1 युसुफ आपसा बासेन धड़ पर आड़ा पड़ीन ढळो-ढळो ने फुको-फुको रड़्‌यु, ने तीना धड़ेन गुळु देदु। 2 अळतेन युसुफ दाक्‌तर्‌याम ने मरलान रीती-भाती करीन धड़ेक चतराये मेलन्‌या काजे हुकुम आप्‌यु की, "तुहुंं बाबान धड़ेक गाड़नेन तीयारी करु।" ने चे मीसर देसेन रीतीन अनसारे तीना धड़ेक गाड़नेन तीयार कर्‌या। 3 मीसर देसेन रीतीन अनसारे चाळीस दाहड़ा लग चे दाक्‌तर्‌याम धड़ मां गंदायण्‌यु-मसालु ने गंदायण्‌यो-तेल भर्‌या। ने मीसर देसेन माणसे सत्‌तर दाहड़ा लग याकुबेन करता ढळो-ढळो रड़ता-कलेपता रह्‌या।

4 रड़ने-कलेपणेन सत्‌तर दाहड़ा वीत ज्‌या, ती युसुफ फीरोन राजान घराणान माणसे काजे कह्‌यु, "कदीक तुहुंं मारे पर गीण करता हय, ती मारी जी वात फीरोन राजान चां जाय्‌न देखाड़ देवु की, 5 ‘मारु बास मरने वेळा जी सगुन खादलु की, जत्‌यार मे मरीस ती मारा धड़ काजे तीना बीड़ा मां गाड़जु, जो बीड़ो, मे कनान देस मां खुदाड़लु छे।’ तेरेमां मेसे काजे तीना बीड़ा मां मारा बाबान धड़ गाड़नेन हुकुम आप। ने मे धड़ गाड़ीन पछु आवती रय्‌स।"

6 चे जी वात राजाक देखाड़्‌या, ती फीरोन राजु आवीन युसुफ कह्‌यु, "जा, तारु बास जसु तुसेक सगुन भरीन कहलु छे तसुत तु तारा बासेन धड़ काजे गाड़ दे।"

7 तेरेमां युसुफ आपसा बासेन धड़ लीन गाड़ने करीन कनान देस मां जाणे बाजी ज्‌यु। ने युसुफ साते फीरोन राजान हकदार्‌या, ने राजान घराणान आखा मुख्‌या, ने मीसर देसेन आखा डाहला माणसे बी पुठी गुया। 8 युसुफेन घराणान आखा माणसे, ने तेरा भायस, ने तेरा बासेन घरेन आखा माणसे बी युसुफ पुठ्‌ये गुया; बाकुन चे पुर्‌या-पारी काजे, ने गाडराक ने बुकड़ा काजे, ने गावड़ी ने बेल काजे गोसेन नावेन जीला मांत मेल दीन जाती र्‌या 9 युसुफ पुठ्‌ये सीपायड़ा बी घुड़ा-गाडी पर ने घुल्‌ला पर बसीन गुया। तसा करीन बेसका डाग्‌या हय ज्‌या।

10 अळतेन याकुबेन डाग्‌या यरदन नदी काजे एणकीन आताद नावेन मटला खळा मां पुग्‌या, ती चे चां फुको-फुको ने ढळो-ढळो रड़्‌या-कलप्‌या, ने युसुफ सात दाहड़ा लग फुको-फुको रड़तु-कलेपतु जाय्‌न आपसा बासेन डागेन रीती-भाती कराड़्‌यु। 11 मीसर देसेन माणसेक फुको-फुको रड़तेला-कलेपतेला सामळीन चां आताद नावेन मटला खळान आड़े-धड़े रहण्‌या कनानी जातीन माणसे कह्‌या, "जो ते मीसर देसेन माणसेन फुको-फुको रड़नु-कलेपणु हसे।" ने तीना जागान नाव आबेल-मीसरेम पड़ ज्‌यो। ईब्‌रानीयो बुली मां एरो मतलब मीसर्‌या माणसेन फुको-फुको रड़नु-कलेपणु छे। जु जागु यरदन नदीन पली धड़े कनान देस मां छे।

12 इस्‌राएलेन पुर्‌या वारु चत काम कर्‌या, चु तीनुक हुकुम आपलु। 13 अळतेन चे तीनाक कनान देस मां ली जाय्‌न मकपेला जागा वाळी गुफा मां मम्‌रे नावेन जागा अगळ छे। जु अब्‌राहम हीत्‌ती एपरोन सी मुल लेदु की चु कबर वाटे हेरी खुदेन जागा हवे। 14 चां युसुफ आपसा याकुबेन धड़ काजे वगे करीन आपसा भायसे भेळे, ने जतरा बी डाग्‌या गुयला तींद्‌रे भेळे मीसर देस मां पछु आवती र्‌यु।

15 याकुबेन धड़ वगे करी आया ने अळतेन युसुफेन भायस असा वीच्‌यार करीन फीकुर मां पड़ ज्‌या की, कांखुर माय्‌न युसुफ हंय हामरे पर कीचवायसे, ने हामु तेरे पर जी बी कुहराय करला छे, तेरु बदलु हामरे सी लेसे। 16 तेरेमां चे युसुफेन चां असो कय मकल्‌या, "आपणु बास मरनेन पेहले हामुक जु हुकुम आपलु की, 17 तुहुंं युसुफ काजे कवजु की, हामरा गुनान ने पापेन माफी हामुक आप दे, काहाकी हामु तारे पर कुहराय करला छे। तेरेमां तु, हामुक, हामरा पाप-गुनान माफी आप दे, हामु ते आपणा बासेन भगवानेन, गुलाम पावर्‌या छे।" तींद्‌री जी वात सामळीन युसुफ फुको-फुको रड़ने बाजी गुयु।

18 अळतेन युसुफेन आखा भायस युसुफेन चां जाय्‌न तेरे अगळ उबडु पड़्‌या। ने कह्‌या, "हामु ते तारा गुलाम पावर्‌या छे।"

19 बाकुन युसुफ तीनु काजे कह्‌यु, "मारे सी मां बीहु! मे डंड आपण्‌यु भगवान छे काय? 20 तुहुंं ते कुहराये जाळसांदी बणावला; बाकुन भगवान ईनी वात मां बी भलायन वीच्‌यार बणाय रहलु। ने भगवानेन वीच्‌यार बेसका माणसेन जीव बचाड़नेन हतलु। ने देखु, तसोत हय-ज्‌यो ने आज तुहुंं जीवतेला छे। 21 तेरेमां मे एक कावा अळी कहं, मारे सी मां बीहु! मे तुंद्‌रे वाटे ने तुंद्‌रा पुर्‌या-पारी वाटे खाणे-पीणेन तज्‌बु करीन पुसतु रय्‌स।" तसु करीन युसुफ तींद्‌रे साते परम मां भरायन वात कर्‌यु ने हिम्‌मत आप्‌यु।

22 युसुफ आपसा बासेन घराणा भेळे मीसर देस मां रह्‌यु। ने युसुफ एक सव दस साल लग जीवतु रह्‌यु। 23 ने युसुफ एप्‌रेमेन तीसरी पीड़ी मतलब एप्‌रेमेन पुर्‌यान-पुर्‌या काजे लग देख्‌यु। ने मनेस्‌यान पुर्‌या काजे जु माकीरेन पुर्‌या हतला, चे पयदा हया ने युसुफ आपसा खुळा मां खेलाड़्‌यु। 24 युसुफ आपसा भाय काजे कह्‌यु, "मे ते मरनेवाळु छे, बाकुन भगवान तुहुंं काजे हेर करीन तुंद्‌रे पर गीण करसे, ने तुहुंं काजे ईना देसेम सी नीकाळीन तीना देस मां पुगाड़ देसे, जो देस चु अब्‌राहम काजे, ने इसाक काजे, ने याकुब काजे आपणेन बुली करलु।" 25 युसुफ आपसा भाय काजे कह्‌यु, "मे ते मरनेवाळु छे, बाकुन भगवान तुहुंं काजे हेर करीन तुंद्‌रे पर गीण करसे, ने तुहुंं काजे ईना देसेम सी नीकाळीन तीना देस मां पुगाड़ देसे, जो देस चु अब्‌राहम काजे, ने इसाक काजे, ने याकुब काजे आपणेन बुली करलु।" 26 तसु करीन युसुफ एक-सव-दस साल लग जीवीन मर गुयु। ने युसुफेन धड़ काजे गंदायण्‌यु-मसालु ने गंदायण्‌यो तेल लागाड़ीन तीयार कर्‌या। ने चे मीसर देस मां, तेरा धड़ काजे पेटी मां मेल देदा।