1 अळतेन याकुब आपसा आखा पुर्‌याक असु कय्‌न बुलायु, "पुर्‌या उरहावु, आवणे वाळा दाहड़ाम तुंद्‌रे साते काय-काय हवसे; चो मे तुहुंंक देखाड़ो।"

2 ए मारा पुर्‌या, तुहुंं आखा भेळा हय्‌न सामळु, आपसा बास इस्‌राएल्‌यान वात धीयान सी सामळु।

याकुब, रुबेन्‌या काजे संयबरकत आपे।

3 ए रुबेन, तु ते मारु पेहलु-खुळ्‌यु बेटुस छे।

तु मारी जुवानीन ताकुतेन पेहलु पुरावु छे।

आखा भायस सी ईज्‌जत ने ताकुत मां बेसकु वारु छे।

4 बाकुन तु ते छीनाळ्‌यु छे। बाकुन तु ते मार लाडी साते सोवसार कर्‌यु;

ने तारा बासेन खाटलाक वीटाळ देदु ने खाटलान ईज्‌जत नी कर्‌यु।

तेरेमां तारी ईज्‌जत ने ताकुत दीसरा सी अदु नी रहे।

याकुब, सीमेन्‌या ने लेव्‌या काजे संयबरकत आपे।

5 "ए सीमोन ने लेवी, तुहुंं ते सग्‌गा भायस छे।

तुहुंं काजे ते तलवार करीन लड़ाय करनु वारु गमे।

6 तुहुंं मनेन भुंड्‌ली वात वीच्‌यार्‌या।

तीनी भुंड्‌ली वात मां, मे नी भेसकायो। मे तुंद्‌री बठक मां नी बठो।

काहाकी तुहुंं रीसे मां माणसे काजे मार्‌या ने,

चे आवीन बेल काजे झाटकाय्‌न लंगड़ा कर देदा।

7 तुंद्‌री रीसे पर तुंद्‌रे पर गरा छे!

काहाकी तुहुंं रीसेम गांडवाय गुयला।

ने तुहुंंक गीण नी आवी। तेरेमां तुंद्‌री अवल्‌यात याकुब सी आंग्‌ये-आंग्‌ये हय जासे,

ने हव, इस्‌राएल देस मां तुंद्‌री अवल्‌यात रावण्‌या-तीवण्‌या हय जासे।"

8 ए यहुदा! तारा भायस तुसेक बेसकु वारु कवसे।

तु तारा वेरीक जीत लेसी।

तारा भायस तार सी नानला बणीन रवसे।

9 यहुदा तीना जुवान्‌या नाहरेन तसु छे, जु काहानास जानवर काजे मार्‌यु हय।

ए मारा बेटा, तु तीना नाहरेन तसु छे,

जु काहानास जानवरेन सीकार करने करीन तकाय रह्‌यु हय।

सीकार करने करीन तेरु जुर कुण वदाड़ सके?

10 यहुदा तारा घराणा मां राज-करन्‌या पयदा हवसे,

छाचलीन वारु राज-करन्‌या काजे आवता लग,

तींद्‌रे मां सी राजगादीन सहलाणी नी सरे।

चु वारु राज-करन्‌यु आवसे ती बेसका माणसे तेरु हुकुम मानसे ने सेवा करसे।

11 चु जुवान्‌या गदड़ा काजे अंगुरेन वेले करीन बांदसे।

ने गदड़ीन पीला काजे वारला अंगुरेन वेले करीन बांदसे।

चु आपसा पुथल्‌या काजे धुवणे करीन आखा सी वारु अंगुरेन रस वापरसे।

12 तेरा डुळा अंगुरेन रस पीणे सी राता रवसे,

ने तेरा दात दुत पीणे सी धवळा फक हय जासे।

13 "ए जबुलुन तु दरीया धड़े रय्‌स,

ने दरीया धड़े वाळु जागु ढंड्‌यान ठेसण बणसे,

ने तारी वस्‌तीन छेव सीदोन देस लग रवसे।"

14 "ए ईस्‌साकार्‌या, तु तीना गदड़ान तसु छे,

जो काठी मेहनत करे। बाकुन हारी पड़ीन जानवर्‌यान वाड़ा मां आडु पड़ रवे।

15 जत्‌यार तु देखीस की, मारु आराम करनेन जागु वारु छे,

ने कमायणेन जागा बी बेसकी वारु छे।

तत्‌यार तु भार हाकलने करीन तीयार हय जासी।

ने पावरेन काम करने वाटे गुलाम बण ज्‌यु।"

16 ए दान, तु बी इस्‌राएली जातीन एक कुळी बणसी,

ने आपसा जाती-भायन नीयाव करसी।

17 ए दान, तु वाट धड़े वाळा घड़सान तसु हवसी,

ने वाटे धड़े वाळा फेण वाळा घड़सान तसु बणसी,

जु फेण वाळु घड़सु घुल्‌लान पाय झुल देसे,

ने घुल्‌ला पर सवारी करन्‌यु घुल्‌ला पर सी पछ मुंड्‌या हीट पड़े।

18 "ए यहोवा भगवान, मे तारे सीत छुटकारु हात करनेन वाट देख र्‌यु।"

19 "ए गाद, तारे भीणी डाकुन एक टुळु आवसे, बाकुन तु तीना डाकुन टुळा काजे हुहड़ीन ढासाड़ दीस।"

याकुब, आसेर्‌या काजे संयबरकत आपे।

20 "ए आसेर, तारा देस मां अन वारु पाकसे,

ने तु राजा काजे सवादो खाणो खावाड़सी।"

21 "ए नप्‌ताली, तु छुटली हयणीन तसु छे,

ने तु वारु सुवाळी वात करे।"

22 "ए युसुफ, तु वारु फळन्‌या अंगुरेन वेलान तसु छे, हव, तु झीरे धड़े उगाड़ला अंगुरेन वेलान तसु छे;

जु वेलु, वाड़्‌ये लागीन चहड़ रयु।

23 धंदली-बील्‌खा वाळा वेरी तारे भीणी हुड़दीन आया,

चे तुसेक मारने करीन धंदली-बील्‌खा लीन पुठ्‌ये पड़्‌या।

24 बाकुन याकुबेन जुर भर्‌यु भगवान तारा हात काठा कर देदु,

याकुबेन कुळीन गुवाळ्‌यु, जु इस्‌राएली माणसे वाटे ढाटा सारकु छे,

चु तारी अगवाय करीन राखवाळी कर्‌यु।

तेरेमां तारी धंदली वारु काठी रय ने तुसेक सक्‌ती जड़ी, तेरे साहरे तु लड़ाय मां जीत गुयु।

25 मारु भगवान सक्‌ती आपीन तारी मदत करसे।

चु भगवान तुसेक वादळान पाणीन संयबरकत आपसे,

ने चु तुसेक धरतीन उंडा वाळा पाणीन संयबरकत आपसे।

ने तुंद्‌रा बायरा ने पाळन्‌या जानवर्‌यान अवल्‌यात आपीन संयबरकत आपसे,

ने तींद्‌रा धादीम दुत आपीन संयबरकत आपसे।"

26 तारा बासेन संयबरकत, आपणा आड़ा-बुड़ान संयबरकत सी वदीन छे,

ने ची संयबरकत जलम टेकला बयड़ाम सी,

ने उचला बयड़ाम सी आवणी संयबरकत सी वदीन छे।

तु ते तारा भाय सी बेसकु-छेक्‌तु छे;

तेरेमां जी आखी संयबरकत तारा मुणका पर पागड़ीन तसी रवसे।

27 "ए बीन्‌यामीन, तु ने तारी अवल्‌यात तीनु तातड़ीन-खाण्‌या लेंड्‌यान तसु छे,

जे संदारे ते सीकार करलो खाय, बाकुन सांती वेळाय बचलो वाटीन खाय लेय।"

28 इस्‌राएल्‌यान बारे पुर्‌यान बारे कुळी जीत छे: जी संयबरकत तींद्‌रे वाटे वारु हतली; चीत संयबरकत चु एकेक जणाक आपलु।

29 अळतेन इस्‌राएल्‌यु, आपसा पुर्‌या काजे हुकुम आपीन कह्‌यु, "मे मरीन छाटुत आपणा मर्‌या-सर्‌या आड़ा-बुड़ा मां भेसकाय जायस। ती तुहुंं मारा धड़ काजे हीत्‌ती जातीन एपरोन नावेन माणसेन खेते धड़े वाळा खंगरा मां गाड़जु, जां आपणा मर्‌या-सर्‌या आड़ा-बुड़ा काजे गाड़ला छे। 30 चु खंगरु मम्‌रे नावेन जागान उगेवणु छे, ने मकपेला नावेन खंगरा वाळा खेत मां छे। ने चो खेत कनान देस मां छे। अब्‌राहम चो खेत हीत्‌ती जातीन एपरोन नावेन माणसे जुळ बीड़ा बणावणे करीन मुल लेदलु। 31 चां मारा डाहला-बास अब्‌राहमेन धड़ काजे, ने मारी डाहली-आया सारान धड़ काजे गाड़ला; ने चांत मारा बास इसाकेन धड़ काजे, ने मारी माय्‌न रीबकान धड़ काजे बी गाड़ला; ने चांत मे मारी घरवाळी लीयान धड़ काजे बी गाड़लु। 32 चु खंगरु तीना खेतेम छे, तीना खेत काजे डाहलु-बास अब्‌राहम्‌यु हीत्‌या जातीन माणसे भीणी सी मुल लेदलु। मे मरीस ती मारा धड़ेक चांत ली जाय्‌न गाड़जु।" 33 याकुब आपसा पुर्‌या काजे हुकुम आप देदु, ने अळतेन चु खाटला पर सुय ज्‌यु, ने कुचण्‌या वळ्‌यु, ने तेरु जीव छांड ज्‌यु, ने तेरु जीव मर्‌या-सर्‌या आड़ा-बुड़ाम जाय्‌न भेसकाय ज्‌यु