1 भगवान नुहान ने जतरा बी बयड़ाम रहण्‌या जीव-जानवर्‌या ने घर पाळन्‌या जीव-जानवर्‌या नुह भेळे ढंड्‌याम हतला तीनु आखाक नी वीसरी तेरेमां भगवान धरती पर वाहळी छुड़्‌यु ती पाणी आटणे लाग्‌यो। 2 ने उंडा दरीयान झीरेन उकाळा ने सरगेन पाणीन बारना देवाय ज्‌या ने मुसळ-धार्‌यु पाणी हीट ज्‌यु। 3 ने एक सोव पचास दाहड़ा वीत ज्‌या ती धरती पर पाणी आटणे लाग ज्‌यो। 4 ती सालेन सातवे महनान सतरे तारीक ढंड्‌यो अरारत नावेन बयड़ा पर टेक ज्‌यो। 5 ने दसवा महना लग पाणी कम हवतु गुयो, ने दसवे महनान पेहले दाहड़े बयड़ान चट्‌या देखाव पड़्‌या।

6 ने जत्‌यार चाळीस दाहड़ा हय ज्‌या ती नुह ढंड्‌यान खीड़की उघाड़्‌यु, 7 ने एक कागळाक उडाड़ देदु, ने जत्‌यार लग पाणी धरती परुन सुक्‌यो नी तत्‌यार लग कागळु अथुन-अथु फीरतु रह्‌यु। 8 पछेन अळी आपसा धड़े सी एक पेरवा काजे बी उडाड़ीन देख्‌यु की पाणी कम हय ज्‌यो की नी। 9 ती तीना पेरवा काजे पाय मेकणेन काय जागु नी जड़्‌यु ती ची पछीत नुह धड़े आय गुय, काहाकी आखी धरती पर पाणीत सी भरलो हतलो तत्‌यार चु तीनीक अघु हात करीन आपसा ढंड्‌याम भर लेदु। 10 तत्‌यार अळी नुह सात दाहड़ा लग थुब्‌यु ने अळी पछु तीना पेरवा काजे ढंड्‌याम सी उडाड़ देदु। 11 ती चु पेरवु सांती वेळाय पछी तेर धड़े आय गुय, ने ची आपसी मुंहडाम जेतुन नावेन झाड़कान एक ताब्‌लु पालु लीन आय, तेरेसी नुह जाण लेदु की पाणी धरती पर उस्‌टी गुयो। 12 पछेन अळी हयु सात दाहड़ा लग वाट देखीन तीनात पेरवाक उडाड़्‌यु ने ची पछी कदी नी आवी।

13 ने जत्‌यार नुहान उमर छव सोव एक सालेन पेहला महनान पेहले दाहड़े पाणी धरती पर उस्‌टीन सुक गुय तत्‌यार नुह ढंड्‌यान छत उघाड़ीन देख्‌यु ती असो देख्‌यु की धरती परुन पाणी उस्‌टीन सुक गुय। 14 ने दुसरा महनान सत्‌तावीस तारीक धरती पुरी सुक गुय।

15 तत्‌यार भगवान नुह काजे असु कह्‌यु, 16 "तु आपसा पुर्‌या, बायर ने उहड़ीस काजे लीन भेळात ढंड्‌याम सी नीकळी आव। 17 ने आखा चिरला ने आखा जानवर्‌या ने आखा भातेन धरती पर घीसड़ायन चालन्‌या जीवतेला जानवर्‌या तार धड़े छे, तीनु आखा काजे तार भेळे उतारीन नेचु ली आव काहाकी धरती पर तींद्‌रे सी अदुस अवल्‌यात पयदा हय जाय, ने चे आखी धरती पर छावाय जाय।" 18 तत्‌यार नुह ने आपसा पुर्‌या ने आपसान बायर ने उहड़ीस नीकळीन आय ज्‌या। 19 ने आखा चार पाया, घीसड़ायन चालन्‌या जानवर्‌या ने चिरला ने जतरा बी जीव-जानवर्‌या धरती पर चाले-फीरे, तीनु आखी जातेन ने जुड़ा भेळे ढंड्‌याम सी नीकळी आया।

20 तत्‌यार नुह यहोवा भगवान वाटे एक दगड़ान चड़ावान जागु बणायु, ने आखा चुखला जानवर्‌या ने आखा चुखला चिरला माय्‌न थुड़ाक काजे नेवाड़्‌यु ने मारीन तीना चड़ावान जागा पर बाळीन चड़ावु चड़ायु।✝ 21 तेरेमां यहोवा भगवान तीना बाळीन चड़ावाक वारलु गंधीन वीच्‌यार कर्‌यु की, "माणसेन वजे सी मे पछेन अळी कदी नी धरती काजे सराप आपो, कदी माणसेन मन मां पयदावारी सी ज काय नीकळे चो भुंड्‌लो वीच्‌यार रहे, तेबी जसु मे हंय आखा जीव-जानवर्‌याक पाणीम डुबाड़ीन मार्‌यु तसु तीनुक असु कबी नी मारो। 22 हंय सी जत्‌यार लग धरती रवसे, तत्‌यार लग वेरनेन ने काटणेन टेम, सींग ने सीयाळु ने तप ने उंडाळु ने रात ने दाहड़ु हवतु रवसे।"