उबजाणनी किताप 43

बीन्‌यामीन साते मीसरे देस मां जाणु

1 कनान देस मां अळी अदुस काळ पड़ ज्‌यु। 2 ने मीसर देस मां सी जो दाणा ली गुयला, चो आखा दाणा सर गुया, तत्‌यार इस्‌राएल आपसा पुर्‌या काजे कह्‌यु, "मीसर देस मां जाय्‌न थुड़ाक दाणा अळी मुल ली आवु।"

3 बासेन वात सामळीन यहुदा आपसा बास काजे कह्‌यु, "चु माणुस हामु काजे चेतावणी दीन कहलु की, तुंद्‌रा भायस काजे लीन जां आवजु, नीते मारो मुंहडो घुण देखु। 4 ने कदी तु हामरा भायस बीन्‌यामीन काजे हामरे पुठ्‌ये मकलीस, ती हामु मीसर देस जाय्‌न अळी दाणा ली आवसुन। 5 बाकुन कदीक तु बीन्‌यामीन काजे हामरे भेळुत नी मकले, ती हामु चां नी जाजे: काहाकी चु माणुस हामुक असु कहलु की, तुंद्‌रा भायस काजे लीन जां आवजु, नीते जां पाय घुण मेकु।"

6 तत्‌यार इस्‌राएल्‌यु आपसा पुर्‌या काजे कह्‌यु, हामरु एक अळी भायस छे, असा कय्‌न तुहुंं, "मेसेक काहा फीकुर मां पाड़ देदा?"

7 चे कह्‌या, "चु माणुस हामरे बारामां ने आपणा घरन्‌यान बारामां पुरी कदर सी असु पुछ्‌यु, ‘तुंद्‌रु बास हाल लग जीवत्‌लु छे काय? तुंद्‌रा अळी बी दीसरा भायस छे काय?’ चु पुछ्‌यु तसात हामु बी कह्‌या; हामुक काय मालम की, चु असु कवसे तुंद्‌रा भायस काजे मारेन्‌चां ली आवजु।"

8 यहुदा आपसा बास इस्‌राएल्‌या काजे कह्‌यु, "बीन्‌यामीन काजे हामरे पुठ्‌ये मकली दे, ती हामु, तु ने हामरा पुर्‌या काळ मां जीवतेला रवसु ने भुकला नी मरजे। 9 तीनाक पछो लावणेन काम मार माथे रवसे, मेत तीनाक पछु लावीन तारे अगळ उबु कर दीस। ने कदी मे तीनाक तारे अगळ लावीन उबु नी करों ती मे जलम तारु गुनाळु रय्‌स। 10 हामु पेहलुस जाता, ने वार नी करता ती हंय लग दुय कावा वळ जाता।"

11 इस्‌राएल्‌यु कह्‌यु "असी वात छे ती असा करु, जां सी तीना माणुस काजे भेट आपणे करीन थुड़ोक मुहाळ, पीस्‌तो, बादाम, गंद, बाम-मलम ने लबान लेता जावु। 12 ने एनी कावा दुणा रुप्‌या बी लेता जावु, ने तुंद्‌रा थयला मां जे रुप्‌या हतला चे रुप्‌या बी पछा लेता जावु कांखुर माय्‌न चे रुप्‌या गलती सी थयला मां भराय ज्‌या हसे। 13 बीन्‌यामीन काजे बी तुंद्‌रे पुठ्‌ये लीन तीना माणसेन्‌चां छाटास अळी जावु। 14 जत्‌यार तुहुंं तीना हकदार्‌या माणुस अगळ उबा हवसु, ती आखाम जुर भर्‌यु भगवान तुंद्‌री मदत करसे, ने चु हकदार्‌यु माणुस गीण करीन, सीमेन्‌या काजे ने बीन्‌यामीन काजे बी पछु मकली देसे। हय सके चु पछु नी मकले ती, भले मे बीना अवल्‌यातेन रवो।"

15 अळतेन युसुफेन भायस, युसुफ वाटे भेट ने दुणा रुप्‌या, ने बीन्‌यामीन काजे बी पुठ्‌ये लीन मीसर देस भीणी चाल पड़्‌या। ने चालता-चालता चे मीसर देस मां युसुफेन चां पुग ज्‌या। 16 युसुफ बीन्‌यामीन काजे तींद्‌रे पुठ्‌ये देखीन आपसा घरेन राखवाळ्‌या पावर काजे कह्‌यु, "पला माणसेक मारे घर ली जावु। ने एक जानवर्‌यो मारु, ने रांदु। आज तपी वेळाय हीनु माणसे काजे मे मारे पुठ्‌ये खाणो खावाड़ीस।" 17 युसुफेन वात सामळीन चु पावर तीनु माणसे काजे युसुफेन घर ली ज्‌या।

18 जत्‌यार युसुफेन भायस, युसुफेन घर पुग्‌या, ती चे बीहीन आंबा-सां‌बा कहणे बाजी ज्‌या, "पेहली कावा जे आपणा थयला मां रुप्‌या भरला, करीन जे आपणु काजे धरीन माहीं लाय र्‌या। ने हंय जे माणसे आपणुक ठुक्‌से, ने आपणु काजे कब्‌जा मां करीन गुलाम बणाय लेसे ने आपणा गदड़ा बी हापकी लेसे।" 19 अळतेन चे युसुफेन घरेन बारनान‌चां जाय्‌न युसुफेन घरेन राखवाळ्‌या पावर काजे असा कहणे बाजी ज्‌या, 20 "ए हामरा मालीक, जत्‌यार हामु पेहली कावा दाणा मुल लेणे आवला। 21 ने पछा जाणे बाजी रहला ती वाट्‌येत धरम-साहळा मां हामरा थयला उघाड़्‌या, ती आखान थयलान मुंहडे पर रुप्‌यान एकेक थयलि हतली। ने जतरा रुप्‌या हामु दाणा लेणे करीन आपला ततरात रुप्‌या तीनु थयला मां हतला। तेरेमां हामु चे रुप्‌या पछा लेता आवला छे। 22 काय जाणु, हामरा थयला मां चे रुप्‌या कुण भरलो जाणे? हामु ते अळी दाणा मुल लेणे करीन दीसरा रुप्‌या बी लेता आय र्‌या।"

23 बाकुन पावर तीनुक कह्‌यु, "बीहु मां, बेफीकर्‌या रहु! तुहुंं पेहले मुल लेदला तीना दाणान रुप्‌या ते मेसेक जड़ गुयला। तुंद्‌रे वाटे तुंद्‌रा थयला मां रुप्‌या ते तुंद्‌रु भगवानुत भर्‌यु हसे, जु तुंद्‌रा बासेन बी भगवान छे।" असु कय दीन चु पावर सीमोन काजे जेलेम सी नीकाळीन तींद्‌रे पुठ्‌ये भेसकी देदु।

24 तत्‌यार चु अधीकारी तीना माणसे काजे घर मां ली जाय्‌न पाणी आप्‌यु, तत्‌यार जे आपसान पाय धुया ने; पछेन चु तींद्‌रा गदड़ा काजे चारु आप्‌यु। 25 तत्‌यार ज सामळीन की आज हामुक जांत खाणो खाणु पड़से, चे युसुफेन आवणेन टेम तक, मतलब खयार दाहड़े लग, तीनी भेट काजे आपणे करीन भेळा कर लेदा। 26 जत्‌यार युसुफ घर आयु, ती चे तीयार करली भेट आपणे करीन तेरे अगळ गुया, ने भेट आपीन युसुफ काजे ढंगा वळीन पाये पड़्‌या। 27 अळतेन युसुफ तीनुक पुछ्‌यु, "वारलु छे की? ने तुंद्‌रु बास, जु डाहलु छे, तेरे बारामां तुहुंं मेसेक कहला। चु वारलु छे की? चु हंय लग जीवतेलु छे काय?"

28 चे कह्‌या, "हव, तारु गुलाम, जु हामरु बास छे, चु वारलु छे।" ने असा कयदीन चे ढंगा वळीन युसुफेन पाये पड़्‌या।

29 अळतेन युसुफ आपसा भायस बीन्‌यामीन भीणी भाळीन दीसरा भायस काजे पुछ्‌यु, "तुंद्‌रु छेंडेवलु भायस, तेरे बारामां तुहुंं मेसेक कह्‌या, जुत छे काय?" अळतेन युसुफ, बीन्‌यामीन काजे कह्‌यु, "मारा बेटा, भगवान तारे पर गीण करे करीन।" 30 असु कवतात युसुफेन मन गीणे सी भराय ज्‌यो, ने चु तत्‌यारुत आपसा कपराम जाय्‌न रड़ने बाजी ज्‌यु। 31 अळतेन चु हुगु रय ज्‌यु, ने मुंहडो धुवीन काठु-जीव करीन आपसा भायसेन चां पछु आयु, ने पावर्‌या काजे कह्‌यु, "चालु, हंय खाणो आपु, खाणो खाय लेता।" 32 अळतेन पावर्‌या, युसुफ वाट्‌ये आंग्‌ये, युसुफेन भायस वाटे आंग्‌ये, ने मीसर देसेम वाळा वाटे आंग्‌ये खाणो आप्‌या। काहाकी मीसर देस मां रहण्‌या माणसे ईब्‌री जातीन माणसे काजे वीटळ्‌लु समजतेला। ने भेळा बसीन नी खात्‌ला। 33 युसुफेन भायस काजे उमरेन हीसाबे मटला ने नानला लग गमे-च युसुफ अगळ बसाड़ देदा। जो देखीन चे चकराय ज्‌या, ने आंबा-सांबा भाळने बाजी ज्‌या। 34 युसुफ जो खात्‌लु, चत खाणो तेरेन्‌चां सी पावर्‌या जाहा गाड़तेलु, ने युसुफ बीन्‌यामीन आपसान्‌चां सी पांच गुणा खाणो अदु पुगाड़्‌यु। चे आखा पेट भरीन खादा-पीदा।