नुहन पुर्यान खानदानी
1 नुहान पुर्या सेम्यु, हाम ने याफत्यु हतला; हींद्रा पुर्या कळ-डुब हवणेन पछेन पयदा हया: ने तींद्री अवल्यात जी छे।
2 येपत्यान पुर्या: गोमर, माग्यु, माद्यु, यावान्यु, तुबल्यु, मेसक्यु, ने तीरास्यु हया। 3 ने गोमर्यान पुर्या: असकनज, रीपत्यु ने तोगर्मायु हया। 4 ने यावान्यान अवल्यात सी एलीस्या, ने तरसीस्या, ने कीत्तया, ने दोदान्या माणसे हया। 5 हींद्रा अवल्यात धरतीन ईचमां वाळान दरीयान च्यारे-मेर वाळा देसेम जाय्न वस ज्या। ने चे अलग-अलग बुली, कुळी ने जाती मां वाटाय ज्या।
6 हाम्यान पुर्या: कुस, मीसर, पुत्यु ने कनान्यु हया। 7 ने कुस पुर्या सबा, हवील्यु, सबत्यु, राम्यु, ने सबतक्यु हया। ने राम्यान पुर्या सेब्यु ने ददान हया। 8 कुस, नीम्रोद नावेन एक अळी पुर्यु हतलु। नीम्रोद बेसकु ताकुतवाळु बण ज्यु। ने चु धुवायली कळी पर असलु पेहलु माणुस हतलु। 9 चु यहोवा भगवानेन नीगा मां ताकतवाळु सीकार खेलने वाळु बण्यु, हेरे सी जु कवाड़ु चाल्यु, "नीम्रोद अगळ यहोवान नीगा मां ताकतवाळु सीकार खेलने वाळु।" 10 नीम्रोद राज सीनार देसेन बेबीलोन राजवाड़ा मां, एरेख राजवाड़ा मां, अक्कद राजवाड़ा मां, ने कलने राजवाड़ा मां सुरु हयो। 11 तीना देसेम सी नीम्रोद असीरीया देस मां गुयु; ने चां नीनवे, रोहोबोतीर, कालोह, 12 ने रेसेन नावेन सहर काजे वसाड़्यु। जो रेसेन सहर तीना जमाना मां, नीनवे सहरेन ने कालोह सहरेन ईचमां वाळो मटलो सहर हतलो।
13 मीसरेन अवल्यात मां लुदी, अनामी, लहाबी, नप्तुही, 14 ने पतरुसी, कसलुही ने कप्तोरी माणसे हया, कसलुहीया माणसे मां सी पलीस्ती माणसे नीकळ्या।
15 कनान्यान पुर्या हतला: सीदोन, ने हीत्यु, 16 ने यबुसी, एमोरी, गीरगास्यु, 17 हीव्वी, ओरक्यु, सीन्यु, 18 अर्वदी, समारी, ने हमाती। तसा करीन कनानीन अवल्यात कळी मां आखे दुर वस गुय। 19 ने कनानीन अवल्यात सीदोन सी गरारेन वाट्ये माय्न गाजा लग, ने सदोम ने अमोरा ने अदमा ने सबोयीमेन वाट्ये सी लासा लग वस रहला। 20 जे आखा माणसे हाम्यान कुळी माय्न हतला; ने जे आखा, कुळीन, ने बुलीन, ने देसेन, ने जातीन अनसारे आंग्ये-आंग्ये वस ज्या।
21 सेम्यु येपेत्यान मट्लु भायस हतलु, ने सेम्यान एबर नावेन पुर्यु हयु, ने तेरा बी पुर्या हया। तसा करीन सेम्यु एबर्यान अवल्यातेन डाहलु बास बण ज्यु। अगा जाय्न एबर्यान अवल्यातेन माणसे एबर्या कवायणे बाजी ज्या। 22 सेम्यान अळी बी पुर्या हतला; चे एलाम, अस्सुर, ओरपोकसोद्यु, लुद ने ओराम्यु हतला। 23 अरामेन पुर्या उस, हुल, गेतेर ने मस हतला। 24 ओरपोकसोद्यु सेलह ने एबर काजे पयदा कर्यु। 25 एबरनेन दुय पुर्या हतला। एक पुर्यान नाव पेलेग्यु हतलो। पेलेग्यान टेमे माणसे टुळुन-टुळु आंग्ये हय्न धरती पर वस गुयला। करीन तेरो नाव पेलेग्यु पाड़ला। ने पेलेग्यान नानला भायसेन नाव योकतान्यु हतलु। 26 ने योकतान ने अल्मोदाद, सेलेप, हसरमावेत, येरह, 27 यदोरवाम, उजाल, ने दीक्ला, 28 ओबाल, अबीमाएल, सबा 29 ओपीर, हवीला ने योबाब पयदा हया; जे आखा योकतान पुर्या हतला। 30 जे आखा बुडवणी धड़े वाळा मेसा सी उगेण्ले धड़े वाळा सेपारा लग रवतेला। सेपारा बयड़ा वाळा जागा मां हतला। 31 जे आखा माणसे सेम्यान कुळी माय्न हतला; ने जे आखा कुळीन, ने बुलीन, ने देसेन ने जातीन अनसारे आंग्ये-आंग्ये वस ज्या।
32 नुहान पुर्यान तींद्री जातीन अनसारे कुळी-वेलु जुत छे; ने मुसळ-धार्यु पाणी पड़ीन हीट ज्यु, ने अळतेन हींद्रेम सीत आखी जातीन माणसे पयदा हया, ने आखी धरती पर वस ज्या।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)