युहन्‌ना 14

16 ने मे बास सी दुवा करीस ने चु तुंद्‌रेन्‌चां मारी आवजी पर एक दीसरु सात देण्‌यु मकलसे चु जलम तुंद्‌रे पुठ्‌ये रवसे। 17 मतलब छाचली जीव-आत्‌मा काजे मकलसे। तुहुंं ते तीनाक जाणु, काहाकी चु तुंद्‌रे साते रहे बाकुन आवणे वाळा दाहड़ाम चु तुंद्‌रेत मां रवसे। बाकुन भगवानेन काम रुकण्‌या कळीन माणसे छाचली जीव-आत्‌मा काजे आपसा जीव वाटे जागु नी आपे काहाकी चे तीनाक देख्‌या बी नी ने उळखे बी नी।

18 "मे मरीस बाकुन तुहुंं काजे एखला नाखीन नी जाम मे तुंद्‌रेन्‌चां अळी आवीस। 19 ईतरीक वार अळतेन ईनी कळीन माणसे जे मारे पर भुरसु नी करे चे मेसेक अळी नी देखे बाकुन तुहुंं मेसेक अळी देखसु मे अळी जीवतु हय जायस ने जीवतेलु रवीस ने तुहुंं बी जीवतेला रवसु। 20 मे पछु जीवतु हय जायस तीने दाहड़े तुहुंं समजी जासु की मे मारा बासेम छे, ने तुहुंं मारेम छे, ने मे तुंद्‌रेम छे।

21 "तींद्‌रे भीणी मारी हुकुम छे, चु मारी हुकुम जाणे ने तीनुक पाळे, ने चु मारसी परम राखे, तीनाक मारु बास बी परम राख्‌से ने तीनाक मे बी परम करीस ने मे आपसा काजे तेरे अगळ उजेंतु करीस।"

22 तत्‌यार ईस्‌करीयोती यहुदा नी बाकुन एक दीसरु यहुदा, ईसु काजे पुछ्‌यु "ए मालीक तु हामरे अगळ आपसाक उजेंतु करीस ने ईनी कळीन मनख्‌या पर उजेंतु नी करे?" 23 ईसु तीना यहुदा काजे कह्‌यु, "कदी काहनुक मारे सी परम राख्‌से ती चु मारी सीकाड़ली वात काजे मानीन जीवसे ने मारु भगवान बास तेरे सी परम राख्‌से ने हामु तेरेन्‌चां आवसुन ने तीनाम रवसुन। 24 जी सीकाड़ली वात तुहुंंक आप्‌यी र्‌यु ची आखी वात सीकाड़ली वात मारे वात मारे वावड़ते नी हय बाकुन मेसेक मकलन्‌या भगवान बास सी छे। चु मारे सी परम राखे चु मारी सीकाड़ली वात काजे मानीन नी जीवे ने मे आपसा काजे तेरे अगळ उजेंतु नी करो।"

25 "मे जी आखी वात तुंद्‌रे पुठ्‌ये रय्‌न तुहुंंक कह्‌लु छे। 26 बाकुन चु सात देण्‌यु चुखली-आत्‌मा तीनाक भगवान बास मार नाव सी मकेलसे चु तुहुंंक आखी*14:26 सब वात सीकाड़से ने ज काय बी मे तुहुंंक कह्‌लु छे, च आखो हेर कराड़से।"