ईसु मसी पेहला चेलाक बुलावे
1 एक दाहड़ु ईसु गन्नेसरत5:1 ईना काजे गलील बी कह्वे दरीया धड़े उबु हय रवलु, ने माणसे भगवानेन वात सामळने करीन हुड़ु-हुड़ु आवतेला, ने धकलाय्न तेरे पर पड़े असा हय जातला। 2 तीनी टेमे चु दरीया धड़े दुय ढंड्या उबा कर रवला देख्यु, ने काहर्या ढंड्याम सी उतरीन जाळ धुवणे बाजी रवला। 3 तीनु ढंड्या मायन एक ढंड्यो सीमोनेन हतलो, तीना ढंड्या मां भरायन ईसु असु कह्यु, ईना ढंड्याक धड़े सी थुड़ाक उंडा पाणी मां ली जावु। तत्यार चु तीना नानला ढंड्याम बसीन माणसेक सीकाड़ने बाजी गुयु।
4 जत्यार ईसु सीकाड़ी दीन नवराय गुयु, ती ईसु सीमोन काजे असु कह्यु, "ढंड्यो अळी उंडास पाणी मां ली जावु, ने माछा मारने करीन आपणी-आपणी जाळ नाखु।"
5 ती सीमोन्यु असु कह्यु, "ए मालीक! हामु आखी रात माछा मारने करीन मेहनत कर्या, बाकुन ईतराक माछा बी नी धराया; तेबी तु कह्वे, ती मे माछा धरने करीन पाणीम जाळ नाखीस।" 6 जत्यार सीमोन्यु ने तेरा साते वाळा काजे ईसु कह्यु तसा कर्या ती तीनुक बेसका माछा धराय गुया, ने माछान भारे तींद्री जाळ फाटणे बाजी गुय। 7 तत्यार चे तींद्रा साते वाळा काजे जे दीसरा ढंड्या मां हतला, तीनु काजे हात पालवीन मदत करने बुलाया, ने चे साते वाळा आवीन दुय ढंड्याम माछा ढीक लागाड़ीन भर लेदा, ने चे ढंड्या डुबे-डुबे तसा हय गुया। 8 ज देखीन सीमोन्यु पतरस ईसुन पाये मां हीट पड़्यु, ने असु कह्यु, "ए मालीक मे ते पापी माणुस छे, अळी तु मार सी छेटे रव।"
9 जाळेम बेसका माछा पड़ गुया, करीन चु ने तेरा साती चकराय गुया। 10 अळी तसात जब्दीन पुर्या याकुब ने युहन्नु बी चकराय गुयु चे सीमोनेन साती हतला। ने तत्यारुत ईसु सीमोन काजे असु कह्यु, "बीहे मां, हय सी तु माछा काजे नी धरे, बाकुन माणसे काजे मारा चेला बणावणे करीन भेळा कर्या करसी।"
11 चे ढंड्या काजे दरीया धड़े ली आया, ने माछा धरनेन धंदा सुदे, आखो छुड़ दीन ईसु पछळ चाल पड़्या।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)