उबजाणनी किताप 35

बेतेल मां याकुब काजे संयबरकत जड़नु

1 थुड़ाक दाहड़ाम भगवान याकुब काजे कह्‌यु, "तु जां सी बेतेल सहर मां जाय्‌न वस जाजी। ने चां मारे वाटे एक दगड़ान वेदी बणावजी, जु तुसेक तीने टेमे सपना मां देखाव पड़लु, तीनी टेमे तु आपसा भायस एसाव्‌या सी बीहीन ढासतेलु।"

2 तत्‌यार याकुब, आपसा घरन्‌या काजे, ने जे तेरे पुठ्‌ये हतला, तीनु आखा काजे बी कह्‌यु, "तुंद्‌रे ईचमां सी आखी भातीन पारकी देव-धाणी काजे नीकाळीन नाख देवु; ने खुद काजे चुखा करु, ने आपसा पुथल्‌या बदलीन, धुवला पुथल्‌या पेहेर लेवु। 3 ने चालु, आपणु जां सी बेतेल सहर भीणी जाता; चां मे तीना भगवान वाटे दगड़ान एक वेदी बणावीस, जु भगवान मारी आफत मां मारी समळीन मारी मदत करलु, ने तीने वाट्‌ये मे जातलु, तीने वाट्‌ये चु मारे पुठ्‌ये हतलु।" 4 तेरेमां ततरा बी दीसरा देवतान मुरत्‌या तींद्‌रेन्‌चां हतला, तीनु मुरत्‌या काजे ने जतरा बी बायरा कान्‌टा मां भारेवला टुकर्‌या पेहेरतेला तीनु टुकर्‌या काजे, चे याकुब काजे आप देदा; ने याकुब तीनु देवतान मुरत्‌याक ने टुकर्‌या काजे सकेम सहर धड़े वाळा बांज नावेन झाड़का तळे गाड़ देदु।

5 जत्‌यार याकुब ने तेरा पुर्‌या चां सी जाणे बाजी रहला ती, तीना सहरेम वाळा तींद्‌रे पछळ पड़ने हींडतेला; बाकुन तींद्‌रा मन मां भगवानेन बीहाणो भराय ज्‌यु, ने चे तींद्‌रे पछळ नी पड़ सक्‌या। 6 अळतेन याकुब, तेरा माणसे भेळे लुज नावेन सहर मां आयु। तीना सहर काजे बेतेल बी कवतेला। जो सहर कनान मुलुक मां छे। 7 याकुब चां दगड़ान एक वेदी बणायु। ने तीना जागान नाव "एल बेतेल" पाड़्‌यु; काहाकी जत्‌यार चु आपसा भायस एसावेन धाके ढासीन जातलु, ती ईनेत जागे भगवान तेरे अगळ उजेंतु हवलु। 8 रीबकान बाळ-पणा मां, रीबकान देख-भाळ करने वाळी दबोरा चां मर गुयली, ने बेतेल सहर मां बांज नावेन झाड़का तळे तीनी काजे गाड़्‌ला, ने तीना बांज नावेन झाड़कान नाव अल्‌लोन-बक्‌कुत पाड़्‌या।

9 जत्‌यार याकुब पद्‌दनराम सी पछु आयु ती दुसरी कावा भगवान तीनाक जागता-सपना मां देखाव पड़्‌यु, ने संयबरकत आप्‌यु। 10 ने भगवान याकुब काजे कह्‌यु, "हंय लग ते तारो नाव याकुब हतलो; बाकुन हंय सी तारो नाव ‘इस्‌राएल्‌यु’ रवसे।" तसों करीन भगवान याकुबेन नवलो नाव इस्‌राएल पाड़्‌यु। 11 अळतेन भगवान याकुब काजे कह्‌यु, "मे आखा सी जुर भर्‌यु भगवान छे: मे तुसेक वेल वदणेन बरकत आपो: तारु बेसकु-मटु वेल वदसे, ने तारे सी बेसका जातीन माणसे पयदा हवसे, ने तारी अवल्‌यात मां राजा पयदा हवसे। 12 ने जी जागा मे तारा डाहला-बास अब्‌राहम काजे ने तारा बास इसाक काजे आपणेन वायदु करलु, चत देस मे तुसेक ने तारी आवणे वाळी अवल्‌यात काजे आपीस।" 13 अळतेन याकुब साते वात करीन भगवान चां सी उपर जात र्‌यु। 14 ने जीना जागा मां भगवान याकुब सी वात कर्‌यु, चां याकुब दगड़ु उबु कर्‌यु, ने अंगुरेन रस ने जेतुनेन तेल चड़ायु। 15 जीना जागा पर भगवान याकुब सी वात कर्‌यु, तीना जागान नाव चु बेतेल पाड़्‌यु।

राहेल मर गुय

16 याकुब ने तेरा माणसे बेतेल सहर काजे छुड़ीन जात रया। ने एपराता सहरेम पुगणेन ईतरीक वार पेहलेत राहेलेन फवरी हवणेन टेम आय लागी। ने ची वेणेन दुख सी बेसकी वेला करने बाजी गुय। 17 जत्‌यार ची बेसकी वेला करतेली तीने टेमे दायण तीनीक कय, "ओ राहेल, बीहे घुण; हंयन कावा बी तारु पुर्‌युत हवसे।" 18 ने पखड़ाय्‌नेन टेमे राहेल मर गुय, ने मरता-मरता ची तीना पुर्‌यान नाव बेनोनी*35:18 मारा दुखेन पुर्‌यु पाड़ी: बाकुन तीना पुर्‌यान बास याकुब, तीना पुर्‌यान नाव बीन्‌यामीन*35:18 मारा जेवड़्‌या हातेन पुर्‌यु पाड़्‌यु।

19 तसु करीन राहेल मर गुय, ने एपराता सहरेन वाट्‌येत तीनी काजे गाड़ देदा। 20 ने याकुब, राहेलेन ईज्‌जत मां तेरा बीड़ा पर एक दगड़ान खाम्‌बु उबु कर्‌यु: चु दगड़ान खाम्‌बु आज लग छे। 21 अळतेन इस्‌राएल्‌यु चां सी अगु जाती र्‌यु, ने एदेर नावेन एक मीडेवरान दखणाव आपसु तम्‌बु ताण देदु।

याकुबेन पुर्‌यु

22 जत्‌यार याकुब इस्‌राएलेन तीनी मुलुक मां रहणे बाजी रहलु, ती एक दाहड़ु तेरु पुर्‌यु रुबेन राहेलेन पावरनी बील्‌हा दीनीक इस्‌राएल बणाय लेदलु, तीनी साते जबरान सोवसार करीन छीनाळो कर्‌यु,

ने जी वात इस्‌राएल काजे मालम पड़ गुयो। ने इस्‌राएल रीसवाय गुयु। 23 तेरी लाडी लीया सी जे पुर्‌या हवला: रुबेन, सीमोन, लेवी, यहुदा, ईस्‌साकार ने जबुलुन। 24 तेरी लाडी राहेल सी तेरा दुय पुर्‌या हवला: युसुफ ने बीन्‌यामीन। 25 ने राहेलेन पावरनी बील्‌हा सी तेरा दुय पुर्‌या हवला: दान ने नप्‌ताली। 26 लीयान पावरनी जील्‌पा सी तेरा दुय पुर्‌या हवला: गाद ने आसेर पद्‌दनराम मां हया।

इसाकेन मरनु

27 अळतेन याकुब मम्‌रे नावेन जागान्‌चा वाळा कीरयोतोरबा सहर मां आयु। ज कीरयोतोरबा सहर, हेबरोन बी कहवाये। ईना सहर मां याकुबेन डाहलु-बास अब्‌राहम पारकु बणीन रहलु, ने हंय तेरु बास इसाक रहणे बाजी रहलु। 28 इसाक एक सोव ने अस्‌सी सालेन हयु। 29 ने इसाक ती मरीन सर ज्‌यु ने आपसान डाहवारो पुरो करीन आपसा पेहला माणसे मां भेसकाय ज्‌यु; ने तेरा पुर्‌या एसाव ने याकुब तीनाक वळाया।