1 बेलसस्‌सर नावेन राजु आपसा एक हजार मालदार धनवाळा माणसे वाटे मटली पंगत राख्‌यु, ने तींद्‌रा हजारु माणसे अगळ अंगुरेन रस पीदु। 2 अंगुरेन रस पीतु-पीतु बेलसस्‌सर राजु हुकुम आप्‌यु की, सनान ने चांदीन जे कपास्‌या ने कटवरा तेरु बास जु नबुकदनेस्‌सर यरुसलेमेन मंदीर मां सी नीकाळ देदलु, तीनुक लावु की राजु मालदार धनवाळा माणसे ने राणी ने राखली बायरी आखी भेळे तीना ठाहरा मां सी पीदा। 3 तत्‌यार चे सनान कपास्‌या ने कटेवरा यरुसलेम मां भगवानेन मंदीर मां सी नीकाळ्‌ळा हतला, चे लाया, ने राजु आपसा मालदार ने धनवाळा माणसे, ने राण्‌या, ने तेरी राखली समेत तेरेमां पीणे लाग्‌या। 4 चे अंगुरेन रस पीदा ने सनान, ने चांदीन, ने पीतळ, ने लुहड़ान ने लाकड़ा ने दगड़ान देवतान भक्‌ती करतेला।

5 उचकाणुत एक माणसेन हात देखाव पड़्‌यु ने बंगलान चुनान दीवाल पर लिखणु सुरु कर देदु; चां दीवान वीजाळो आखा सी ज्‌यादा चमकी रवलो। ने राजान हात काजे लिखतेलु देख्‌यु। 6 तीनाक देखीन राजु घाबराय गुयु, ने चु मन मां की मन मां घाबराय गुयु, ने तेरी कमरेन जुड़न ढीला पड़ ज्‌या, ने कापते-कापते तेरा घुटणा एक दीसरा सी टकरायणे बाजी गुया। 7 तत्‌यार राजु जुर सी आयड़ीन बड़वाय-भुपाय करने वाळा ने दीसरा अळी हात देखणेवाळा काजे हजुर हवणे करीन हुकुम आप्‌यु। जत्‌यार बेबीलोनेन पुती वाचण्‌या धड़े आयु, तत्‌यार राजु तीनु सी कहणे लाग्‌यु, "ज काय चो लिखलो भणीन तेरो मतलब मेसेक समजाड़ तीनाक जामण्‌या रंगेन पुथल्‌या, ने तेरा गळा मां सनान माळु पेहरावसे; ने मारा राज मां तीसरु हयुत राज करसे।" 8 तत्‌यार राजान आखा जानकार्‌या माणसे घर मां माहें आया, बाकुन तीना लिखला काजे कुई बी नी भणी सक्‌या, ने नी राजा काजे तेरो मतलब समजाड़ सक्‌या। 9 तेरेसी बेलसस्‌सर राजु बेसकु घाबराय गुयु, ने बेसकु बीही गुयु, ने तींद्‌रु मुख्‌यु बी बेसकु उदास हय गुयु।

10 राजान माय मुख्‌यान वात सामळीन, खाणो बणावतेला घर मां आवी ने कवणे बाजी गुय, "ए राजा, तु जलम जीवतेलु रवसी, ने तारा मन मां, मां घाबराये ने उदास मां हवे। 11 तारा राज मां दानीयल नावेन एक माणुस छे तेरो नाव तारु बास बेलतसस्‌सर पाड़‌लु तींद्‌रेम चुखला भगवानेन जीव आत्‌मा रवे, ने तीना राजान दाहड़ान मां तेरेम तेज, समज ने देवतान तसी अक्‌कल हतली। ए राजा, तारु बास जु राजु हतलु, चु तीनाक आखा रासी देखण्‌या, हात देखणे वाळा, बड़वाय-भुपाय करने वाळा ने अळी वारु अगला बारामां वात बताड़न्‌यान मुखी ठेहरावलु, 12 काहाकी तींद्‌रेम खास आत्‌मा, अक्‌कल ने समज, ने सपनान मतलब बताड़‌ने ने काहनी बताड़ने, ने संका छेटे करनेन सक्‌ती हतली। तेरेमां हंय दानीयल काजे बुलावे, ने चु तेरो मतलब बताड़से।"

13 तत्‌यार दानीयल काजे राजा अगळ घरमां बुलाया। ने राजु दानीयल सी पुछणे बाजी गुयु, "काय तु जुत दानीयल छे, जु मारा बास नबुकदनेस्‌सर राजान साहरे रवणेन जागा यहुदान देस मां सी लावला यहुदान गुलाम माणसे भेळतु लावलु छे? 14 मे तारा बारामां सामळ्‌ळु छे की, देवतान जीव आत्‌मा तारेम छे, ने तारेम वीजाळो, समज ने वारु अक्‌कल छे। 15 देखु हंय जानकार्‌या ने बड़वाय भुपाय करने वाळा माणसे मार अगळ असा करीन बुलावला की जो लिखलो भणे ने तेरो मतलब बताड़े, बाकुन चे तीनी वातेन मतलब नी समजाड़ सक्‌या। 16 बाकुन मे तारा बारामां सामळ्‌यु की दानीयल सातायली वात बताड़ सके ने संका छेटे कर सके। तेरेमां हंय कदी तु तीना लिखला काजे भण सके ने तेरो मतलब मेसेक समजाड़ सके, ती तुसेक जामण्‌या रंगेन पुथल्‌या, ने तारा गळा मां सनान माळा पेहरावसुन, ने राज मां तीसरु मुख्‌यु तुत बणसी।"

17 दानीयल राजा काजे कह्‌यु, "तारो भेट तारेत धड़े राख, ने जु बदलु तु देणे हींडी रयु, चु दीसरा काजे आप दे, ची लिखली वात मे राजा काजे भणीन सामळावीस, ने तेरो मतलब बी तुसेक समजाड़ दीस।"

18 ए राजा, आखान मुखी भगवान तारा बासेक नबुकदनेस्‌सर काजे राज, बड़ाई, ईज्‌जत ने मटो नाव आप्‌यु। 19 ने तीना बड़ायन वजे जो चु तीनाक आपलु, राज-राजेन आखा माणसे, ने दीसरी-दीसरी बुली बुलने वाळा तेरे अगळ कापे ने थर-थर करतेला; तीनाक चु चाहतेलु तीनाक मारतेलु, ने तीनाक चु चाहतेलु तीनाक चु उंचु पद आपतेलु, ने तीनाक चु चाहतेलु तीनाक नेचु उतार देय। 20 बाकुन जत्‌यार राजान मन मटाय करने बाजी गुयलो, ने तेरी आत्‌मा बेसकी काठी हय गुई, ने चु बेसकु मटाय करने बाजी गुयु, तत्‌यार चु तीनाक आपसी राजगादी पर ती उतारी देदा, ने तेरी बड़ाय हेटी हय गुय। 21 चु माणसे मां सी नीकळी गुयु, ने तेरो मन जानवरेन तसो हय गुयो, ने तेरो रवणु बयड़ा मायन गदड़ान तसो हय गुयो, ने चु बेलेन तसु चारु चरतेलु, ने आपसो डील सरगेन उस्‌टा ती भीगतो रयो, जत्‌यार चु जाणी गुयु की आखान मुखी भगवान माणसेन राज मां राज करे, ने तीनाक चाहे तीनाक हकदार्‌यु ठेहरावे।

22 तेबी ए बेलसस्‌सर, तु जु तेरु पुर्‌यु छे, ने जो आखो काय तु जाणतेलु, तेबी तारो मन नीचळो नी हयो। 23 ने तु सरगेन मालीकेन वीरुद मां मुणको हाकलीन तेरा घरेन ठाहरा मांगाड़ीन आपसा अगळ मेकाड़ लेदु, ने आपसा मुख्‌या ने राखला बायरा समेत तु तेरेमां अंगुरेन रस पीदु; सनो चांदी, पीतळ, लुहड़ो, लाकड़ो ने दगड़ान देवता, जे नी देखे ने नी सामळे, ने नी काय समजे, तींद्‌री ते बड़ाय कर्‌या बाकुन भगवान, तीनान हात मां तारु जीव छे, ने तीनान हक मां तारो चालनु फीरनु छे, तेरु आव-भाव तु नी कर्‌यु। 24 तत्‌यारुत जु हातेन एक हीस्‌सु हेरे भीणी सी उजेंतु हयु, ने चे बुल लिखाय गुया।

25 चे बुल लिखाय गुयला चे जे छे, मने, मने, तकेल, ने पर्‌सीन। 26 हीना लिखलान मतलब जो छे की: मने, मतलब भगवान तारा राजेन दाहड़ा गीणीन तीनाक खत्‌तम कर देदु। 27 तकेल, मतलब जो छे की, तुसेक ताकड़ीम तुली देदा, ने तारो बजन कम नीकळ्‌यो। 28 परेस, मतलब जो छे की, तारो राज वाटीन मादीयों ने फारसी माणसे काजे आप देदु।

29 तत्‌यार बेलसस्‌सर हुकुम आप्‌यु, ने दानीयलेन जामण्‌या रंगेन पुथल्‌या ने तेरा गळा मां सनान माळा पेहराया✝, ने आयड़ीन चवकीदार्‌या तेरे बारामां कह्‌या, की राज मां तीसरु दानीयलुत राज करसे। 30 तीनीत राते बेबीलोन देसेन राजा बेलसस्‌सर काजे मार देदा। 31 ने अळतेन तेरो राज माद्‌या माणसेन राजु दारु हात कर लेदु, तेरे जागे राजगादी पर बसीन राज-पाट समाळने बाजी गुयु। तीनी टेमे दारु राजु धड़े-वड़े साहाठ ने दुय सालेन हतलु।