2 Coríntios 11

पोलुस ने लुच्‌चा नेवताळा

1 कदी तुहुंं मारी थुड़ीक डेड़ अक्‌कल सेण कर लेता ती काय वारु रवतो; हव, मारी सेण बी कर लेवु। 2 काहाकी मे तुंद्‌रे बारामां भगवानेन धुन लागाड़ रवो हेरेसी की मे एक अदमी सी तुंद्‌री वात लागाड़लु छे, की तुहुंं चुखली कुवारली पुरेन तसा मसी काजे सुप दम। 3 बाकुन मे बीहु की जसु घड़सु आपणी चालाकी सी हव्‌वा काजे बेहकाड़्‌यु, असात तुंद्‌रे मन मां सुदा ने चुखला पण सी जे मसीन साती हवणु चाहजे काय खत्‌तम नी हय जाय। 4 कदी कुय तुंद्‌रे धड़े आवीन, काहालाक दीसरा ईसुन परचार करे, जेरो परचार हामु नी कर्‌या नीते कुय अळी आत्‌मा तुहुंंक जड़ी; जे पेहल नी जड़लो हतलो; नीते अळी कुय खुस-खबर सामळी तीनाक तुहुंं पेहल नी मानतेला, ती तुहुंं हीनाक सेण करनु वारु रवतो।

5 मे ते समजो, की मे काहाली वात मां मटा सी मटा नेवताळान काम सी कम नी हय। 6 कदी तुहुंंक असो लागे की मारे वाटे तींद्‌रेन तसों वारु बुलनेन हुसारी नी हय, तेबी अक्‌कल मां नी; बाकुन हामु हीनाक आखी वातेन तरा सी तुंद्‌रे वाटे देखाव पाड़ देय।

7 काय हेरेमां मे काय पाप कर्‌यु; की मे तुहुंंक भगवानेन खुस-खबर पयस्‌या लेय पाखुर सामळावो; ने आपणे आप काजे नेचु कर्‌यु, की तुहुंं उचा हय जावु? 8 मे दीसरी मंडळी काजे लुट्‌यु मतलब मे हींद्‌री दाहड़की लेदु, काहाकी तुंद्‌री चाकरी करो। 9 ने जत्‌यार मे तुंद्‌रे साते हतलु, ने मेसे कमी हवी, ती मे काहाला पर बी भार नी नाख्‌यु, काहाकी भायसे, मकीदुनीया सी आवीन मारी कमी काजे पुरा कर्‌या; ने मे हरीक वात मां आपणे आप काजे तुंद्‌रे पर भार बन्‌ने सी रुक्‌यु, ने रुकीन रवीस। 10 कदी मसीन छाचाय मारे मां छे, ती अखाया नावेन देस मां कुय मेसे हीनी मटाय सी नी रुकसे। 11 असो काहा? काय असु करीन की मे तुंद्‌रे सी परम नी राखो? भगवान ज जाणे की मे परम राखो।

12 बाकुन जो मे करो, चोन करतु रवीस; की जे माणसे दावु हेरे, हीनुक मे दावु नी जड़ने दम, काहाकी जीनी वात मां चे मटाय करजे हेरे मां जे हामरेन तसा ठेरे। 13 काहाकी असा माणसे लुच्‌चा नेवताळान काम छे, ने धुका सी काम करने वाळा छे, ने मसीन नेवताळान सीकु धरणे वाळा छे। 14 जी काय उसकारनेन वात नी काहाकी भुतड़ु आपसु बी बेसकु जबर वीजाळो सरग वाळा काहवाळ्‌यान सीकु धरे। 15 हेरेसी कदी हेरा पावर्‌या बी धरमेन चाकर्‌यान सीकु धरे, ती कुय मटी वात नी हय, बाकुन हींद्‌रो आकरी हींद्‌रे कामेन अनसारे हवसे।

नेवताळान सीका मां पोलुसेन दुख भुकत्‌णु

16 मे अळी कवो, की मेसे डेड़-अकल्‌या नी समजे; नीते डेड़ अकल्‌यु समजीन मारी वात सेण कर लेवु, काहाकी थुड़ीक मे बी मटाय कर सको। 17 ईनी गांडान तसों मटाय मां जो काय मे कहो चो मालीकेन हुकुमेन अनसारे नी बाकुन मानु डेड़ अक्‌कल सी कवो। 18 जत्‌यार की बेसका माणसेन डीलेन अनसारे मटाय करजे, ती मे बी मटाय करीस। 19 तुहुंं ते समजदार हयन खुसी सी डेड़-अकल्‌यान सेण कर लेवु। 20 काहाकी जत्‌यार तुहुंंक कुय पावर्‌यु बणाय लेय, नीते खाय जाय, नीते फसाण देय, नीते आपणे आप काजे मट्‌लु बणावे। नीते तुंद्‌रे मुंहडा पर थापड़ देय, ती तुहुंं सेण कर लेवु। 21 हामु तुंद्‌रे साते तींद्‌रेन तसा वेहवार नी कर्‌या ने, कमजुर बण्‌या करीन सरमायणु चाहजे काय? कदी नी।

बाकुन चे माणसे ते मटाय करने मां हिम्‌मत कर र्‌या; हेरसी मे बी मटाय करने मां हिम्‌मत करो, भले मारी मटाय करने गांडाय लागे। 22 काय चे ईब्‌रानीयो छे? मे बी छे; काय चे ईस्‌रायली छे? मे बी छे काय चे अब्‌राहमेन खानदानी छे? मे बी छे। 23 काय चेत मसीन चाकर्‌यु छे? मे गांडान तसु कवे मे बी छे मे हींद्‌रे सी बड़ीन छे जादास मेहनत*11:23 मेहनत परिश्रम करने मां; अळीन अळी जेल मां; सड़ापान मार खाणे मां; अळी-अळी मरतु बचणे मां। 24 पांच कावा मे यहुदीयान हात सी उंचालीस-उंचालीस सड़ापा खादु। 25 तीन कावा मेसे सुट्‌ये करीन देदा; एक कावा मेसे दगड़ाट्‌या*11:25 दगड़ाट्‌या पत्थराव; तीन कावा ढंड्‌या तींद्‌रे पर मेसे चड़ावला हतला, टुटी गुयु; एक रात ने एक दाहड़ु मे समुदर मां काट्‌यु। 26 मे अळी-अळी चालने मां; नदीन खतरा मां; चुट्‌टान खतरा मां; आपणे जातीवाळान खतरा मां; नी-यहुदीयान खतरा मां; जंगलेन खतरा मां; समुदरेन खतरा मां; लुच्‌चा भायसेन ईचमां खतरा मां रवु; 27 मेहनत ने थकान मां; अळी-अळी जागतु रवणे मां; भुक-पीस मां; अळी-अळीन उपास करने मां; सेळा मां; उघाड़ु रहणे मां। 28 दीसरी वात काजे छुड़ीन जेरो नाप मे नी करतु आखी मंडळीन फीकुर दाहड़ीन मेसे दड़पे। 29 कुणीन लुल्‌गाय सी मे लुलु नी हवो, कुणीन पाप मां पड़ने सी मारु जीव नी दुखे।

30 कदी मटाय करनु जरुड़ी छे, ती मे आपणी लुल्‌गायपन वात पर मटाय करो। 31 मालीक ईसुन भगवानेन ने बास जु जलम बेसको वारु छे, जाणो, की मे लुच्‌चाय नी मेलो। 32 दमीस्‌क मां अरीतास राजा भीणी सी जे हकदार्‌या हतला, हयु मेसे धरने करीन दमीस्‌क वाळा सहर पर राखवाळ्‌यु बठाड़ी रवला। 33 ने मेसे चारली मां बठाड़ीन खीड़की मां सी भीतड़ा पर सी उतार देदा, ने हेरे हात सी बची गुयु।