उबजाणनी किताप 13

अब्‌राम ने लुत आंग्‌ये हवे

1 तत्‌यार अब्‌राम आपसी घरवाळी, आखो माल धन ने लुत काजे लीन मीसर कथु चाल पड़्‌यु। ने कनान देसेन दखेवरु नेगेव नावेन उजाड़्‌या बयड़ा मां आयु।✝13:1 उबजाणनी किताप 2:10 2 अब्‌राम धड़े बेसका जानवर्‌या ने सोनो हतलो तेरेमां चु बेसकु धन वाळु हतलु। 3 तत्‌यार चु दखणाव सहर सी नीकळीन बेतेल भीणी एक जागा सी दीसरा जागा भीणी जात र्‌यु ने चु बेतेल ने आय सहरेन ईचमां वाळा जागा पर जात र्‌यु चां तेरा पड़ावा काजे नाख्‌यु। 4 ने जीने जागे अब्‌राम भगवान वाटे चड़ावान जागु बणावलु, ने अब्‌राम चां अळी यहोवा भगवानेन भक्‌ती कर्‌यु।

5 लुत धड़े बी बेसका गाडरा-बुकड़ा ने जानवर्‌या हतला, ने हयु बी अब्‌राम धड़े आपसान तम्‌बु लागाड़लु। 6 बाकुन रहणेन जागु कम हतलु तेरेसी चे दुय भेळा नी रय सकतेला, काहाकी तींद्‌रे धड़े बेसका जानवर्‌या हतला। 7 ने अळी अब्‌राम ने लुतेन गुवाळ्‌यान ईचमां झगड़ु हय जातलु, ने तीने टेमे तीना देस मां कनानी ने परीज्‌जी जातीन माणसे रवतेला।

8 तेरेमां अब्‌राम लुत सी कह्‌यु, "मारे ने तारे ईचमां ने तारा ने मारा गुवाळ्‌यान ईचमां झगड़ु नी हवणु चाहजे; काहाकी आपणु भाय-भायुत छे। 9 तेरेमां आपणु दुयु नाळा हय जाता, कदी तु डाखर्‌ये हात भीणी जाय ती मे जेवड़्‌ये हात भीणी जाती रय्‌स ने कदी तु जेवड़्‌ये हात भीणी जाय ती मे डाखर्‌ये हात भीणी जाती रय्‌स।"

10 लुत यरदन नदीन तेरे आड़े-धड़ेन नीळोकच खयड़ाक देख्‌यु, चो बेसको लाबों, चवड़ो हतलो, ने नदी बी पाणी सी भरली हतली। चो यहोवा भगवानेन बगीचा ने मीसर देसेन तसों हतलो (जी वात यहोवा भगवान सदोम ने अमोरा सहर काजे सारनेन पेहलुन छे।) 11 तेरेमां लुत यरदन नदी, चो उगण भीणी छे, तीनाक नेवाड़ लेदु, तसा करीन लुत ने अब्‌राम दुयु नाळा हय ज्‌या। 12 अब्‌राम कनान देस मां वस ज्‌यु ने लुत खयड़ाम वाळा सहर मां रहणे बाजी ज्‌यु ने आपसा तम्‌बाक सदोम सहर धड़े ताण देदु। 13 सदोम सहर वाळा माणसे बेसका कुहर्‌या ने यहोवा भगवानेन नींगा मां पाप मां हतला।

अब्‌रामेन हेब्‌रोन जाणु

14 लुत अब्‌राम सी नाळु हवणेन पछेन मां यहोवा भगवान अब्‌राम सी कह्‌यु, "तु जीना जागा पर उबु हय र्‌यु, चां सी च्‌यारे-मेर देख। 15 काहाकी आखु जागु जु तुसेक देखाये, तीनाक मे तुसे ने तारी अवल्‌यात काजे जलम भर दी दीस।✝13:15 नेवताळान काम 7:5 16 मे तारी अवल्‌यात काजे धरतीन धुळान पीठीन तसों गीणाये नी तत्‌रा करीस ने कदी काहनुक तुंद्‌रा ईना धुळान पीठीक गीण लेसे ती चु तुंद्‌रा अवल्‌यात काजे बी गीण सकसे। 17 हंय उठ, ने जो देस कतरो लाबों ने चवड़ो छे तत्‌राम चाल-फीर काहाकी च मे तुसेत काजे आपीस।" 18 तेरेमां अब्‌राम आपसा तम्‌बाक उखाळीन ली जाती र्‌यु, ने हेबरोन सहर धड़े वाळा मम्‌रे वाड़ी मां गुयु, जां चुखला बांज नावेन झाड़का हतला, ने चां तम्‌बु ताणीन आपसा टुळा भेळुत रहणे बाजी ज्‌यु ने अब्‌राम चां बी यहोवा भगवान वाटे चड़ावान जागु बणायु।