आखान एकुत वाट छे
1 जो आखो काय मे मन लागाड़ीन वीच्यार कर्यु की ईनु आखी ढाकायली वात काजे जाणो, की कसा धरमी माणसे ने अक्कल वाळा माणसे ने तींद्रा काम भगवानेन हातेम छे; माणसे अगळ आखी भातीन वात छे बाकुन चु नी जाणे की चो परम छे की बुराय। 2 आखी वात आखा वाटे एक सारकी छे, धरमी हय नीते भुंडु, भुळा, चुखलु नीते नी चुखलु, चड़ावु करनेवाळु ने नी करनेवाळा, आखान हालत एक जसी रवे। जसी भलास्या माणसेन गती, तसीत पापी माणसेन हालत; जसी सगुन खाणेवाळा हालत, तसीत तेरी जु सगुन खाणे सी बीहे। 3 जो काय दाहड़ान नेचो करे तेरेम एक गुनु छे की आखा माणसेन हालत एक जसी रवे, ने माणसेन मन मां बुराय भरली छे, ने जत्यार लग चे जीवतेला रवे तींद्रा मन मां गांडान तसी छे, ने तेर पछेन मरला भेळे भेसकाय जासे। 4 बाकुन जु आखा जीवला मां छे, तीनाक आसा छे, काहाकी जीवतेलो कुतरो मरला नाहार सी बड़ीन छे। 5 काहाकी जीवतेला ते अतरो जाणे की चे मरसे, बाकुन मरला काहनी वात बी नी जाणे, ने तीनुक अळी काहींग बदलु जड़ जासे, काहाकी तेरु हेर नास हय जाय। 6 तींद्रा परम, बुराय ने तींद्री दुसमनी खत्तम हय गुयली छे, ने हय जो दाहड़ा तळे हवतेलो तेरेम जलम वाटे तींद्रु अळी वाटु नी रवसे।
7 आपसे वाट्ये चालतु जा, ने तारा रुटा खुसी सी खातु रव, ने मन मां सुख मानीन आपसान अंगुरेन रस पीया करे; काहाकी भगवान तारा काम सी खुस हय गुयलु छे। 8 तारा पुथल्या जलम उजल्ळा रवे, ने तारा मुणका पर तेलेन कमी नी रवे। 9 आपसा फालतु जीवनेन आखा दाहड़ा जे दाहड़ा तळे ठेहरावलो छे, आपसी घाटाळी बायर भेळे रह्वे, काहाकी तारो जीवन ने तारो मेहनत मां तीनु दाहड़ा तळे करे तारु जुत हीस्सु छे। 10 जो काम तुसेक जड़े तीनाक आपसान ताकत सी करजी, काहाकी मरलान कळजुग मां जां तु जाणे वाळु छे, नीते काम ने नी युजना ने नी माहती ने नी अक्कल छे।
11 अळी मे दाहड़ा तळे देख्यु की नीते दवड़ मां छाटा दवड़ने वाळा ने नी लड़ाय मां ताकुतवाळा जीतसे; ने नी अक्कल वाळा माणसेक रुटा जड़से ने नी समज वाळाक धन, ने नी ईज्जत वाळा पर दया हवे; चे आखा टेम ने एक दीसरान वस मां छे। 12 काहाकी माणुस आपसान टेम नी जाणे। जसा माछा दुखेन जाळ मां ने चिरला फांद मां फांदाये, तसात माणसे दुखेन टेम मां जो तींद्रे पर उच्कालुन आय जाय ने फस जाय।
अक्कल ने वीन-अकल्यान बारामां वीच्यार
13 मे दाहड़ा तळे हीनी भाती अक्कलेन वात देख्यु, जी मेसेक मटी मालम पड़े। 14 एक नानोस सहर हतलो, तेरेम थुड़ाकुत माणसे हतला, ने काहनुक मटु राजु तीना पर धीयान करीन घेरवी लेदु, ने तीनुक रुकणे करीन बेसका माणसे सी च्यारे मेर हय ज्यु। 15 बाकुन तेरेम एक गरीब अक्कल वाळु माणुस जड़्यु, ने चु तीना सहर काजे आपसान अक्कल सी बचाड़्यु। तेबी काहनु बी तीना गरीब माणुस काजे हेर नी कर्या। 16 तत्यार मे कह्यु, "कदी गरीबेन अक्कल फालतु समजी जाय ने तेरा बुल कुय बी नी सामळे तेबी ताकुत सी मटी ते अक्कल वारु छे।" 17 अक्कल वाळान बुल जे धीरा रयन कवे चे वीन-अकल्यान ईचमां हक करनेवाळा सी आयड़ी-आयड़ीन कवणे सी अधु सामळे। 18 लड़ायन बेसका हतीयार सी अक्कल वारु छे, बाकुन एक पापी बेसकी भलाय नास करे।