उबजाणनी किताप 32

याकुब एसाव सी भेळो हवणेन करीन तीयारी करे

1 याकुब बी आपसी वाटे गुयु, ने भगवानेन सरगे वाळा काहवाळ्‌या तीनाक भेळा हया। 2 तीनुक देखतेत याकुब कह्‌यु, "जे ते भगवानेन टुळु छे।" तेरेमां हयु तीना जागान नाव महनेम*32:2 दुय टुळा पाड़्‌यु।

3 तत्‌यार याकुब सेईर देस मां, मतलब एदोम देस मां, आपसा भाय एसाव धड़े आपसा अगळ काहवाळ्‌या मकल्‌यु, 4 ने हयु असु हुकुम आप्‌यु, "मारा मालीक एसाव सी असु कवजी: तारु पावर्‌यु याकुब तार सी असु कहे की मे लाबानेन चां हंय लग पारकु बणीन रह्‌यु; 5 ने मारे धड़े गावड़ी-बेल, गदड़ा, गाडरा-बुकड़ा, ने पावर-पावरनी छे: ने मे मारा मालीक धड़े असु करीन वात मकल्‌यु की तारी गीण-दया मार पर रवे।"

6 चे काहवाळ्‌या याकुब सी कहणे लाग्‌या, "हामु तारा भाय एसाव धड़े गुयला, ने चु बी तार सी भेळु हवणे करीन च्‌यार सोव माणसे लीन आवे।" 7 तत्‌यार याकुब अदुस बीही ज्‌यु, ने फीकुर मां पड़ ज्‌यु; ने असु सुचीन आपसा दुस्‌तीदारेन, ने गाडरा-बुकड़ाक, ने गावड़ी-बेल, ने उटड़ान बी अलग-अलग टुळा बणाय देदु, 8 की कदी एसाव आवीन पेहला टुळा काजे मारने बाजी जाय, ती दीसरु टुळु ढासीन बची जासी।

9 अळतेन याकुब कह्‌यु, "ए यहोवा, ए मारा बाबा अब्‌राहमेन भगवान, ए मारा बास इसाकेन भगवान, तु ते मेसे कहलु की मारा देस ने पयदावारीन जागा पर जाती रव, ने मे तारी भलाय करीस: 10 तु मारे पर गीण करीन भलो करे असु ते मे नी हय, बाकुन तेबी तु गीण करीन मारे वाटे छाचाय सी काम करलु छे। ने मे मारु डेंगु लीन यरदन नदी वेणकीन आवती रहलु छे। तेरेमां हंय मे मारा दुय टुळा बण गुयला छे। 11 मारी दुवा सामळीन मारा भाय एसावेन हात सी बचाड़: मे तेरे सी बीहो,कान्‌खुर मायन असो हवे की चु आवीन मेसे ने माय भेळेत पुर्‌याक बी मार नाखे। 12 तु ते कहलु की छाचलीन मे तारे सी भलाय करीस, ने तारा अवल्‌यात काजे दरीयान बालु रेतेन तसु गीणाये नी तत्‌रा अवल्‌यात करीस।"✝32:12 उबजाणनी किताप 22:17

13 हयु तीने दाहड़े चांहान रात रह्‌यु; ने जो काय तेर धड़े हतलो तेरेम सी आपसा भाय एसाव काजे आपणे करीन छाटी-छाटीन नीकाळ्‌यु; 14 मतलब दुय सोव बुकड़ी, ने वीस बुकड़ा, ने दुय सोव गाडरा, ने वीस गीदल्‌या, 15 ने उटड़ा बी जे जन्‌नला हतला, ने चाळीस गावड़ी, ने दस बेल, ने वीस गदड़ी ने दस पीला। 16 याकुब ईनु आखा जानवर्‌या काजे तेरा पावर्‌यान हातेम सुप देदु ने तीनुक कह्‌यु, "तुहुंं अगा जाती रहु; ने आंग्‌ये-आंग्‌ये टुळान ईचमां जागु राखु।" 17 अळतेन हयु अगला टुळान राखवाळ्‌या काजे असु हुकुम आप्‌यु, "जत्‌यार मारु भाय एसाव जड़े, ने पुछणे लागे, ‘तु कुणीन पावर छे, ने कां जाय, ने जे तारे अगळ-अगळ छे, चे कुणीन छे?’ 18 तत्‌यार कवजी, जे तारा पावर याकुबेन छे। ए मारा मालीक एसाव, जे चड़ावणे करीन तार धड़े लावला छे, ने चु बी पुठ्‌ये आवणे बाजी र्‌यु।" 19 ने हयु दीसरा ने तीसरा राखवाळ्‌या काजे बी, मतलब आखा तीनु टुळान पछळ-पछळ हतला असात हुकुम देदु की जत्‌यार एसाव तुहुंंक जड़े तत्‌यार असु तीनुक कवजी। 20 ने असो बी कवजु की, तारु गुलाम-पावर पछळ आवणे बाजी र्‌यु। याकुब असु वीच्‌यार कर्‌यु, "मे जी जानवर्‌या भेट अगळ-अगळ मकलीन एसाव्‌यान रीस काजे सेळवी दीस, ने अळतेन तीनाक भेळु हयस ती चु खुस हय जासे।" 21 तेरेमां चु चड़ावु याकुब पेहेल पुग गुयु, ने चु आपसु तीने रात्‌ये तम्‌बु मां रह्‌यु।

याकुबेन लड़ाय

22 तीनेत रात्‌ये चु उठ्‌यु ने आपसान दुय बायरा ने दुयु पावरनी ने ग्‌यारे पुर्‌या काजे भेळे लीन घाट सी यब्‌बोक नदीन पली धड़े जाती र्‌या। 23 हयु तीनुक तीनी नदीन पार उतार देदु, मतलब आपसान आखो काय पार उतार देदु। 24 ने याकुब चां एखलु रय ज्‌यु;

तत्‌यार काहनुक पुर्‌यु आवीन दाहड़ु उंगणे सी पेहेल लग तेरेसी लड़ाय करतु रह्‌यु। 25 जत्‌यार हयु देख्‌यु की मे याकुब सी नी जीताये तत्‌यार तेरा सातळ्‌याम छीम्‌यु: ने याकुबेन सातळ्‌यान नस लड़ायणेन टेमे नस लागी गुय। 26 तत्‌यार हयु कह्‌यु, "मेसे जाणी दे, काहाकी वीजाळो हवणे वाळो छे," याकुब कह्‌यु,

"जत्‌यार लग तु मेसे संयबरकत नी आपे, तत्‌यार लग मे तुसे जाणी नी दम।"

27 ने हयु याकुब सी कह्‌यु, "तारो नाव काय छे?"

हयु कह्‌यु, "याकुब।"

28 हयु कह्‌यु, "तारो नाव याकुब नी हय, बाकुन इस्‌राएल हसे, काहाकी तु भगवान भीणी सी ने माणसे सी बी लड़ाय मां जीतीन आवलु छे।"

29 याकुब कह्‌यु, "मे तार सी लीलघाय्‌न कहो की, मेसे तारो नाव बताड़।"

चु कह्‌यु, "तु मारो नाव काहा पुछे?" तत्‌यार हयु तीनाक हयुत संयबरकत आप्‌यु।

30 तत्‌यार याकुब असु कहीन तीना जागान नाव पनीएल*32:30 भगवानेन मुंहडो पाड़्‌यु, "भगवान काजे उजेंतु देखलु छे बाकुन तेबी मे नी मर्‌यु" 31 पनीएल धड़े चालते-चालते दाहड़ु उंग ज्‌यु, ने चयड़ु जाती रहलु तेरेमां लंगड़ायतेलु। 32 तेरेमां इस्‌राएली माणसे आज बी जानवर्‌यान सातळ्‌याम वाळी नस काजे नी खाय। काहाकी चु माणुस याकुबेन सातळ्‌या वाळी नस काजे छीमलु।