1 हेरेसी आखी भातीन काट-छाट ने झुट ने ढंगड़ा ने डाहवाय ने नाव-बद्‌दी काजे छेटा करीन, 2 नवलो पयदा हवला पुर्‌यान तसा वारु जीव-आत्‌मान दुतेन लालच करु काहाकी हेरे साहरे छुटकारु जड़ने वाळा वाटे अदता जावु। 3 काहाकी तुहुंं मालीकेन दयान सवाद चाखी लेदला छे।✝

4 हय तुहुंं ईसु धड़े आवला छे, जु जीवतेलु दगड़ु छे, तीनाक माणसे फालतु छे करीन छुड़ देदा बाकुन भगवान वाटे बेसको जरुड़ी ने नेवाड़लु छे। 5 तुहुंं बी आपसात जीवतेला दगड़ान तसा जीव-आत्‌मान घर बणावता जावु, तेरसी पुजारान चुखला समाज बणीन असा जीव-आत्‌मान बादा चड़ावु जो ईसु मसीन साहरे भगवान काजे गमे। 6 हेर वजे सी चुखला सास्‌तुर मां बी आवलो छे;

देखु मे सीयोन बयड़ा मां खुड़ान सीरेन नेवाड़ला ने बेसकु जरुड़ी दगड़ु मेको;

ने जे कुय हेरे पर भुरसु करसे,

चु काहानी बी रीत सी नाव-बद्‌दी नी हवे।✝

7 अळतेन तुंद्‌रे वाटे जे भुरसु करु चु ते बेसको जरुड़ी छे, बाकुन जे भुरसु नी करे हींद्‌रे वाटे,

तीना दगड़ा काजे मीस्‌तर्‌या फालतु ठेरावला हतला।

बाकुन हयुत खुणान खास दगड़ु हतलु।✝

8 ने, "ठुकोर लागणेन दगड़ु ने ठुकर खाणेन चापर्‌या बण गुया।"

काहाकी चे ते बुल काजे नी मानीन ठुकर खाय,

ने ज्‌य डंड हींद्‌रे वाटे भगवानेन साहरे ठेरावलु छे।✝

9 बाकुन तुहुंं नेवाड़ला खानदानी छे, ने राज पाट वाळा पुजारा ने चुखला माणसेन टुळु छे, ने भगवानेन वारलु माणसे छे, हेरेसी की भगवान तुहुंं काजे आंदारला मां सी बेसका मटा वीजाळा मां बुलावलु छे हेरा गुण देखाड़ु।✝ 10 तुहुंं पेहल ते काय बी नी हतला बाकुन हय भगवानेन माणसे छे तुंद्‌रे पर दया नी हवली हतली बाकुन हय तुंद्‌रे पर दया हवी।✝

11 ए लाटेक्‌ला भायसे मे तुंद्‌रे सी लीलघायो की तुहुंं आपणे आप काजे दीसरे देस सी आवलु ने आवणे जाणे वाळु जाणीन हीनु कळीन डीलेन भुंडली लालच सी जे आत्‌मा सी लड़ाय करे बची रवु।✝ 12 आड़जात्‌या मां तुंद्‌रो चाल-चलन वारु हवणु चाहजे; काहाकी जीनु-जीनु वात मां चे तुहुंंक पापी जाणीन नाव-बद्‌दी करु चे तुंद्‌रो वारु काम काजे देखीन हयुत वजे सी, भगवानेन आवणे दाहड़े चे सेक-सींगार करे।

13 मालीक ईसु वाटे ठहरावला हरेक हक-जमाड़न्‌या आखा हकदार्‌यान हक मां रहु भले चु कळीन आखा देस पर राज-करन्‌यु मुख्‌यु राजु काहनी हय, 14 भले चु एकेक राजवाड़ानम नीते एकेक जीलाम राज करन्‌यु हय। भगवान कुहर्‌याक डंड आपणे ने भलाय करन्‌याक वारु कर्‌या कहणे करीन तीनु राज करन्‌याक ठेरावलु छे। 15 काहाकी भगवानेन जी मरजी छे की तुहुंं वारु काम करनेन साहरे डेड़-अकल्‌या माणसेन मुंहडा काजे बंद करु जे बे फालतु वात करता रवे। 16 जी वात छाचली छे की, तुहुंं ईसुन लारे छुटला माणसे बण गुयला छे करीन हीना हक काजे नाव-बद्‌दी करन्‌या मां बणु, बाकुन आपसा काजे भगवानेन गुलाम पावर्‌यु जाणीन पापेम सी छुटला रवीन जीवु। 17 आखान ईज्‌जत करु, भायस्‌यो सी परम राखु भगवान सी बीहु, राजान आव-भाव करु।✝

18 ए पावर्‌या आखी तरान ईज्‌जत साते आपणा मालीकेन हक मां रहु नी सीरप हींद्‌रे जे वारुत ने नीचळा बाकुन भुंडा छे हींद्‌री बी ईज्‌जत करु। 19 काहाकी कदी कुय भगवानेन वीच्‌यार करीन नी-नीयाव सी दुख हाकलीन पीड़ाक सेण करे ती चु वारु बड़ाय लायक छे। 20 काहाकी कदी तुहुंं गुनु करीन सपाटा खादा ने दम धरीन रया तेरेमां काय बड़ायन वाते छे? बाकुन कदी वारु काम करीन दुख हाकलीन ने दम धरीन रवु ती जी भगवानेन बड़ाय लायक छे। 21 ने तुहुंं हेरे वाटे बुलाय बी गुयला छे काहाकी मसी बी तुंद्‌रे वाटे दुख हाकलीन तुहुंं एक नमुनु आप देदलु छे की तुहुंं बी तेरेन तसा चाल सकु। 22 नीते ईसु पाप कर्‌यु ने नी हेरे मुंहडा सी धुकान काय वात कर्‌यु।✝ 23 चु गाल सामळीन गाल नी देदु ने दुख हाकलीन काहना काजे बी धमकी नी देदु बाकुन आपणे आप काजे धरमी नीयाव करन्‌या भगवानेन हात मां सुपलु हतलु।✝ 24 मसी आपसुत हामरा पाप काजे आपणा डील पर लीन कुरुस पर चड़ गुयु तीनाक पापे वाटे मारीन धरम वाटे जीवन जीवतु हेरे मार खाणे सी तुहुंं वारु हय गुया।✝ 25 बाकुन हय गुवाळ्‌या ने आत्‌मान राखवाळी करने वाळा धड़ेत आया।✝