अक्कल
1 वारलु नाव आखा कीमती इत्तर सी ने मरनेन दाहड़ु पयदा हवणेन दाहड़ा सी वदु वारु छे।
2 पंगत वाळा घर जाणे सी दुखेन घर जाणु वारु छे; काहाकी आखा माणसेन आकरी जीत छे; ने जु जीवतेलु छे, चु मन लागाड़ीन ईनी वात पर वीच्यार करसे।
3 हासणे सी दुख वारु छे, काहाकी मुंहडा परुन दुख सी मन सुदरे।
4 अक्कल वाळान मन दुख करनेवाळान घर भीणी लागलो रहे बाकुन वीन-अकल्यान मन खुसी मनावणे वाळान घर लागलो रहे।
5 वीन-अकल्या माणसेन गीत सामळने सी अक्कल वाळान धमकी सामळनु वारु छे।
6 काहाकी वीन-अकल्यान हासणु हांडी तळे धपतेला काटान चर-चर सामळायणेन तसो छे, जो बी फालतु छे।
7 छाचलीन लुच्चाई सी अक्कल वाळु बी वीन-अकल्यु हय जाय; ने कामेन अलग सी अळी अधु पयस्या लेणे सी अक्कल नास हय जाय।
8 गांडा माणसेन गीते सामळने सी वारु छे,
की अक्कल वाळु लड़े तीना काजे सामळनु वारु छे।
9 आपणा मन मां उतवाळ सी रीसवायणु नी, काहाकी रीस वीन-अकल्यान जीव-आत्मा मां रवसे।7:9 याकुब 1:19
10 असो नी कवणु, "वीतला दाहड़ा हींद्रे सी काहा वारलु हतला?" काहाकी जी वात तु अक्कल वाळा काजे नी पुछे।
11 जसो वारीसदार मां माल-धन काजे हात करनु वारु छे, तसुत अक्कल काजे हात करनु बी वारु, जीवाय वाटे जो फायदा वाळो छे। 12 धनवान माणसे सांय अक्कल बी राखवाळी करे, ने अक्कलेन ने माहतीन फायदु जु छे, की अक्कल, अक्कल वाळाक जीवतेलु राखे।
13 भगवानेन काम पर नींगा कर; तीनी चीजेक चु वाकु करलु हय तीनाक कुण सुदु कर सके? 14 दुखेन दाहड़े दुख मान, ने सुकेन दाहड़ाम सुख; काहाकी भगवान दुह्यु काजे भेळु मकेलु छे, तेरेसी माणुस आपसे पछेन हवणेवाळी काहनी बी वात काजे समज नी सके।
15 मारा फालतु जीवन मां मे ज आखों काय देख्यु; कुय धरमी आपसा धरमेन काम करतु जाय्न नास हय जाय, ने भुंडु माणुस बुराय करतु जाय्न बेसकी उमर जीवे। 16 आपसा काजे धरमी मां बणावे, ने नी आपसा काजे अधु अक्कल वाळु बणावे; तु काहा आपसान नासेन वजे बणे? 17 अधु भुंडु बी मां बणे, ने नी वीन-अकल्यु बण; तु काहा आपसान टेमे सी पेहेल मरे? 18 जो वारलु छे की तु ईनी वात काजे धरीन राख; ने तीनी वात सी बी हात मां नी हेड़े; काहाकी जु भगवानेन बीहाणो माने चु ईनी आखी गरा सी टळ जासे।
19 अक्कल सी अक्कल वाळा माणसे काजे सहरेन दस हकवाळा सी अधु ताकुत हात करे।
20 छाचलीन धरती पर काहनुक असु धरमी माणुस नी हय जु भलाय करतु हय, ने चु पाप नी कर्यु हय।
21 जतरी वात माणसे कह्वे, तींद्रे आखा पर कांटा घुण लागाड़े, असो नी हवे की तु सामळे की तारु पावर्यु तुसेक सराप आपे; 22 काहाकी तु तारा मन मां जाणे की तु बी बेसकी कावा दीसरा काजे सराप आपलु छे।
23 जो आखो मे अक्कल सी पारखी लेदलु छे; मे कह्यु, "मे अक्कल वाळु हय जाय्स, बाकुन अक्कल मार सी छेटीत रय।" 24 पलो जो छेटे ने बेसको उंडो छे, तेरी वात कुण जाणी सके? 25 मे मारो मन लागाड़्यु की अक्कलेन बारामां जाणी लम; की हेरो ने तेरी वात जाणो, ने जो बी जाण लम की वीन-अकल्या भुंडो काम ने वीन-अक्कल गांडी छे।
26 मे मर्या-सर्याम सी बी अदुस दुखेन एक चीज हेर्यु, मतलब पली बायरी तेरो मन फांद ने जाळ छे ने तेरे हातकड़्या लागला छे, तीना माणुस सी भगवान खुस छे हयुत तेरे सी बची जासे, बाकुन पापी ते नी बचे। 27 देख, सीकाड़न्यु कह्यु, मे जांचणे वाटे मे आंग्ये-आंग्येन वात भेसक्यु, ने जी वात नीकाळ्यु, 28 तीनाक मारो मन हंय लग हेरी र्यो, बाकुन नी जड़्यो। हजार मां सी मे एक माणुस काजे हेर्यु, बाकुन तींद्रेम बी एक बायर बी नी जड़ी। 29 देखु, मे जी अतरी वात देख्यु की भगवान माणुस काजे सुदु बणायु, बाकुन ची बेसकी मटी युजना नीकाळ्यु।