1 सीनार देसेन राजा अमराफेल, एल्‌लसार देसेन राजु आरीओक, एलाम देसेन राजु कदोरलामोर ने गोयीम देसेन राजु तीवालेन, हींद्‌रा दाहड़ा मां असो हयो, 2 की जे सदोम देसेन राजु बेरु, ने अमोरा देसेन राजु बीरसा ने अदमा देसेन राजु सीनाब, ने सबोयीम देसेन राजु सेमेबेर ने बेला देसेन राजु, बेला देसेन दीसरो नाव सोवर हतलो, हींद्‌रे साते लड़ाय कर्‌या। 3 जे पांचु एक हय्‌न सीद्‌दीम खयड़ा मां भेळा रया, चो सीद्‌दीम आज खारलो दर्‌यो छे। 4 बारे साल लग ते जे कदोरलामोर राजान हक मां रया, बाकुन तेरा साल मां तीनु राजा सी लड़ाय कर पड़्‌या। 5 जत्‌यार चवदा साल हय ज्‌या ती कदोरलामोर ने तेरा साते वाळा राजा आवीन असतेरोथ मां रापाया जात्‌या काजे, ने हाम मां जुजीया जात्‌या काजे, ने साबेकीर्‌यातेम मां एमीया जात्‌या काजे। 6 ने सेईर नावेन बयड़ा मां होरी जाती काजे मारता-मारता तीना एल्‌पारा लग पुग ज्‌या, ने चो तीना उजाड़्‌या बयड़ा मां छे। 7 चां सी पछा फीरीन एनमीसपात मां आया, जो कादेस बी कहवाये, ने अमालेकी जातीन पुरा देस काजे, ने तीनु एमोरीया देस मां रहणे वाळा काजे बी जीक लेदु, जे हसासोन्‌तामार मां रवतेला।

8 तत्‌यार सदोम, अमोरा, अदमा, सबोयीम ने बेला जो सोवर बी कहवाये, ईनु देसेन राजा बाहर नीकळी ज्‌या ने जे तीना सीद्‌दीम खयड़ा मां तीनु च्‌यार राजा साते लड़ाय पड़्‌या। 9 जी लड़ाय एलाम देसेन राजु कदोरलामोर, गोयीम देसेन राजु तीदाल, सीनार देसेन राजु अमराफेल ने एल्‌लसार देसेन राजु आरीओक- जे च्‌यार राजा तीनु पांच राजा सी लड़ी रहला। 10 सीदीम खयड़ा मां काळ्‌ळा धुळा सी भरला खाडात-खाडा हतला; जत्‌यार सदोम ने अमोरा देसेन राजा लड़ाय सी ढासता-ढासता थुड़ाक माणसे गड्‌डा मां हीट पड़्‌या, ने जे बची रवला चे बयड़ा मां ढासी ज्‌या। 11 तत्‌यार च्‌यारु राजा सदोम ने अमोरा देस सी आखो धन ने आखो खाणेन चीजेक लुटी-पाटीन ली जाती र्‌या। 12 चे सदोम मां रहण्‌या अब्‌रामेन भतरजास लुत काजे ने तेरो आखो धन भेळेत ली जाती र्‌या।

13 ने जत्‌यार लड़ायतेला तत्‌यार एक जणु ढासीन ईब्‌री जातीन अब्‌राम काजे जी वात बताड़ देदु, अब्‌राम ते मम्‌रे नावेन माणुस हतलु चु एक एमोरी जातीन हतलु, ने बांज नावेन चुखला झाड़कान चां तम्‌बु ताणीन रवतेलु ने मम्‌रे, एसकोल ने आनेरेन भाय हतलु, ने जे अब्‌राम सी बुली बांद्‌ला हतला। 14 जत्‌यार अब्‌राम काजे असो मालम हयो, लुत काजे चे बांदी लेदा, ती चु तेरा आखा कुटुम काजे भेळा कर्‌यु, ने तीन सोव अठ्‌ठारे जणा जे लड़ाय करने करीन वारु सीकला हतला, तीनुक लीन दान नावेन जागे लग पछळुत पड़ला। 15 रात्‌ये अब्‌राम आपसा माणसे काजे तींद्‌रे सी लड़ाय करने करीन वाट देदु ने अब्‌राम ने अळी तेरा चाकर्‌या भेसकायन तीनुक हाराय देदु ने तींद्‌रा दमीस्‌क सहरेन धुराव भीणी होबा नावेन जागे लग पछळ पड़्‌या। 16 अब्‌राम तीनु माणसे सी आखो चीज पछु मांग लेदु ने लुत काजे ने तेरा आखा माणसे ने तींद्‌रो धन बी तींद्‌रे सी हापकी लेदु।

17 जत्‌यार अब्‌राम कदोरलामोर ने तेर साते वाळा राजा काजे हाराय्‌न पछु आवतेलु, तत्‌यार सदोम देसेन राजु, सावेन नावेन खयड़ा मां अब्‌राम सी भेळु हवणे करीन आयु, सावे काजे हंय राजान खयड़ो कहे। 18 सालेम सहरेन राजु मेलकीजेदेक, जु आखान हकदार्‌या भगवानेन पुजारु हतलु, चु अब्‌राम वाटे रुटा ने अंगुरेन रस लायु।✝ 19 ने अब्‌राम काजे संय बरकत आप्‌तु जाय्‌न कह्‌यु, "सरग ने धरती काजे बणावणे वाळा, आखान हकदार्‌या भगवान भीणी सी तुसेक संय बरकत जड़े। 20 ने संयबरकत वाळु छे, आखान हकदार्‌यु भगवान, जु तारा वेरी काजे हारावणे मां मदत कर देदु।" तत्‌यार अब्‌राम मलकीसीदक काजे आखाम सी दसवु हीस्‌सु आप्‌यु।

21 तत्‌यार सदोम देसेन राजु अब्‌राम सी कह्‌यु, "मेसे माणसे आप दे ने दीसरो आखो धन तु राख ले।"

22 सदोम देसेन राजाक अब्‌राम जपाप आप्‌यु, "मे सरग ने धरतीन हकदार्‌या यहोवा भगवान अगळ सगुन खाय र्‌यु। 23 की मे तारा चीज मां सी बी चीज ने अतरो बी की एक दुरु ने खासड़ान बंद लग नी लम, काहाकी ईनु चीजेक देखीन तु असु नी कय पड़े की ‘मे अब्‌राम काजे मालदार बणायु।’ 24 मे तार सी कायनी लम, बाकुन खाणो अतरोत, तीनाक मारा माणसे खाय लेदला छे, ने तींद्‌रु हीस्‌सु; जु मारे साते गुयला, मतलब आनेर, एसकोल, ने मम्‌रेन हीस्‌सु, मे तुसेक नी आपो, तीनुक चे आपसा-आपसा हीस्‌साक राख लेय।"