1 तीनी टेम मां थुड़ाक माणसे ईसु काजे तीनु गलील ईलाकान माणसेन बारामां कह्‌वणे आय गुया, चे यरुसलेमेन मंदीर मां जनवार्‌या मारीन बादा चड़ावणे आवला, पीलातुस तीनु सीपायड़ान साहरे माराय्‌न तींद्‌रो लुही तींद्‌रा बादा चड़ावला जनवार्‌यान लुही मां भेसकी देदलु। 2 ईसु तींद्‌री खबर सामळीन तीनुक कह्‌यु, "गलील ईलाका मां रवण्‌या दीसरा आखा माणसे सी ज माणसे जादा पापी हतला, ने एरेन करीन हींद्‌रे पर गरा आय पड़ी, असा तुहुंं समजी र्‌या काय। 3 मे तुहुंंक कहो, असो हय; बाकुन कदी तुहुंं पापेम सी मन फेरवीन भगवान सुदा नी अळु, ती आखा हींद्‌रेन तसात मरीन सर जासु।" 4 चे दुय कम वीस माणसे पर सीलोम नावेन मुंडेरी पड़ी ने दड़पाय्‌न मर गुया, चे यरुसलेम सहर मां रवण्‌या दीसरा माणसे सी जादा गुनाळा हतला, असा तुहुंं समजी र्‌या काय? 5 मे तुहुंंक कहो असो नी हय; बाकुन कदी तुहुंं पापेम सी मन फेरवीन भगवान सुदा नी अळु, ती आखा हींद्‌रेन तसात मरीन सर जासु।

6 ती ईसु ज दाखलु सामळायु, "काहनाक माणसेन अंगुरेन वाड़ी हतली, तीनी अंगुरेन वाड़ी मां एक अंजीरेन झाड़को हतलो। चु तीना अंजीरेन झाड़का पर फळ हेरने करीन आयु, बाकुन तीनाक एक बी फळ नी जड़्‌यो।✝ 7 ती चु अंगुरेन वाड़ी मां काम करन्‌या माणसे काजे कह्‌यु, देख, मे तीन साल लग ईना अंजीरेन झाड़कान फळ हेरने आय र्‌यु, बाकुन मेसेक एक बी फळ नी जड़्‌यो। ईनाक काट नाख काहाकी ज झाड़को ईना जागाक फालतु रुक र्‌यो? 8 बाकुन वाड़ी मां काम करन्‌यु माणुस कह्‌यु, ‘मालीक! ईने साल बी ईनाक रहणे दे। मे एरे चारेमेर खुदीन खद भरीस। 9 कदी ज आवणे वाळा साल फळे ती, वारु छे, नी ते ईनाक काटाड़ नाख्‌जी।’"

10 ईसु एक भगवानेन भक्‌तीन घर मां आरामेन दाहड़े माणसे काजे वात सामळावणे बाजी रवलु। 11 चां बेसका यहुदी-माणसे भेळा हय रवला। चां एक बायर बी हतली, तीनी बायरीन मांदी पाड़नी भुतड़ान आत्‌मा चस्‌टी रवली। ची तीनी बायर काजे ढंगी आळ देदली, ने ची काहली बी रीत सी सुदी उबी नी हवतेली। ने ची बायर दुय कम बीस साल लग ढंगी-ढंगी चालतेली। 12 ईसु तीनीक देखीन धड़े बुलायु, ने तीनीक जुर सी कह्‌यु, "वो बायर, तु हय मांदवाड़ मां सी छुटीन, वारलु हय गुय!" 13 ईसु तेरे पर हात मेक्‌यु, ने तत्‌यारुत ची सुदी हय गुय, ने भगवानेन बड़ाय करने बाजी गुय।

14 तीना भगवानेन भक्‌ती करन्‌या घरेन मुख्‌यु रीसाय गुयु, काहाकी ईसु तीनी बायरी काजे आराम करनेन दाहड़े वारु करलु। यहुदी-माणसे आराम करनेन दाहड़े काहनो बी काम करनु गलत समजतेला। हेरेसी चु मुख्‌यु, माणसेक कह्‌णे बाजी गुयु, "हाप्‌ता मां काम करने वाटे छव दाहड़ा छे, तीनु छव दाहड़ा मां काम करनु चाहजे। अतरा ईनु छव दाहड़ा मायन काहने बी दाहड़े आवीन वारु हवु, बाकुन आरामेन दाहड़े वारु हवणे करीन घुण आवु।"✝

15 जी वात सामळीन मालीक ईसु जपाप आप्‌यु; ए ढंगड़ा करन्‌या कदी तुंद्‌रु बेल नी ते गदड़ो पीसलो हय, ती तुहुंं तीनाक आरामेन दाहड़े बी पाणी पीवाड़ने खुटे सी नी ली जावु काय? 16 जी बायर ते आपणा माणसे मायन छे। जी बायर बी अब्‌राहमेन पुरे छे, हीनीक मांदी पाड़नी भुतड़ान आत्‌मा दुय कम बीस साल लग चस्‌टीन आपसा कब्‌जाम कर रवली। आराम करनेन दाहड़े हेरेमां सी मांदु करन्‌यु भुतड़ु छेटु करनु, वारु नी हय काय? 17 ईसुन जी वात सामळीन ईसुन वीरुद करन्‌या आखा माणसे लाजवाय गुया, बाकुन दीसरा आखा माणसे, ईसु बेसकु वारु काम कर्‌यु, करीन बेसका खुस हय गुया।

18 ईसु कह्‌यु, "भगवानेन राज कुणीन तसों छे? मे ईना राज काजे काहने चीजे करीन तुलो? 19 च रायन एक बीजेन तसों छे, तीनाक काहनुस माणुस ली जाय्‌न आपसा खेतेम एर देय। ने च वदतो-वदतो झाड़को बण गुयो। ने सरगेन चिरला तेरा डाळ्‌या मां आवीन पुत्‌रा बणावीन रवणे बाजी गुया।"✝

20 ईसु अळी कह्‌यु, "मे भगवानेन राज काजे काहने चीजे सी तुलो? 21 भगवानेन राज तीना खाण्‌या-सुडान तसु छे, तीनाक लीन काहनीक बायर तीन चोवकी पीठा मां भेसकी, ने आखु पीठान जेवणु आय गुयु।"✝

22 ईसु सहरे-सहरेम, ने गांव-गांव वात सीकाड़तु जाय्‌न यरुसलेम भीणी जाणे बाजी रवलु। 23 काहनुक माणुस हीनाक पुछ्‌यु, "ए मालीक! छुटकारु हात करन्‌या थुड़ाक माणसे छे काय?"

ने ईसु तीनुक कह्‌यु, 24 साकेड़ले बारने मायन भगवानेन राजेम भरायणेन पुरी-पुरी कुसीत करु, काहाकी मे तुहुंंक कहो बेसका छे माणसे भगवानेन राजेम भरायणे करसे, बाकुन भराय नी सके। 25 जत्‌यार घरेन मालीक उठीन बारनो बन्‌द कर देदु हय, ने तुहुंं बाहर उबा रवीन बारनो ठुकीन कह्‌वणे बाजी जासु, मालीक! हामरे वाटे बारनो उघाड़ दे। ती चु तुहुंंक कह्‌वसे, तुहुंं कुण छे मेसेक नी मालुम हय। 26 ती तुहुंं कह्‌वणे बाजी जासु, हामु तारे अगळ खादा पीदा ने तु हामरा हाटेम वात सीकाड़तेलु! 27 बाकुन चु तुहुंंक कह्‌वसे, तुहुंं कुण छे च मेसेक नी मालुम हय, ए आखी भातीन पाप करन्‌या! तुहुंं आखा मारेन्‌चां सी छेटे हय जावु! 28 जत्‌यार तुहुंं अब्‌राहम, ने इसाक, ने याकुब ने भगवानेन अघी सी आवणे वाळी वात आखा माणसे काजे भगवानेन राज मां देखसु, बाकुन आपसे काजे बाहार नीकाळता देखसु, ती तुहुंं कलपी-कलपीन रड़सु ने दात काजे ककड़ावता रवसु। 29 उगेवणा ने बुडवणा सी, धुराव ने दखणाव सी माणसे आवसे ने भगवानेन राजेन पंगत मां भेसकायसे।✝ 30 ने देखु, जे पछळ छे, "चे अगळ हय जासे ने थुड़ाक जे अगळ छे, चे पछळ हय जासे।"

31 तीनी टेमे थुड़ाक फरीसी माणसे आवीन ईसुक कह्‌या, "जां सी नीकळीन जाती रव, काहाकी हेरोदेस राजु तुसेक मारने कर रयु।"

32 ईसु तीनुक कह्‌यु, "जाय्‌न तीनी फुंदाळी खुखड़ीक कय देवु: मे आज ने वाहणे माणसे मां भरायला भुतड़ान आत्‌मा काजे छेटु करीस ने मांदलाक वारु करीस ने तीसरे दाहड़े काम पुरो कर दीस।" 33 तेबी मेसेक आज, ने वाहणे ने परुनदाहड़े काम करतुत रवणु छे, काहाकी असो हय नी हय सके की काहनु बी भगवानेन अघी सी आवणे वाळी वात बताड़ने वाळा काजे यरुसलेम सहर छुड़ीन दीसरे जागे मारे।

34 ए यरुसलेम! ए यरुसलेम! तु भगवानेन अघी सी आवणे वाळी वात बताड़ने वाळा काजे मार नाखे ने भगवान तीनु माणसे काजे तारे धड़े मकेल्‌लु तीनु माणसे काजे बी तु दगड़ाटीन मार नाखे। जसी कुकड़ी आपसा पीच्‌या काजे आपसा पाखड़ा तळे भेळा कर लेय, तसुत मे बेसका कावा तारी अवल्‌यात काजे मारा पाखड़ा तळे भेळा कर लेय, बाकुन तुहुंं मारु नीकारु कर देदा। 35 देखु, तुंद्‌रो घर उजड़लो छुट जासे। ने मे तुहुंंक कहो, तुहुंं मेसेक तत्‌यार लग नी देखु, जत्‌यार लग तुहुंं ज नी कहुं, बरकतवाळु छे चु, जु मालीक भगवानेन नाव सी आवे!✝