1 अब्‌राहम एक अळी बायर सी ईयाव कर्‌यु, तेरो नाव कतुरा हतलो। 2 ची जीमरान, योकसान, मदना, मीद्‌यान, यीसबाक, ने सुह काजे पयदा करी। 3 योकसान सी सबा ने ददान हया; ने ददानेन अवल्‌यात अस्‌सुरी, लतुसी ने लम्‌मी माणसे हया। 4 मीद्‌यानेन पुर्‌या एपा, एपेर, हनोक, अबीदा ने एलदाह हतला। जे आखा कतुरान अवल्‌यात हतला।

5 अब्‌राहम आपसान आखो-काय इसाक काजे सुप देदु। 6 बाकुन आपसान पावरनीन पुर्‌या काजे काही-काहींन दीन आपसान जीवते रवतात आपसा पुर्‌याक इसाक धड़े सी अखण वाळा देस मां मकली देदु।

7 जत्‌यार अब्‌राहमेन एक सव ने सत्‌तर ने पांच साल हया 8 अळतेन अब्‌राहम डाहलु हयन मर गुयु। ने चु तेरा आड़ा-बुड़ा मां जाय्‌न भेसकाय गुयु। 9 तेरा पुर्‌या इसाक ने इस्‌माएल ने हीत्‌ती सोवरेन पुर्‌यु एपरोनमेन मम्‌रे नावेन जागान अगळ वाळु जागा मां, जु मकपेला दर हतलु, चां तीनाक गाड़्‌या; 10 अब्‌राहम जु जागु हीत्‌या माणसे सी मुल लेदलु। तीना जागा आपसी घरवाळी सारा काजे गाड़्‌ला चां अब्‌राहम काजे बी गाड़्‌या। 11 भगवान अब्‌राहमेन मरनेन पछेन मां तेरा पुर्‌या काजे संयबरकत आप्‌यु। इसाक लहेरोई नावेन कुवा धड़े रहणे लाग्‌यु। 12 अब्‌राहमेन पुर्‌यु इस्‌माएलेन अवल्‌यात, जो सारान मीसर वाळी पावरनी हाजीरा सी पयदा हवली, तेरी जी अवल्‌यात छे।

13 इस्‌माएलेन पुर्‌यान नाव ने अवल्‌यात ज्‌य छे: मतलब इस्‌माएलेन पेहलु पुर्‌यु नबायोत, अळतेन केदार, अदबेल, मीबसाम, 14 मीसमा, दुमा, मस्‌सा, 15 हदद, तेमा, यतुर, नापीस ने केदमा नावेन पुर्‌यु हतला। 16 जेत इस्‌माएलेन पुर्‌या हतला। हींद्‌रा नावेन तसा तींद्‌रा गावेन पड़ावान नाव बी पाड़्‌या। जेत बारहे आपणा-आपणा कुळीन मुखी बण्‌या। 17 इस्‌माएलेन एक सोव ने संयतीस सालेन हया; तत्‌यार चु तेरा जीवेक छुड़ीन जात र्‌यु, ने तींद्‌रा मरला माणसे मां भेसकाय ज्‌यु। 18 ने तेरा अवल्‌यात हवीला सी सुर तक, चो मीसर देस अगळ असीरीयान वाट पर छे, चां वस ज्‌या; ने तींद्‌रा भाय बेटा आखा आंग्‌ये हयन छेटे वसणे लाग्‌या।

19 अब्‌राहमेन पुर्‌यु इसाकेन अवल्‌यात जी छे: अब्‌राहम सी इसाक हयु; 20 ने इसाक जत्‌यार चालीस सालेन हयु तत्‌यार रीबकान पयदावारी हय, जी पद्‌दनराम मां रहणे वाळी, अराम्‌या बतुएलेन पुरे, ने अरामी लाबानेन बहणीस हतली, तेर सी ईयाव कर लेदु। 21 इसाकेन घरवाळी ते आंझी हतली, तेरेमां चु यहोवा सी दुवा कर्‌यु ने यहोवा तेरी दुवा काजे सामळ्‌यु, ने ची रीबका भार पाये हय। 22 तीनीन जवळ्‌या पुर्‌या हवणे वाळा हतला तेर सी पेहल चे दुयु पेटेत मां लड़ायणी बाजी ज्‌या। ची रीबका कय, कदी असोत हवतो रवसे ती मे कसी जीवीस? तेरेमां ची यहोवा सी पुछणे लागी।

23 तत्‌यार यहोवा तीनीक कह्‌यु,

"तारा पेट मां दुय जात्‌या छे,

ने तारी कुख सी नीकळतात दुय जातीन माणसे मां अलग-अलग रवसे,

ने एक जातीन माणसे दुसरी जातीन माणसे सी बेसका ताकुत वाळा रवसे,

ने मट्‌लु पुर्‌यु नानला पुर्‌यान सेवा करसे।"

24 जत्‌यार तेरा पुर्‌या हवणेन टेम आय गुय, तत्‌यार मालम पड़्‌यो की तेरा पेट मां जवळ्‌या पुर्‌या छे। 25 पेहलु पयदा हयु चु रातलु हयु ने तेरो डील चादरान तसों कान्‌यावाळो हतलो, तेरेमां तेरो नाव एसाव पाड़्‌यु। 26 अळतेन तेरु भाय तेरा भायसेन हात सी एसावेन अड़ी धरीन हयु; ने तेरो नाव याकुब पाड़्‌यु। जत्‌यार रीबका सी जे पयदा हया ती इसाक साठ सालेन हतलु।

27 अळतेन चे पुर्‌या मटा हवणे लाग्‌या ने एसाव ते जंगल मां रय्‌न सीकार करने वाळु बण ज्‌यु, बाकुन याकुब सुदु माणुस हतलु, ने तम्‌बु बणाय रया करतेलु। 28 इसाक एसाव लावे चो मास खाया करतेलु, तेरेमां चु एसाव सी परम करतेलु बाकुन रीबका याकुब सी परम करतेली।

29 एक दाहड़े याकुब खाणे करीन दाळ बणावतेलु; ने एसाव जंगल सी हार पड़लु आयु। 30 तत्‌यार एसाव याकुब सी कह्‌यु, "जी रातली दाळ छे मेसेक खावाड़, काहाकी मे हार पड़लु छे।" तेरेमां तेरो नाव एदोम पड़्‌यो।

31 याकुब कह्‌यु, "तारु पेहलु खुळ्‌यु पुर्‌यु हवणेन हक मेसेक आप दे।"

32 एसाव कह्‌यु, देख मे मरने वाळु छे, तेरेमां हक आपणे सी मारु काय फायदु हवसे ?

33 याकुब कह्‌यु, "मार सी अबी सगुन खा," तेरेमां एसाव तेर सी सगुन खादु,

ने तीनाक तारु पेहलु खुळ्‌यु पुर्‌यु हवणेन हक आपीन वेच दे। 34 तेर पछेन याकुब एसाव काजे रुटा ने बणावली रातली दाळ आप्‌यु, ने चु खादु पीदु, तत्‌यार उठीन जाती र्‌यु। तसु करीन एसाव आपसान पेहलु खुळ्‌यु पुर्‌यु हवणेन हक काजे फालतु समज्‌यु।