्‌या ने अक्‌कल सी वात कर्‌या। 15 ने राजान मुख्‌या अर्‌योक सी पुछ्‌या की, "जु हुकुम राजा भीणी सी अतरी उतवाळ सी काहा नीकाळ्‌यु?" तत्‌यार अर्‌योक दानीयल काजे तेरो मतलब देखाड़ देदु।

16 ने दानीयल राजान कीला मां गुयु, ने राजा सी लीलघायन कह्‌यु, की तेरे वाटे एक टेम नक्‌खी करनु चाहजे, ती चु मटला राजा काजे सपनान मतलब देखाड़ देसे। 17 तत्‌यार दानीयल आपसान घर जाय्‌न, आपसा दुस्‌तीदार्‌या हनन्‌याह, मीसाएल, ने अजर्‌याह काजे ची आखी वात देखाड़्‌यु, 18 ईनी वातेन बारामां सरगेन भगवानेन गीण-दया वाटे जो कय्‌न दुवा करु, की बेबीलोन ने आखा जानकार्‌या साते दानीयल ने आपसा दुस्‌तीदार्‌या काजे बी नी खत्‌तम नी करे। 19 तत्‌यार जी वात दानीयल काजे रातेन सपनान साहरे उजेंती हय। तत्‌यार दानीयल ने सरगेन भगवान काजे तु बेसकु वारु छे कह्‌यु,

20 दानीयल कह्‌यु भगवानेन नाव जलमको वारु छे,

काहाकी अक्‌कल ने बड़ाय तेरीत छे।

21 टेमे ने सीजन काजे हयुत बदले;

राजा काजे बदले बी ने बीगाड़ बी देय;

अक्‌कल वाळा काजे अक्‌कल ने समजणे वाळा काजे समज बी हयुत आपे।

22 हयुत सातायली वात काजे ने सातायली वाट काजे उजेंतु करे,

ने चु जाणे की आंदारला मां काय छे,

ने तेरे पुठे जलम वीजाळो बणीन रह्‌वे।

23 ए मारा आड़ा-बुड़ान भगवान, मे तुसेक बेसकु वारु कह्‌वो ने तारी भक्‌ती करो,

काहाकी तु मेसेक अक्‌कल ने सक्‌ती आपलु छे,

"जेरी वातेन खुलासु हामु तारे धड़े मांगला,

तीनाक तु मारे पर उजेंतु करलु छे, तु हामुक राजान वात देखाड़लु छे।"

24 तत्‌यार दानीयल अर्‌योक धड़े, तीनाक राजा बेबीलोन सहरेन जानकार्‌या काजे खत्‌तम करने करीन ठेहरावलु छे, घर मां जाय्‌न कह्‌या, "बेबीलोनेन जानकार्‌या काजे खत्‌तम मां कर, मेसेक राजा अगळ घर मां ली चाल, मे फळ बताड़ीस।"

25 तत्‌यार अर्‌योक दानीयल काजे राजान तसु मामार घर मां ली जाय्‌न तीनाक कह्‌यु, "यहुदी जेल मां सी एक अदमी मेसेक भेळु हयु, चु राजा काजे सपनान मतलब देखाड़से।"

26 राजु दानीयल सी पुछ्‌यु, तेरो नाव बेलतसस्‌सर बी हतलो, पुछ्‌यु, "काय तारेम अतरी ताकुत छे, काय की जो सपनो मे देख्‌यु, तीनाक तु मतलब समेत मेसेक देखाड़ सके?"

27 दानीयल राजा काजे जपाप आप्‌यु, "जी वात राजा पुछ्‌ये, चो नी ते जानकार्‌या, नीते जादु-टुना करन्‌या, नी रासी देखण्‌या, नी दीसरा हात देखण्‌या राजा काजे देखाड़ सके।" 28 बाकुन वात काजे उजेंतु करन्‌यु भगवान सरगे मां छे; ने हयुत नबुकदनेस्‌सर राजा काजे कह्‌यु की, आकरी दाहड़ा मां काय-काय हवसे। तारो सपनो ने जो काय तु सुवतु जाय्‌न देख्‌यु, चो जो छे:

29 ए राजा तुसेक सुवणी घड़ी जो वीच्‌यार आयो की आवणे वाळा टेम मां काय-काय हवणे वाळो छे, तत्‌यार वात काजे उघाड़ने वाळा तुसेक देखाड़्‌या की, काय-काय हवणे वाळो छे। 30 मार पर जी वात ईनी वजे सी नी उजेंती हय की मे आखा जीवतेला माणसे सी अधु अक्‌कल वाळु छे, बाकुन ईनीत वजे सी उजेंती हय की सपनान मतलब राजा काजे देखाड़ सको, ने तु आपसान मन मां वीच्‌यार समजी सके।

31 "ए राजा, तत्‌यार तु सपनो देखतेलु, तत्‌यारुत एक मटली मुरती देखाव पड़ी, ने ची मुरती जी मार अगळ उभी हय रह्‌ली, ची बेसकी लांबी चवड़ी हतली, तेरी चमक बेसकी हतली, ने तेरो बणावट बीहाड़े असो हतलो। 32 तीनी मुरतीन मुणको ते चुखला सनान हतला, तेरी छाती ने दुह्‌यु बाहळा चांदीन ने तेरो पेट ने सातळ्‌या पीतळेन हतला, 33 हेरा पाय लुहड़ान छे, नीते हेरा पाय थुड़ाक लुहड़ान नीते थुड़ाक हीस्‌सा धुळान छे। 34 अळतेन देखता-देखता, तु काय देख्‌या की, एक दगड़ा काजे काहनुक बी नी खुद्‌यु ने आपसुत उखळीन तीनी मुरतीन पायेन्‌चा लागीन जी लुहड़ान ने धुळान हतली, तीनुक छेदर्‌या-छेदर्‌या कर देदु। 35 तत्‌यार लुहड़ो, धुळु, पीतळ, चांदी ने सोनो बी आखो छेदर्‌या-छेदर्‌या हय गुयो, ने तप माय्‌न ने खळदाण मायन चारान तसो असो उडी गुयो की तेरु पतु बी नी चाल्‌यु, ने चु दगड़ु जु मुरती पर लागलु हतलु, चु मटलु बयड़ु बणीन आखी धरती पर पाखराय गुयो।

36 "सपनो ते जत छे, ने हंय हामु तींद्‌रा सपनान मतलब राजा काजे समजाड़ देसुन। 37 ए राजा, तु ते आखा राजा पर राज करन्‌यु मटु छे, काहाकी सरगेन भगवान तुसेक राज, सक्‌ती, ताकत ने सेक-सींगार आप्‌यु। 38 ने जां बी माणसे छे, चां तीनु आखा काजे, ने खयड़ान आखा जीवे, ने जानवर्‌या ने सरगेन चिरला बी तारा हक मां कर देदा; ने तुसे काजे तीनु आखान हकवाळु ठेहरायु। जां सनान मुणको तुत छे। 39 तेर पछेन एक राज्‌य अळी पयदा हवसे जो तार सी नान्‌लो हवसे, अळतेन एक अळी तीसरो राज पीतळेन तसो हवसे, तेरेम आखी कळजुग आय जासे। 40 चवथो देस लुहड़ान तसो काठो हवसे, ने लुहड़ा सी आखी चीज छेदर्‌या-छेदर्‌या हय जासे, ने दळाय जाय। हेरेसी तीना तरीका सी लुहड़ा सी चो आखो कुचाय जाय, हीना तरीका सी तीना चवथा देस सी आखो काही छेदर्‌या-छेदर्‌या हयन दळाय जासे। 41 तुहुंं जी मुरती पाये ने तींद्‌री आंगळी काजे देख्‌या, जो काही कुम्‌हारेन धुळान हतली, ने काहलीक लुहड़ान मुरती हतली, तींद्‌रे सी चो चवथो देस वाटायलो हसे: तेबी तेरेमां लुहड़ान तसो काठो रह्‌से, जसा की तुहुंं कुम्‌हारेन धुळा साते लुहड़ो बी भेसकायलो देख्‌या हसे। 42 जसी पायेन आंगळी काहलीक ते लुहड़ान हतली, ने काहलीक धुळान हतली, तेरो मतलब जो छे, की चो देस काहनीक जागे ते काठो हतलो, हसे ने काहनीक जागे कमजुर हतलो हसे। 43 तुहुंं तीना लुहड़ाक कुम्‌हारेन धुळा साते भेसकायलो ते देख्‌या हसे, तेरेसी तेरो मतलब जो छे, की तीना राजेन माणसे एक दीसरा माणसे साते परम सी ते रवसे, बाकुन जसो लुहड़ो धुळा साते भेसकाय नी सके तसोत चे बी एक दीसरा साते परम मां बणीन नी रवे। 44 तीनु राजान दाहड़ा मां सरगेन भगवान, एक असो राज बणावसे जो जलम तक खत्‌तम नी हवे, ने नी चो दीसरा माणसेन हात मां आपसे बाकुन चो तीनु आखा देस काजे छेदर्‌या-छेदर्‌या कर देसे, ने तीनुक आखा काजे खत्‌तम कर देसे, ने चो जलम टेकीन रह्‌से। 45 जसु तु देख्‌यु एक दगड़ु काहनाक ने हाते पाखुर बयड़ाम सी उखळे, ने चु लुहड़ा, पीतळ, धुळु, चांदी, ने सना काजे छेदर्‌या-छेदर्‌या कर्‌या, ईनीत रीती मटु भगवान राजा काजे बताड़्‌यु की हेरे पछेन काय हवणे वाळो छे। ने नी सपना मां ने नी तेरा फळ मां संका हय।"

46 अतरो सामळीन नबुकदनेस्‌सर राजु मुंहडान भुरसे धरती पर हीट पड़्‌यु, ने दानीयल काजे आंध्‌यु, ने हुकुम आप्‌यु की तीनाक बादा आपु, ने तींद्‌रे अगळ गंदायणी चीज काजे धपाड़ु। 47 अळी राजु दानीयल काजे कह्‌यु, "छाची ते जी छे, की तुंद्‌रु भगवान आखा भगवानेन भगवान, राजान राजु, ने रासी देखणे वाळु‌ छे, हेरेसी तु जी वात उजेंतु कर देदु।" 48 तत्‌यार राजु दानीयलेन पद काजे मटु कर देदु, ने तीना काजे बेसका मटा-मटा भेट आप्‌या; ने जो हुकुम आप्‌यु की चु बेबीलोनेन आखा जीला पर सरदार ने बेबीलोनेन आखा जानकार्‌या डाहला मुखी बण्‌या। 49 तत्‌यार दानीयल राजु लीलघायन कह्‌णे सी पेहलुत राजु सदरक, मेसक, ने अबेदनगो काजे बेबीलोन राजेन काम उपर नक्‌खी कर देदु: बाकुन दानीयल आपसुत राजान महल मां रया करतेलु।