10 पोलुस ज जागतो सपनो देख लेदु ने अळतेन हामु मकीदुनीया मां ज समजीन जाणे हींडतेला की भगवान हामु काजे खुस-खबर सामळावणे करीन मकेलु छे।
फीलीपी सहर मां लुदीया नावेन बायरीन जीवन बदले
11 तरोआस सी हामु मटला ढंड्या मां बठीन सुदा सुमात्रावे आया चांहा सी दीसरे दाहड़े नीयापुलीस मां आया 12 ने हामु नीयापुलीस सहर सी, चालीन फीलीपी सहरेम पुग्या, जो मकीदुनीया जीलान खास सहर छे, चां रोमी राजवाड़ान खास माणसे रवे, ने हामु ईतराक दाहड़ा चां रया। 13 यहुदी माणसेन आरामेन दाहड़े हामु ज समजीन सहरेम बारनो एणकीन सहर सी बाहरा नदी धड़े आया की चांहा यहुदी माणसे वाटे काहनो दुवा करनेन घर हसे ने चां पुगीन हामु चां भेळा हय रवला ईतराक बायरा धड़े वात करने बाजी गुया। 14 तीनु बायरा भेळी लुदीया नावेन एक थुवातीरा सहरेन एक बायर हतली ची जामण्या पुथल्या वेचणी हतली ने भगवानेन भक्ती करनी हतली पोलुसेन वात मन लागाड़ीन सामळने बाजी रवली ने मालीक ईसु तेरो मन उघाड़ देदु। 15 ने ची ईसु पर भुरसु करीन आपसा घर बार्या भेळी पाणी मां बपतीस्मा लेदी ने हामु काजे लीलघाय्न कय की कदी तुहुंं मेसे काजे मालीक भगवानेन भक्ती करन्या समजी र्या हय ती मारे घर चालु ने मारे घर रवजु ने ची हामु काजे मानाड़ीन ली गुय।
पोलुस ने सीलास काजे धरीन जेल मां नाखे
16 जत्यार हामु एक दाहड़े दुवा करने घर मां जाणे बाजी रवला ती हामु काजे एक जुवान गुलाम पावरनी भेळी हयी तीनी मां हवणे वाळी वात कहण्यु भुतड़ु भराय रवलु ने ची तीना भुतड़ान साहरे माणसे काजे हवणे वाळी वात देखाड़ तेली ने तेरा मालक्या वाटे बेसका पयस्या कमाय लेतली। 17 ची पोलुस ने हामरे पछळ-पछळ आवीन आयड़ती जाय्न कह्वी जे माणसे आखा मां रवण्या भगवानेन चाकर्या छे ने तुहुंं काजे छुटकारान खबर सामळावे।
/images/a/6c03efee-c76a-4ab8-fe2e-555683f90900)
/images/a/9ec55bb8-7dc5-47b9-c32a-98aea1c00300)