1 ए बायरा आपणा-आपणा अदमीन हक मां रवु, जेरेसी की कदी हींद्‌रे मां सी कुय भगवानेन बुलेन हुकुम नी मानने वाळु हय ती बी तुहुंं काय बी नी कहुं तेबी चे आपणी-आपणी बायरीन सभावेन साहरे भुरसा मां आय जासे। 2 काहाकी चे तुंद्‌री चुखली ने वारलु आव-भाव काजे देखता रवे। 3 तुंद्‌रो बेसको जीर्‌ये देखायणु मुणका वाटे नी हवणु चाहजे मतलब कान्‌या गुथणु ने सनान रकम नीते भाती-भातीन पुथल्‌या पेहरनु। 4 बाकुन तुंद्‌रो डुकायलो ने सातायलो माणुस नरम ने मनेन नीचळान कदी नी खत्‌तम हवणु चाहजे तसों बेसके जुरे देखायणु साप-सुतरो रवे काहाकी भगवानेन नींगा मां हेरी कीमत मटी छे। 5 पेहली टेम मां चुखला बायरा बी ज भगवान पर आस राख तेला आपणे आप काजे ईनी रीत सी सवारे ने आपणा-आपणा अदमीन हक रवतेली। 6 जसी सारा अब्‌राहमेन हुकुम मान तेली ने हीनाक मालीक कवतेली अळतेन तुहुंं बी कदी भलाय करु ने काहनीक तरा धाक सी बीहु नी ती हेरी पुरे बणसु।

7 असात ए अदमी तुहुंं अक्‌कल सी बायरा साते सवसार करु ने बायरी काजे लुली जाणीन हेरु आव-भाव करु ज समजीन की हामु दुयु जीवनेन दयान वाटाम हक मां छे जेरेसी तुंद्‌री दुवा रुकी नी जाय।

8 अळतेन आखान आखा एक मन ने दयाळा ने भायस-भायस सी परम राखणेवाळा ने गीण-दयाळा ने नरम बणु। 9 कुहरायन बदले कुहराय मां करु ने गाळीन बदले गाळी मां देवु बाकुन हेरे उल्‌टा बरकत आपु काहाकी तुहुंं संयबरकत हकदार हवणे वाटे बुलाय गुयला छे 10 काहाकी कुय,

जीवनेन मरजी राखे,

ने वारलु दाहड़ा देखणु चाहजे,

चु आपणी जीप काजे कुहराय सी,

ने आपणा हुटड़ा काजे धुकान वात करने सी रुकी रवलु।

11 कुहरायन सात छुड़ देवु ने भलाय करु ने चु तीनी सांती काजे हेरे,

ने हेरीत कुसीस मां रवे।

12 काहाकी मालीकेन डुळा धरमी माणसे पर लागला रवे,

ने हेरा कान्‌टा हींद्‌री लीलघाय भीणी लागला रवे

बाकुन मालीक कुहराय करने वाळा नी फीरे।✝

13 कदी तुहुंं भलाय करनेन धुन मां रहु ती तुंद्‌री कुहराय करने वाळा पछेन कुण छे? 14 कदी तुहुंं धरमेन वजे सी दुख बी हाकलु ती बरकतवाळा छे बाकुन माणसेन बीहायने सी मां बीहु ने मां घाबरावु। 15 बाकुन मसी काजे मालीक जाणी आपणा-आपणा मन मां चुखला समजु जु कुय तुंद्‌रे सी तुंद्‌री आसेन बारामां काय पुछे हीनाक जपाप आपणे वाटे जलम तीयार रवु बाकुन नरम ने धाकेन साते रवु। 16 बाकुन नरम ने ईज्‌जत साते मन काजे बी चुखो राखु हेरेसी सी की जीनु वातेन बारामां तुंद्‌री नाव-बद्‌दी हवे हींद्‌रे बारामां चे ईसु मसी मां तुंद्‌रे वारलु चाल चलनेन नाव-बद्‌दी करे चे लाजवाये। 17 काहाकी कदी भगवानेन जी मरजी हवे की तुहुंं भलाय करनेन वजे सी दुख हाकले ती ज कुहराय करनेन वजे सी दुख हाकलने सी वारु छे। 18 हेरेसी की मसी बी मतलब नी-धरम वाळा वाटे ईसु धरमी पापेन वजे सी एक कावा दुख हाकल्‌यु काहाकी हामु भगवान धड़े पुग्‌या च डीलेन भाव सी ते मार देदा बाकुन आत्‌मान भाव सी जीवाड़ी गुयु। 19 आत्‌मान मां जाय्‌न बुजायली आत्‌मा काजे परचार कर्‌यु। 20 चे हीनु माणसेन आत्‌मा हतली जीनुक भगवानेन हुकुम काजे पाळन नी कर्‌या, जत्‌यार चु नुहान दाहड़ा मां भगवान दम धरीन वाट देख रवलु ने ढंड्‌यो बन्‌ने बाजी रह्‌लो, तीनाम बठीन थुड़ाक माणसे मतलब आठ माणसे पाणीन साहरे बचाड़ी गुया। 21 ईनात पाणी काजे दाखलु बी मतलब बपतीस्‌मा ईसु मसी जीवतु हवणेन साहरे हय तुहुंंक बचाड़ने। हेरेसी डीलेन मुयळ काजे छेटे करीन मतलब नी हय, बाकुन वारलु डीमाक सी भगवानेन हक मां हय जाणेन मतलब छे। 22 चु सरग पर जाय्‌न भगवानेन जेवड़े आन्‌गे बठी गुयु ने सरगेन वाळा काहवाळ्‌या ने हकदार्‌या ने ताकत हेरे हक मां करला छे।✝