1 तत्‌यार इसाक याकुब काजे बुलायन संयबरकत देदु, ने हुकुम देदु, "तु कनानी माणसे माय्‌न काहनी बी पुरे सी ईयाव घुण करे। 2 पद्‌दनराम देस मां बतुएलेन घर जाय्‌न, चां तारा मामा लाबानेन पुरे सी ईयाव कर लेजी। 3 आखा सी जुर भर्‌यु भगवान तुसे संयबरकत आपे, ने तारा बेसका पुर्‌या-पारी हवे ने तु आखा राजेन माणसेन मुख्‌यु बणे। 4 चु तुसे ने तारी अवल्‌यात काजे बी अब्‌राहमेन तसी संयबरकत आपे, काहाकी तु जीना देस मां छे चो देस परदेसी छे ने चां रहे, ने तीनात देस काजे भगवान तीना अब्‌राहम काजे आपलु, काहाकी तीना देसेन हकदार्‌यु बण जाय।"✝ 5 असु कयदीन इसाक, याकुब काजे पद्‌दनराम देस मकली देदु, ने याकुब तेरा मामा लाबानेन चां गुयु। ने अरामी बतुएल याकुबेन मामा लाबानेन ने याकुबेन माय रीबकान बास हतलु। रीबका एसावेन ने याकुबेन माय हतली।

6 जत्‌यार एसाव काजे मालम पड़्‌यो की इसाक, याकुब काजे संयबरकत आपीन पद्‌दनराम मकली देदु, काहाकी चु चांहान सी ईयाव करे, ने तीने टेमे असु हुकुम बी आप्‌यु, "तु काहनी बी कनानी माणसेन पुरे सी ईयाव घुण करे," 7 ने याकुब आस्‌या-बास्‌यान मानीन पद्‌दनराम देस मां जाती र्‌यु। 8 तत्‌यार एसाव असु सामळीन अळी बी वीचार करने लाग्‌यु की कनानी पुरे मारा बास काजे नी गमे, 9 अब्‌राहमेन पुर्‌यु इस्‌माएलेन पुरे धड़े गुयु, ने इस्‌माएलेन पुरे महलत काजे, जी नबायोतेन बहणीस हतली, तेरेसी ईयाव करीन आपसान घरवाळी बणाय लेदु।

10 याकुब बेरसेबा सहर सी नीकळीन हारान देस भीणी चाल पड़्‌यु। 11 ने चु वाट्‌ये चालतु-चालतु रात्‌ये काहनेक जागे रुकणेन वीच्‌यार कर्‌यु, काहाकी दाहड़ु डुब गुयलु; तेरेमां चु तीना जागान दगड़ाम सी एक दगड़ु लीन ईसो बणायु, ने तीनात जागा पर सुय ज्‌यु। 12 तत्‌यार चु असो सपनो देख्‌यु, की एक लीसुण धरती पर उभी छे, ने उपरनो सीरो सरग लग टेकाय्‌लो छे, ने भगवानेन सरगेन काहवाळ्‌या लीसुण सी चहड़े ने उतरे। 13 ने यहोवा भगवान तेर पर उबु रय्‌न कहे, "मे यहोवा भगवान, तारा डाहला अब्‌राहमेन भगवान, ने इसाकेन भगवान छे; जीनी धरती पर आडु पड़ र्‌यु, तीनीक मे तुसे ने तारा अवल्‌यात काजे आपीस। 14 ने तारा अवल्‌यात धरतीन धुळान पीठीन तसी गीणाये नी तत्‌री हय जासे, ने बुडण, उगण, अखण, दखण, च्‌यारे-मेर हय जासे: ने तारा ने तारा अवल्‌यात सी धरतीन आखा देसेन रहण्‌या घरन्‌या काजे संयबरकत आपीस। 15 ने सामळ, मे तारे भेळे रय्‌स, ने जां बी तु जासी चां तारी राखवाळी करीस, ने तुसे ईना देस मां पछु ली आवीस: मे मारा करला वादा काजे पुरो नी करों चां लग तुसे नी छुड़ो।"

16 तत्‌यार याकुब जागी ज्‌यु, ने असु कह्‌यु, "छाचलीन ईना जागा मां यहोवा भगवान छे; ने मे ईनी वात काजे नी जाणों।" 17 ने बीहीन असु कहणे लाग्‌यु, "जु जागु कसु बीहे तसु छे! जु ते भगवानेन घर काजे छुड़ीन अळी दीसरो नी हय सके; बाकुन जु सरगेन फाटकुत हसे।"

18 एगुत याकुब उठ्‌यु, ने आपसान दगड़ान ईसा काजे लीन तेरु खंबु बणाय देदु, ने तेरे उपर थीन्‌गे सी तेल नाख देदु। 19 हयु तीना जागान नाव बेतेल* राख्‌यु; बाकुन तीना सहरेन नाव पेहेल लुज हतलो। 20 तत्‌यार याकुब असु बादा लेदु, "कदी भगवान मार भेळे रय्‌न चां जाणेन मारी राखवाळी करसे, ने खाणे वाटे रुटा ने पेहरनेन पुथल्‌या देय, 21 ने मे बासेन घर वारु पुग जाम; ती यहोवा भगवान मारु भगवान बणसे। 22 ने जु दगड़ु, जीनाक मे उबु करलु छे, चो भगवानेन घर बणसे: ने जो काय तु मेसे आपसी तेरो दसवु हीस्‌सु तुसे आप्‌यात करीस।"