ईसु पाणी पर चाले
22 तत्यार हयु तत्काल हेरा चेला काजे ढंड्या पर चहड़ने करीन कह्यु, मे माणसे काजे मकलो चां लग पली धड़े जाती रवु। 23 चु माणसे काजे मकलीन, दुवा करने करीन बयड़ा पर जाती र्यु; ने सांतु लग ईसु चां एखलुत हतलु। 24 तीनी टेमे14:24 समय ढंड्यो दरीयान ईचमां सहर सी बेसके छेटे हतलो ने लहर सी अथोन-अथो हालतेलो, काहाकी आहळो सांबो सी आवतेलो।
25 ने ईसु कुकड़ा वासणीक पाणी पर चालीन तींद्रे भीणी आयु। 26 चेला ईसु काजे पाणी पर चालीन आवतेलु देखीन घाबराय गुया। ने आयड़ीन कह्या, "जु ते भुतड़ु छे करीन!" ने बीही गुया जुर सी आयड़ने बाजी गुया।
27 तत्यार ईसु तीनुक कह्यु, "हिम्मत राखु! मेत छे, बीहु मां।"
28 पतरस ईसु काजे कह्यु, "ए मालीक, कदी तुत छे, ती मेसे तारे धड़े पाणी पर चालीन आवणेन हुकुम आप।"
29 ईसु हुकुम कह्यु, "आव!" तत्यार पतरस ढंड्या पर सी उतरीन ईसु भीणी पाणी पर चालीन जाणे बाजी गुयु। 30 बाकुन आहळी काजे देखीन बीही गुयु, ने जत्यार डुबणे बाजी गुयु ती आयड़ीन कह्यु, "ए मालीक मेसे बचाड़!"
31 ईसु तत्यारुत हात अगु करीन तीना काजे धर लेदु, "ने कह्यु, ए कम भुरसु करन्या, तु काहा संक्या कर्यु?" 32 जत्यार ईसु पतरस भेळु ढंड्या मां चड़ गुयु, ती आहळी हुगी रय गुय। 33 तेरेमां जे ढंड्या बठी रवला चेला ईसुन पाये पड़ीन आंध्या ने कह्या, "छाचलीन, तु भगवानेन पुर्यु छे।"
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)