1 तीनुत दाहड़ा मां असो हयो की यहुदा आपसा भायस धड़े सी जाती र्‌यु, ने हीरा नावेन एक अदुल्‌लाम मां रहण्‌या माणसे धड़े रह्‌या। 2 चां यहुदा ने सुआ नावेन एक कनानी माणसेन पुरे काजे देख्‌यु; ने तीनी सी ईयाव करीन तेर धड़े गुयु। 3 ची भार पाये हय, ने तेरु एक पुर्‌यु हयु; ने यहुदा तेरो नाव एर पाड़्‌यु। 4 ची अळी भार पाये हय ने अळी एक पुर्‌यु हयु, ने ची तेरो नाव ओनान पाड़ी। 5 अळतेन ची यहुदा सी अळी भार पाये हय, ने तेरु एक अळी पुर्‌यु हयु, ने तेरो नाव ची सेला पाड़ी: ने दीने टेमे चु पुर्‌यु हवलु तीने टेमे यहुदा कबीज नावेन जागा मां रवतेलु। 6 यहुदा ने तामार नावेन एक पुरे सी आपसा मटला पुर्‌या एरेन ईयाव कराड़ देदा।

7 बाकुन यहुदान चु मट्‌लु पुर्‌यु एर यहोवा भगवानेन नीगा मां वारु नी हतलु, तेरेमां यहोवा भगवान तीनाक मार नाख्‌यु। 8 तत्‌यार यहुदा ओनान सी कह्‌यु, "तारी भुजाइस धड़े जा, ने तेर साते देवरुसेन धरमेन काम पुरो करीन आपणा भायस वाटे अवल्‌यात बणाव।" 9 ओनान वीच्‌यार कर्‌यु की, ईनी बायरीन साहरे जी अवल्‌यात हवसे, ची मारी अवल्‌यात नी कह्‌वाये, ने चु तीनी बायर साते जत्‌यार बी सोवसार करतेलु, तत्‌यार चु सोवसार करनेन टेमे जो पाणी पड़तेलो, तीना पाणी काजे भुयमां नाखीन रद कर देतलु। 10 ज काम जु कर्‌यु तेर सी यहोवा भगवान खुस नी हयु; ने हयु तीनाक बी मार नाख्‌यु। 11 यहुदा असु वीच्‌यार कर्‌यु की, मारो असो बीयहाणो छे: कांखुर माय्‌न यहोवा भगवान जसु सेलान भायसेन जीव ली लेदलु, तसुत सेलान बी जीव ली लेसे। तेरेमां यहुदा आपसी उहड़ीस तामार काजे कह्‌यु, "जा, तारा बासेन घर जात रव ने मारा पुर्‌या सेला काजे मटु हवता लग, तारा बासेन घर रांडायली रवजी।" ने तामार आपसे मायके जात रय।

12 अळतेन थुड़ाक दाहड़ा मां यहुदान लाडी मर गुय। जी सुआन पुरे हतली। यहुदा रड़ने-कलेपणेन दाहड़ा पुरा कर लेदु ने अळतेन चु, अदुल्‌लाम सहर मां रहण्‌या आपसा दुस्‌तीदार हीरा पुठी आपसा गाडरान कान्‌या काटाड़ने करीन तीमनाथ सहर मां गुयु। 13 ने तामार काजे असी खबर जड़ी की, "तारु सेसरुस आपणा गाडरा-बुकड़ान कान्‌या काटाड़ने करीन तीमनाथ जाय र्‌यु।" 14 ती ची मन मां वीच्‌यार कर लेदी की, "सेला जुवान ते हय गुयु, बाकुन हंय लग मे तेरी बायर नी बणी।" ने ची, जे रांडायलीन पुथल्‌या पेहेरी रहली, चे पुथल्‌या नीकाळ देदी। ने रंडीन पुथल्‌या पेहेरी लेदी, ने घुमतु करीन, एनेम सहरेन झपला धड़े तीमनाथ सहर जाणेन वाट्‌ये जाय्‌न बस गुय।

15 जत्‌यार यहुदा तीनी काजे देख्‌यु, ती चु तीनीक रंडी समज्‌यु; काहाकी ची आपसीन मुंहड़ो ढाकी रहली। 16 ने यहुदा काजे मालोम नी हतलो की, ची तेरी उहड़ीस छे। तेरेमां यहुदा तेरेन्‌चां जाय्‌न तीनीक कह्‌यु, "मेसेक तारे साते सोवसार करने दे।"

ची बायर कय, "मे तुसेक मारे साते सोवसार करने दीस ती तु मेसेक काय आपसी?"

17 यहुदा जपाप आप्‌यु, "मे बुकड़ाम सी एक बुकड़ी पाठड़ी आपीस।" ची बायर कय, "मे ईनी वात काजे मान लम की, तु मेसेक पाठड़ी बुकड़ी आपसी।" बाकुन जत्‌यार लग तु मारे वाटे पाठड़ी बुकड़ी नी लावे,

"ती लग सांयन हीसाबे मेसेक कांहीन आपी जा।"

18 यहुदा तीनीक कह्‌यु, "मे बुकड़ो नी दी मकलो ती लग तारेन्‌चां सांयन हीसाबे काय मेल जाम?"

ची बायर कय, "मेसेक तारा नावेन सीलठप्‌पु ने चापड़ा बांदणाय दुरी ने तारा हातेम वाळी लाकड़ी आप दे।" ने यहुदा तीनीक जो मांगी चो आप देदु, ने तीनी बायर साते सोवसार कर्‌यु, ने ची भार पाये हय गुय। 19 तत्‌यार ची उठीन जाती रय, ने आपसीन घुमतु छेटे करीन रांडायलीन पुथल्‌या अळी पेहरी लेदी।

20 यहुदा, तीनी बायर काजे बुकड़ी आपणेन वायदु करलु, तीना वायदान अनसारे चु आपसी रकम छुड़ावणे करीन अदुल्‌लाम सहर मां रहण्‌या आपसा दुस्‌तीदार हीरान हाते तीनी बायर काजे एक बुकड़ी गीदल्‌यो आपणे करीन ली मकल्‌यु। बाकुन तीना हीरा काजे ची बायर चां नी जड़ी। 21 तत्‌यार चु चांहान माणसे सी पुछ्‌यु, "हयी रंडी जी एनेमेन वाट्‌ये भीणी फीरीन बठी रहली, ची कां छे?"

चे कह्‌या, "जां ते कुय रंडी नी हतली।"

22 तेरेमां हयु यहुदा धड़े जाय्‌न कह्‌यु, "मेसे ची नी जड़ी; ने तीना जागान माणसे कह्‌या, जां ते काहनी बी रंडी नी हतली।"

23 तत्‌यार यहुदा कह्‌यु, "वारु, ती मारो रकम हेरेन चां रहणी दे, नी ते आपणु काजे माणसे फालतु समजसे; देख, मे बुकड़ीन गीदल्‌यो जां मकली देदलु, बाकुन चो तुसे नी जड़्‌यो।"

24 तीन महना हय जां ने अळतेन काहनुस जी खबर लायु की, "तारी उहड़ीस तामार छीनाळो करली छे; ने ची भार पाये हय रय।"

तत्‌यार यहुदा कह्‌यु, "तीनीक जीवतेली धपाड़ने करीन खयड़े ली आवु।"

25 जत्‌यार तीनीक खयड़े नीकाळ्‌ने बाजी रहला, ती ची कय, "जाय्‌न, मारा सेसराक असा कय देवु की, जीना अदमीन जी रकम छे, तीना अदमी सीत मे भार पाये हवली छे।" ने ची तामार नावेन सीलठप्‌पु ने दुरी ने लाकड़ी देखाड़ीन कय, "ईनी रकम काजे ते देखु! जी रकम कुणीन छे? जु सीलठप्‌पु, ने दुरी कुणीन छे? ने जी लाकड़ी कुणीन छे?"

26 यहुदा तीनुक उळखीन कह्‌यु, "हयु ते मारे सी कमुस गुनेगार छे; काहाकी मे तेरु आपणा पुर्‌या सेला सी ईयाव नी कर्‌यु।" ने हयु तेर भेळे कदी नी सुयु।

27 जत्‌यार तेरो फवरी हवणेन टेम आय, तत्‌यार असो मालम पड़्‌यो की तेरा पेट मां जवळ्‌या पुर्‌या छे। 28 ने जत्‌यार ची पखड़ायणे बाजी गुय, ती एक पुर्‌यान हात बाहरु आयु ने सयाणी तीनान हाते रातलु दुरु बांद देदी, ने कय, "पेहले जत पुर्‌यो पयदा हवलो छे।" 29 जत्‌यार हयु हात सेमटी लेदु, तत्‌यार तेरु भाय पयदा हयु। ती ची पावरनी कय, "तु काहा असलुत नीकळी आयु?" तेरेमां तेरो नाव पेरेस* पाड़्‌यु। 30 अळतेन तेरु भायस जेरे हाते रातलु सुत बांदलु हतलु चु पयदा हयु, ने तेरो नाव जेरह पाड़्‌या।