ईसु रांडायलीन जुवान पुर्या काजे जीवतु करे
11 दीसरे दाहड़े, ईसु नाईन नावेन सहर मां गुयु। ईसुन चेला ने माणसेन एक मट्लु टुळु बी ईसु साते हतली। 12 जसा चे सहरेन बारना धड़े पुग्या, तीनुक थुड़ाक माणसे सोवताळ जागा मां आवतेला भेळा हया। चे एक मरला माणसे काजे गाड़ने ली जाणे बाजी रवला। मरलु माणुस एक रांडायली बायरीन एकुत पुर्यु हतलु। माणसेन एक मट्लु टुळु रांडायली साते हतलु। 13 तीनीक देखीन मालीक ईसु काजे बेसकी दया आवी। ने ईसु तीनीक असु कह्यु, "रड़े मां।" 14 तत्यार चु सीवड़ी धड़े गुयु ने सीवड़ी काजे धर्यु। सीवड़ी हाकलने वाळा उबा रय गुया। तत्यार ईसु मरला काजे कह्यु, "ए जुवान उठ!" 15 मरलु तत्यारुत उठीन बसी गुयु, ने वात करने बाजी गुयु! ईसु तीनाक तेरी मायन सुपरुत कर देदु।
16 आखा माणसे बेसका जबर बीही गुया, चे भगवानेन बड़ाय करता जाय्न असा कह्या, "भगवान आपसे वाटे माणुस काजे हामरे मां सी उबु करलु छे। छाचलीन भगवान आपसुत, आपसा माणसेक बचाड़ने आवलु छे!"
17 ईसुन ईना वारु कामेन खबर आखा यहुदा जीला मां, ने आड़े-धड़ेन आखा जागा मां जाती रया।
/images/a/WG5FS9VaSWVnVmV3VI8yP)
/images/a/Tcg2NiV7ce24OT6kCIQGR)