उबजाणनी किताप 42

युसुफेन भायसे काजे मीसरे देस मां दाणा लेणे आवणु

1 तीने टेमे युसुफेन बास याकुब रवतेलु चां बी काळ पड़ने बाजी रहलु। याकुब सामळ्‌यु की, मीसर देस मां दाणा मुल जड़े, ती चु आपसा पुर्‌या काजे कह्‌यु, "तुहुंं आखान-आखा मुंहडे हात लागाड़ीन काहा बस र्‌या? 2 मे सामेळ्‌ळु छे की, मीसर देस मां दाणा मुल जड़ने बाजी रया। तेरेमां चां जाय्‌न आपणे वाटे दाणा मुल ली आवु, तत्‌यार आपणु भुकला नी मरजे।" 3 असो सामळीन युसुफेन दस भायस मीसर देस मां दाणा लेणे गुया। 4 बाकुन याकुब युसुफेन नानला भायस बीन्‌यामीन काजे तींद्‌रे पुठ्‌ये नी मकल्‌यु। याकुब बीहतेलु की, बीन्‌यामीन बी काय माय्‌न काय हय जासे।

5 कनान देस मां आखे दुर बेसकु काळ पड़ रहलु; तेरेमां दीसरा माणसे बी मीसर देस मां दाणा मुल लेणे गुया। तींद्‌रे पुठ्‌ये इस्‌राएल्‌यान पुर्‌या बी दाणा मुल लेणे गुया। 6 युसुफ मीसर देसेन हकदार्‌यान मंत्‌री हतलु, तेरेमां आखा देसेन माणसे काजे युसुफ अतरुत दाणा वेचतेलु। ने युसुफेन भायस युसुफेन चां गुया ने युसुफ काजे ढंगा वळीन पाये पड़्‌या। 7 युसुफ आपसा भायस काजे उळखी ते लेदु, बाकुन चु तींद्‌रे अगळ अंजाणलु बणीन काठाये पुछ्‌यु, "तुहुंं कां सी आवला छे?"

चे युसुफ काजे जपाप आप्‌या, "हामु कनान देस मां सी दाणा मुल लेणे आवला छे।"

8 युसुफ ते आपसा भास्‌यो काजे उळखी लेदलु, बाकुन तेरा भायस युसुफ काजे नी उळख्‌या। 9 तत्‌यार युसुफ काजे चो सपनो हेर आयो, जो सपनो चु आपसा भायसेन बारामां देखलु; ने चु तीनुक कह्‌यु, "तुहुंं ईना देसेन काहवाळ्‌या बणीन आवला छे, ने ईना देसेन लुलखाय देखणे आवला छे।"

10 युसुफेन भायस युसुफ काजे कह्‌या, "नी-नी, हामरा मालीक असी वात नी हय, हामु ते तारा गुलाम पावर्‌या छे, ने दाणा मुल लेणे आवला छे। 11 हामु आखा एकुत बासेन पुर्‌या छे, ने हामु ते ईमानदार माणसे छे। हामु तारा गुलाम पावर्‌या छे, ने हामु ईना देसेन लुलखाय देखणे नी आया।"

12 युसुफ तीनु काजे कह्‌यु, "नी-नी, तुहुंं झुट मेक र्‌या, तुहुंं ते ईना देसेन लुलगाय देखणेत आवला छे।"

13 चे कह्‌या, "हामु ते तारा गुलाम पावर्‌या छे, ने कनान देस मां रहण्‌या एकुत बासेन बारे पुर्‌या छे, एक भायस मर गुयलु, ने छेंडलु भायस बास पुठ्‌ये घर छे।"

14 युसुफ तीनुक कह्‌यु, "तुहुंं ते काहवाळ्‌यात छे। जी वात ते मे तुहुंंक पेहलुन कय देदलु अळी काय? 15 राजा फीरोनेन सगुन खाय्‌न मे तुहुंं काजे कहों की, तुहुंं काजे पारेखणुत पड़से; जत्‌यार लगुन तुंद्‌रु नानलु भायस जां नी आवे, तत्‌यार लगुन मे तुहुंंक नी छुड़ो। 16 तेरेमां तुंद्‌रा नानला भायस काजे लेणे करीन तुंद्‌रे माय्‌न एक जणा काजे मकली देवु। ने मे तुहुंं काजे छाचला ने झुटला पारखी नी लम ती लग दीसरा काजे, मारा जेलेत मां रहणु पड़से। कांखुर माय्‌न तुहुंं छाचला नी नीकळ्‌या, ती मे फीरोन राजान सगुन खाय्‌न कहों की, तुहुंं देसेन काहवाळ्‌यात कवायसु।" 17 अळतेन युसुफ तीनु काजे तीन दाहड़ा लग जेल मां कुंडाड़ देदु।

18 तीन दाहड़ा हय ज्‌या ने अळतेन युसुफ तीनु काजे कह्‌यु, "मे भगवानेन बीहाणो मानीन जीवण्‌यु माणुस छे; ने जो काय मे तुहुंंक कहों, चत करु; ती तुहुंं जीवतेला रवसु। 19 कदीक तुहुंं ईमानदार माणसे हय, ती तुंद्‌रे माय्‌न एक जणु ईनी जेल मां रहु, ने दीसरा, भुकला घरन्‌या वाटे अन लीन घर जावु। 20 ने तुंद्‌रा छेंडेला भायस काजे मारेन्‌चां लावु; तत्‌यार तुहुंं छाचला कवायसु, ने तुहुंं मुत सी बची जासु।"

अळतेन चे युसुफ कह्‌यु तसात कर्‌या। 21 चे आपसा-आपसात कहणे बाजी ज्‌या, "छाचलीन आपणु आपणा भाय पर कुहराय करला, तेरेमां हंय आपणुक डंड जड़ र्‌यु। चु बेसकु दुख मां कलेपतु जाय्‌न लीलघाय करलु, तेबी आपणु तेरी नी सामळ्‌या। ने हंय आपणु बी दुख मां पड़ र्‌या, ने लीलघाय कर र्‌या।"

22 रुबेन तीनुक कह्‌यु, "मे तुहुंंक कहलु ते खरु की, तुहुंं हेरे पर मां कुहरायु, बाकुन तुहुंं मारी सामळ्‌या नी। तेरेमां तुहुंंक तेरा खुनेन बदलु जड़ र्‌यु।" 23 युसुफ दुय बुली समजण्‌या काजे तींद्‌रे साते वात करने करीन कामे लागाड़ रहलु, ने युसुफेन भायस असा समज्‌या की, युसुफ हामरी बुली नी जाणतु हसे। बाकुन युसुफ ते चे कहे, चो आखो समजतेलु। 24 अळतेन युसुफ तींद्‌रेन्‌चां सी एक धड़े जाय्‌न रड़ने बाजी ज्‌यु; ने थुड़ीक वार मां पछु आवीन तींद्‌रे साते वात कर्‌यु, ने सीमोन काजे नेवाड़ीन तींद्‌रे देखेतात तीनाक जेल मां कुंड देदु।

युसुफेन भायसे कनान देस मां पछा आवे

25 अळतेन युसुफ थुड़ाक पावर्‌या काजे हुकुम आप्‌यु की, "तुहुंं तींद्‌रा थयला मां दाणा भर देवु, ने तींद्‌रा एकेक थयला मां तींद्‌रा पयस्‌या पछा भर देवु। ने वाट्‌ये वाटे खाणो बी बांद देवु।" ने चे, जसु युसुफ कह्‌यु तसात कर्‌या। 26 अळतेन चे भायस आपसा-आपसा गदड़ा पर ने भरला थयला मेकीन चां सी आपसा घर भीणी चाल पड़्‌या। 27 वाट्‌ये धरम-साहळा मां, चे रात काट्‌या, ने एक जणु गदड़ाक चारु आपणे करीन थयलु छुड़्‌यु, ती थयलान मुंहडे पर रुप्‌या देख्‌यु। 28 ती चु आपसा भायसे काजे कह्‌यु, "देखु, मारा पयस्‌या ते मारा थयला मां पछा भरला छे।" असो सामळीन चे आखा बीह ज्‌या, ने तींद्‌रु चट्‌ये जीव जात र्‌यु। ने एक-दीसराक कह्‌या, "भगवान हामरे साते असो काहा हवणी दी र्‌यु हसे?"

29 ने युसुफेन भायस घर आवीन आखी वात आपसा बास काजे असा देखाड़्‌या: 30 "जु माणुस तीना देसेन मालीक छे, चु हामरे साते काठाय करीन असु कह्‌यु तुहुंं ईना देसेन काहवाळ्‌या बणीन आय र्‌या। 31 ती हामु तीनाक कह्‌या, हामु ईमानदार माणसे छे, हामु ईना देसेन काहवाळ्‌या बणीन नी आया। 32 हामु एकुत बासेन बारे पुर्‌या छे, बाकुन एक जणु मर गुयलु, ने आखान छेंडेलु कनान देस मां हामरा बासेन्‌चां छे।" 33 तत्‌यार चु हामुक कह्‌यु, "कदीक तुहुंं ईमानदार माणसे हय, ती तुंद्‌रे माय्‌न एक जणु ईनी जेल मां रहु, ने दीसरा, भुकला घरन्‌या वाटे दाणा लीन घर जावु। 34 ने तुंद्‌रा छेंडेला भायस काजे मारेन्‌चां लावु। ती मेसेक भुरसु आवसे की, तुहुंं काहवाळ्‌या माणसे नी हय। ने ईमानदार छे। अळतेन मे तुंद्‌रा भायस काजे पछु आप दीस, ने तुहुंं ईना देस मां लेणु-देणु कर सक्‌सु।"

35 जो काय दीन आखा भायस आपसा-आपसा थयला मां सी दाणा नीकाळ्‌ने बाजी ज्‌या। तत्‌यार तीनु काजे तींद्‌रा थयला मां रुप्‌यान एकेक थयलि देखाव पड़ी: तत्‌यार रुप्‌यान थयलि देखीन, चे ने तींद्‌रु बास बेसका बीही ज्‌या। 36 तत्‌यार तींद्‌रु बास याकुब तीनु काजे कह्‌यु, "तुहुंं ते मेसेक बीना अवल्‌यातेन तसा कर देदा, सामळु, युसुफ ते जाती र्‌यु, ने सीमोन बी नी हय, ने तुहुंं बीन्‌यामीन काजे बी ली जाणे हींडे: जी आखी गरा मारेत पर आय पड़ली छे।"

37 रुबेन आपसा बास याकुब काजे कह्‌यु, "कदीक मे बीन्‌यामीन काजे तारेन्‌चां नी लावो, ती तु मारा दुयु पुर्‌या काजे मार नाखजी। बीन्‌यामीन काजे मारे पुठ्‌ये मकली दे, मे हीनाक पछु ली आवीस।"

38 बाकुन याकुब कह्‌यु, "मे मारा पुर्‌या बीन्‌यामीन काजे तारे पुठ्‌ये नी मकलो, काहाकी हेरु भायस ते मर गुयु, ने हयु एखलुत रय गुयलु छे: ने कांखुर माय्‌न वाट्‌ये जाता-जाता तुंद्‌रे पर काहनीस गरा आय पड़से, ती तुंद्‌रे वाट्‌ये मे डाहवारा मां रड़तु कलेपतु मर जायस ने तुहुंं मेसे अघे कर देसु।"