1 तत्‌यार मे जो आखो अन्‌याय देख्‌यु, जो दाहड़ान हेटो छे। ने असु देख्‌यु की तकलीप सेण करने वाळान आसळा पड़ी र्‌या, ने तीनुक कुय बी सांती देणेवाळो नी हय! अन्‌याय करने वाळान हातेम सक्‌ती हतली, बाकुन तीनुक कुय बी सांती देणेवाळु नी हतलु। 2 तेरेमां मे मरला काजे जे मर गुयला, तीनुक जीवतेला सी हंय लग जीवला छे चो अदुस वारु कह्‌यु; 3 बाकुन तींद्‌रे दुयु जणा सी अदुस वारु जो छे, की हंय लग हयो नी, ने नी जे भुंडा काम काजे देख्‌या जे धरती पर हवे।

4 तत्‌यार मे आखा मेहनतेन काम ने आखा बन्‌ला काम काजे देख्‌यु, जे माणसे आपसा धड़े वाळा सी रीसेन वजे करे। जो बी फालतुत ने मानु वाहळा काजे धरनेन तसो छे। 5 गांडु माणुस छाती पर हात मेकी सुवे, ने मानु चु आपसात जीवन काजे नास करे। 6 मुठ भरीन मनेन सांती दुय मुठ मेहनत सी वारु छे, चे मानु वाहळा काजे धरनेन तसो छे।

7 अळी मे धरती पर जी वात फालतु देख्‌यु। 8 कदी काहनुक माणुस एखलुत रवे, ने तेरा पुर्‌या बी नी हय, ने नी भाय हय, ने चु दाहड़ी मेहनत करीन कमायेत, तेरा मेहनतेन काय बी छेव नी। ने तेरा डुळा धन दवलत सी आफरे नी, चु खुदेन बारामां वीच्‌यार नी करे, की मे जी मेहनत कुणी वाटे करने बाजी रयु, ने काहा खुद काजे सुख सांती सी छेटे करी रयु? "ज बी फालतुत छे, ने दुखी कामेन लेण देणु छे।"

9 एक सी दुय वारु छे, काहाकी तेरा मेहनत सी वारलु फळ जड़े। 10 काहाकी कदी तेरेम सी एक हीटी पड़े, ती दीसरु तीनाक हाकलसे; बाकुन वारु नी तेरे पर जु एखलुत पड़े ने तीनाक काहनु बी हाकलने वाळु नी हय। 11 अळी कदी दुय जणा भेळा सुवे ती चे हुप वाळा रवसे, बाकुन काहनुक एखलु कसु तातु रय सके? 12 कदी काहनुक एखला काजे हाराड़े ती हाराड़ी देय, बाकुन दुय तेर अगळ लड़ाय कर सकसे। जी दुरी तीन दुरीन बणीन रह्‌वे ची छाटीस नी टुटे।

13 अकळ वाळु पुर्‌यु कमजुर हवणे पर बी असा डाहला ने गांडा राजा सी वारु छे, जु अळी सला काजे नी माने, 14 कदी चु तेरा राज करने मां मालदार पयदा हयु, नीते जेल मां सी नीकळीन राजु बण्‌यु हय। 15 मे देख्‌यु की आखा माणसे दाहड़ान हेटा रवणे वाळा ने चालने फीरने वाळा आखा माणसे राजान वारीसदार पुर्‌या पछल चालतेला। 16 तेर पछळ चालने वाळा आखा माणसे गीणाये नी ततरा हतला, तींद्‌रे पर चु मुख्‌यु बन्‌लु। तेबी अगला दाहड़ा मां हवणे वाळा माणसे तेर वजे सी खुसी मां नी रवसे। तेरेमां छाचलीन जो बी फालतुत ने मानु वाहळा काजे धरनेन तसो छे।