1 ने ईसु जेतुनेन बयड़ा* पर जाती र्‌यु। 2 ने चु संदारे एगुत मंदीर मां गुयु। ने आखा माणसे ईसु धड़े आया; ने चु बठीन तीनुक सीकाड़ने बाजी गुयु। 3 तीनी टेमे यहुदी-सास्‌तुर सीकाड़न्‌या ने फरीसी माणसे एक बायर काजे ईसु धड़े धरीन लाया, ची बायर काहनाक साते छीनाळो करतेली ने धर लेदला ने तीनी काजे माणसेन ईचमां उभी करीन ईसु काजे कह्‌या 4 चे यहुदी सास्‌तुर सीकाड़न्‌या ने फरीसी माणसे ईसु सी कह्‌या, "ए मास्‌तर जी बायर छीनाळो* करतेली धराय गुय। 5 मुसु आपसा लिखला कायदान सास्‌तुर मां हामुक हुकुम आप्‌लु छे, की असली छीनाळी बायर काजे दगड़ा दीन मार नाखणु चाहजे। तेरेसी ईनी बायरीन बारामां तारो काय कहंणु पड़े?" 6 चे ईसु काजे पारखणे करीन जी वात कह्‌या, तेरेसी तीनुक ईसु पर गुनु लागाड़नेन काहनुस पुरावु जड़ जाय करीन बाकुन ईसु ढंगु अळीन आंगळे करीन धुळा मां लिखतु रयु। 7 जत्‌यार चे ईसुक पुछता रया ती ईसु उबु हय्‌न तीनुक कह्‌यु, "तुंद्‌रे मां जु कुय काय बी पाप नी कर्‌यु हय चु ईनी बायरीन आखाम सी पेहेल दगड़ु देणु चाहजे।" 8 ने ईसु अळी ढंगु अळीन *धरती पर लिखणे बाजी गुयु। 9 बाकुन ज सामळीन डाहा-बुड़ा सी नानला लग आखान-आखा एकेक करीन जाती रया। ने चां ईसु ने ची बायरी रय गुया। 10 ईसु अळी उबु हय्‌न तीनी बायर काजे कह्‌यु, "ओ बायरी चे माणसे काहा जाती रया? तुसे कुय गुनाळी ठेहरावीन डंड नी आप्‌यो काय?"

11 ची बायर कय, "ए मालीक कुय बी मेसेक डंड नी आप्‌यो।"

ईसु कह्‌यु, "जां मे बी तुसेक डंड नी आपतु जां ने हय सी अळी पाप घुण करजी।"

12 ने अळतेन मंदीर मां माणसे ईसु धड़े अळी भेळा हया, तत्‌यार ईसु तीनाक कह्‌यु, "मे कळीन माणसे वाटे वीजाळो मे छे। ज कुय मारु चेलु बणने करीन मारे पुठ्‌ये आवे चु अमर जीवन मां ली जाण्‌यो वीजाळो हात करसे अतरामा तीनाक पापेन आंदारला मां झटवायतु फीरनु नी पड़े।"

13 फरीसी माणसे ईसुक कह्‌या, "तु आपसात बारामां आपसुत गवा दी र्‌यु। हेरेसी तारी गवाय खरली नी हय।"

14 ईसु तीनुक जपाप आप्‌यु, "मेसेक मालुम छे, की मे कां सी आवलु छे ने कां जाणे बाजी र्‌यु। बाकुन तुहुंं नी जाणता की मे कां सी आवलु छे ने कां जाणे बाजी र्‌यु। अतरामा कदी मे आपसुत मारा बारामां गवा दम; तेबी मारी गवाय खरली छे। 15 तुहुंं ईनी कळीन माणसेन डीलेन अनसारे नीयाव कर र्‌या, बाकुन मे कुय बी असु नीवाय नी करो; 16 ने कदी मे नीयाव करो बी, ते मारु नीयाव छाचलु छे, काहाकी मे एखलु नी हय बास बी छे, चु मेसेक मकेल्‌लु छे। 17 तुंद्‌रा कायदान सास्‌तुर मां बी लिखलो छे, की दुय जणान गवाय छाचली रवे। 18 एक ते मे मारा बारामां गवाय दम ने मारु बास बी मारा बारामां गवाय देय चु मेसेक मकेल्‌लु छे।"

19 ज सामळीन चे ईसु काजे कह्‌या, "तारु बास कां छे।" ईसु जपाप आप्‌यु,

"तुहुंं मेसेक जाणु नी मारा बास काजे कदी मेसेक जाणु ती मारा बास काजे बी जाणु।"

20 ईसु मंदीर मां दान पेटी धड़े सीकाड़तु जाय्‌न जी आखी वात कह्‌यु, तेबी कुय बी ईसुक नी धर्‌या, काहाकी हय लग ईसुन मरने टेम नी आय, जी टेम भगवान नक्‌खी करलु।

21 ईसु अळी एक कावा माणसे काजे कह्‌यु, "मे जात रय्‌स, ने तुहुंं मेसेक हेर्‌या करसु, बाकुन तुहुंं तुंद्‌रा पापेन माफी हात कर्‌या बीगुर तुंद्‌रा पाप मां मर जासु। ने चां जात रय्‌स चां तुहुंंक कदी नी आवाये।"

22 जी वात सामळीन यहुदी माणसे कह्‌या, "जु असु काहा कय रयु, जां मे जात रय्‌स चां तुहुंंक कदी नी आवाये हेरो ज कहंणेन मतलब काय छे? कांखुर मायन जु जाणी बुजीन मरने ते नी हींडी र्‌यु?" 23 ईसु तीनु काजे कह्‌यु, "तुहुंं सरगे सी नेचा ईनी धरती वाळा छे; तुहुंं कळीन छे, ने मे ईनी कळीम वाळु नी हय। 24 तेरेमां मे तुहुंंक कह्‌यु, की तुहुंं तुंद्‌रा पाप मां मरसु काहाकी कदी तुहुंं भुरसु नी करु की मे हयुत छे ती तुंद्‌रा पाप मां मरसु।"

25 ज सामळीन चे माणसे ईसुक कह्‌या, "तु कुण छे?" ईसु तीनुक कह्‌यु, "हयुत छे सुरु सी तुंद्‌रे सी कह्‌तु आय र्‌यु। 26 तुंद्‌रा बारामां मेसेक बेसको काय नीयाव करनु छे। बाकुन मारु मकेलने वाळु छाचलु छे, ने ज मे तेरे सी सामळळु छे, चोन ईनी कळीन माणसे काजे सामळावो।"

27 ईसु ते तीनु काजे भगवान बासेन बारामां कहंणे बाजी रवलु, बाकुन ची वात तीनुक पल्‌ले नी पड़े। 28 तत्‌यार ईसु कह्‌यु, "जत्‌यार तुहुंं माणसेन पुर्‌या काजे ती जाणसु की मे हयुत छे; मे मारी मरजी सी काय बी नी कहो बाकुन जसु मारु बास मेसेक सीकाड़लु तसुत जी वात कहो। 29 मेसेक मकेलने वाळु मारे पुठ्‌ये; चु मेसेक एखलु नी मकल्‌यु काहाकी मे जलम चत काम करो तीनाक गमे च।"

30 ईसु जी वात कहंणे बाजी रवलु, ती बेसका माणसे तेरे पर भुरसु करने बाजी गुया।

31 जे यहुदी माणसे ईसु पर भुरसु कर्‌या, तीनुक कह्‌यु, "कदी तुहुंं मारा बुल मांनीन रवसु, ती छाचलीन मारा चेला बण जासु। 32 तुहुंं छाचाय काजे जाण लेसु, ने छाचाय तुहुंंक गुलामी मां सी छुड़ाय देसे।"

33 चे ईसु काजे कह्‌या, "हामु ते अब्‌राहमेन अवल्‌यात छे, ने हामु कदी काहनान बी गुमाली नी कर्‌या। ती तु असु कसु कह्‌वे की छाचाय तुहुंंक गुलामी मां सी छुड़ाय देसे।"

34 ईसु तीनु काजे कह्‌यु, "मे तुहुंंक छाचलीन कहं, जु पाप करे चु पापेन गुलाम छे। 35 एक घरेन पावर्‌यान बारामां वीच्‌यार करु। मालीकेन पावर्‌यु नी बाकुन मालीकेन खरलु बेटुस घरेन हकदार्‌यु छे, ने चु अतरुत घर मां जलम रय सके, 36 हेरेसी कदी पुर्‌यु तुहुंं काजे पापेम सी छुड़ावसे ती तुहुंं छाचलीन पापेन गुलामी मां सी छुट जासु। 37 मे जाणो की तुहुंं अब्‌राहमेन अवल्‌यात छे; तेबी मारो बुल तुंद्‌रा डील मां जागु नी हेरे, तेरेमां तुहुंं मेसेक मारने हींडी रया। 38 तुहुंं चत कय रया च मेसेक मारु बास देखलु, ने तुहुंं च करु च तुंद्‌रा बास सी तुहुंं सामळ्‌या।"

39 चे ईसु काजे जपाप आप्‌या, "हामरु बास ते अब्‌राहम छे।" ईसु तीनुक कह्‌यु,

"कदी तुहुंं अब्‌राहमेन अवल्‌यात रवता ती चत काम करता च अब्‌राहम करलु। 40 बाकुन हय तुहुंं मारेन तसला माणसे काजे मारने हींडी रया, चु तुहुंंक च खरलो बुल बताड़लु चु भगवान सी सामळ्‌या असो ते अब्‌राहम नी कर्‌यु। 41 तुहुंं ते खरला बासेन तसु नी, बाकुन तुंद्‌रा दीसरा बासेन तसु वेहवार कर रया।"

चे ईसु काजे कह्‌या, "हामु छीनाळा सी पयदा नी हया; हामरु एकुत बास छे, ने चु भगवान छे।"

42 ईसु तीनु यहुदी माणसेक कह्‌यु, "भगवान तुंद्‌रु बास नी हय। कदी भगवान तुंद्‌रु बास रवतु, ती तुहुंं मेसेक उळखीन परम करता काहाकी मे मारी मरजी सी नी आयु। बाकुन भगवान मेसेक मकेल्‌लु छे। करीन मे भगवान बासेम सी नीकाळीन आवलु छे, ने मे हय जां हजुर छे। 43 तुहुंं मारी वात काहा नी समजु? तेरेमां की तुहुंं मारो बुल सामळी नी सकु। 44 तुहुंं आपसा बास भुतड़ा सी छे, ने आपसा बासेन मरजी काजे पुरी करने हींडी र्‌या। हयु ते पेहलुत सी हत्‌यारु छे, ने छाचलु बणीन नी रयु, काहाकी छाचाय तेरेमां हय नी। जत्‌यार हयु झुट बुले, ती आपसा हीयान मनेम सी बुले, काहाकी हयु झुटु अतरुत नी हय, बाकुन आखी भातीन झुटेन बास झुटु छे, 45 बाकुन मे ज छाचलीन कह्‌वो, तुहुंं माणसे मारे पर भुरसु नी करु। 46 तुंद्‌रे मायन कुण मेसेक पापी कहें? काय कदी मे छाचलीन कहं, ती तुहुंं मारु भुरसु काहा नी करु? 47 जु भगवान भीणी सी छे, ने भगवानेन वात काजे सामळे। तेरेमां तुहुंं मारी वात काजे नी मानु, तुहुंं भगवान भीणी सी नी हय।"

48 ईसुन वात सामळीन यहुदी माणसे रीसवायन ईसु काजे कह्‌या, "हामु ते छाचलीन कय र्‌या की, तु सामरी जातीन छे, ने तारे भुतड़ु चस्‌टी र्‌यु?"

49 ईसु तीनुक जपाप आप्‌यु, "मारे भुतड़ु नी चस्‌टी र्‌यु। बाकुन मे मारा बासेन अबरु राख र्‌यु ने तुहुंं मारु अबरु ली रया। 50 मेसेक मारी ईज्‌जत नी चाहजे, बाकुन एक जणु छे, चु मारु अबरु राखणेन हेर कर रयु, ने हयुत छाचलु नीयाव करन्‌यु छे। 51 मे तुंद्‌रे सी छाचलीन कहं, ज कुय माणुस मारा बुल काजे मानीन चालसे चु कदी नी मरे।"

52 जी वात सामळीन यहुदी माणसे ईसु काजे कह्‌या, "हय हामुक पक्‌को मालम पड़ गुयो की, तारे भुतड़ु चस्‌टी रयु। अब्‌राहम मर गुयु ने भगवानेन अघली वात बताड़न्‌यु मर गुयु, ने तु ज कय रयु की जु कुय मारा बुल काजे मानीन चालसे चु कदी नी मरे। 53 हामरा डाहा बुड़ान बास अब्‌राहम ते मर गुयु, ने भगवानेन अघली वात बताड़न्‌या बी मर गुया, तु अब्‌राहम सी मटु छे काय? तु आपसा काजे काय समजी रयु? तु कुण छे?" 54 ईसु जपाप आप्‌यु, "कदी मे मारीत ईज्‌जत करो ती तीनी ईज्‌जतेन काय बी दाम नी रवे। बाकुन मारी ईज्‌जत करन्‌यु मारु बास छे तीनाक तुहुंं कहुं की चु तुंद्‌रु भगवान छे। 55 तुहुंं ते तीनाक कदी नी उळख्‌या; ने कदी मे कहं की मे तीनाक कदी नी उळखो, ती ते मे तुंद्‌रेन तसु लुच्‌चु कहं; बाकुन मे तीनाक उळखो ने तेरा बुल पर चालो। 56 तुंद्‌रु बास अब्‌राहम मेसेक देखणे करीन मारे आवणेन दाहड़ाम वाट देखीन खुस हय गुयलु; ने चु मेसेक देखी बी लेदु ने खुस हय गुयु।"

57 जी वात सामळीन यहुदी माणसे ईसुक कह्‌या, "हय लगुन तारी उमर पचास साल बी नी हय ने तु असु कसु कय रयु की मे अब्‌राहम काजे देखलु छे?"

58 ईसु तीनुक कह्‌यु, "मे तुहुंं काजे छाचलीन कहं अब्‌राहम पयदा नी हयु तेरे सी बी पेहलुन मेत छे।"

59 ज सामळीन यहुदी माणसे ईसुक मारने करीन दगड़ा* ईछी लेदा बाकुन ईसु मंदीर मां सी कळेन जाती र्‌यु।