1 छव दाहड़ा हय गुया ने अळतेन ईसु पतरस ने याकुब ने तेरा भायस युहन्‌ना काजे पुठ्‌ये ली लेदु, ने तीनुक अगु एक मटला बयड़ा पर ली गुयु। 2 तींद्‌रे अगळ ईसुन सीकु बदली गुयु, ने तेरो मुंहडो दाहड़ान तसों चमकणे बाजी गुयो, ने तेरा पुथल्‌या वीजाळान तसा चमकणे बाजी गुया। 3 ने तीनु चेला काजे मुसु ने एलीयु ईसु साते वात करतेला देखाव पड़्‌या।

4 तेरेसी पतरस ईसु काजे कह्‌यु, "ए मालीक, आपणो जां रहणु वारु छे! कदी तारी मरजी हय ती मे जां तीन खपड़ी बणाय दम; एक तारे वाटे, ने एक मुसा वाटे, ने एक एलीया वाटे।"

5 चु ज कवणेत बाजी रवलु ने एक वीजाळो आदळो तीनुक ढाक लेदो, ने तीना आदळा मां सी ज सामळ्‌या, "जु मारु लाटेक्‌लु पुर्‌यु छे, हेरेसी मे बेसकु खुस छे: हेरीत वात सामळीन मानु!"

6 चेला असा सामळीन मुंहडान भुरसे पड़्‌या, ने बेसका बीही गुया। 7 तत्‌यार ईसु धड़े आवीन तीनुक कह्‌यु, "उठु, बीहु* मां।" 8 तत्‌यार चे उचा भाळ्‌या, ती चां ईसु अतरुत देखाव पड़्‌यु।

9 जत्‌यार ईसु तीने बयड़े सी उतरने बाजी रवलु ती तीनु चेलाक हुकुम आपीन असु कह्‌यु, "जत्‌यार लग माणसेन पुर्‌यु मर्‌या-सर्‌याम सी जीवतु नी हवे, तत्‌यार लग ज काय बी तुहुंं देखला छे च कुय काजे घुण कह्‌वु।"

10 मरनेन वात काटणे करीन चेला ईसुक असा पुछ्‌या, "ती यहुदी नीयमेन मास्‌तर्‌या काहा कह्‌वे की एलीयान पेहेल आवणु टाकलो छे?" 11 ईसु तीनुक जपाप आप्‌यु, "हव, असो लिखलो छे की एलीयु छाचलीन आवसे, ने आखो काय सुदारसे। 12 बाकुन मे तुंद्‌रे सी कह्‌वो, की एलीयु आय गुयु, ने माणसे तीना काजे नी उळख्‌या; बाकुन जसों चाह्‌या असोत तेरे साते कर्‌या। हीनी रीत सी माणसेन पुर्‌यु बी हींद्‌रे हात सी दुख हाकलसे।"

13 तत्‌यार चेला ज समजी गुया की ईसु आपणु काजे युहन्‌ना बपतीस्‌मा आपणे वाळान बारामां कवणे बाजी रयु।

14 ने जत्‌यार ईसु ने तीन चेला बयड़े सी उतरीन माणसेन टुळु वाट देख रवलु ती, ती एक माणुस ईसु धड़े आयो, ने मांडा टेकीन कह्‌यु, 15 "ए मालीक, मारा पुर्‌यु पर दया कर! काहाकी तीना काजे मीरगीन मांदवाड़ छे, ने चु बेसकु एला करे; ने पछुत-पछु आकठा मां ने पाणी मां पड़ जाय। 16 मे हीना काजे तारा चेला धड़े लावलु, बाकुन चे वारु कर नी सक्‌या।"

17 तीनाक असु कवतेला सामळीन ईसु चां भेळा हय रवला आखा माणसेक कह्‌यु, "ए भुरसु नी करने वाळा, मे कत्‌यार लग तुंद्‌रे साते रवीस? कत्‌यार लग तुहुंंक सेण करतु रवीस? हीना पुर्‌या काजे मारे धड़े लावु।" 18 तत्‌यार ईसु तीना भुतड़ान आत्‌मा काजे लड़्‌यु, ने ची तीना पुर्‌या मां सी नीकळी गुय; ने चो पुर्‌यो तत्‌यारुत वारु हय गुयो।

19 अळतेन ईसु एखलुत हतलु तत्‌यार हेरा चेला आवीन तीनाक पुछ्‌या, "हामु हीना भुतड़ा काजे काहा नी नीकाळ सक्‌या?" 20 ईसु तीनुक कह्‌यु, "तुंद्‌रा भुरसु नी हवणेन वजे सी, काहाकी मे तुंद्‌रे सी छाचलीन कह्‌वो, कदी तुंद्‌रु भुरसु रायन दाणान बराबर बी रवसे, ती हीना बयड़ा सी कवसु, जां सी सरकीन वां जाती रव, जां सी सरकीन छेटु हय जासे; ने काय बी वात तुंद्‌रे वाटे नी हवे असी नी रवे। 21 बाकुन जी भुतड़ान जातीन दुवा* ने उपास पाखुर नी नीकळे।"

22 जत्‌यार चे भेळा हय्‌न गलील जीला मां आया, ती ईसु हींद्‌रे सी कह्‌यु, "माणसेन पुर्‌यु माणसेन हात मां धराय जासे। 23 ने माणसे तीनाक मार नाखसे, ने चु तीन दाहड़ा मां मर्‌या-सर्‌याम सी जीवतु हय जासे।"

ज सामळीन चेला काजे बेसको दुख लाग्‌यो।

24 तत्‌यार चे कफरनहुम सहर मां गुया ती मंदीरेन फाळु मांगणे वाळा पतरस धड़े आवीन पुछ्‌या, "तुंद्‌रु मास्‌तर मंदीरेन फाळु नी आप्‌तु काय?" 25 पतरस कह्‌यु, "हव, आपे।"

जत्‌यार चु घर मां आयु, ती ईसु पतरस काजे पुछणे सी पेहलुत ईसु तीना काजे पुछ्‌यु, "ए सीमोन तु काय वीच्‌यार रयु? हीनी कळीन राजा फाळु काहना माणसे सी लेय आपसान पुर्‌या सी की दीसरा माणसे सी फाळु लेय?" 26 पतरस ईसु काजे कह्‌यु, "दीसरा माणसे सी।" ईसु पतरस काजे कह्‌यु, "ती पुर्‌या काजे फाळु नी आपणु पड़े। 27 बाकुन तेबी आपणु हीनु माणसे काजे नराज नी करता, तु दरीया धड़े जाय्‌न गळी नाख, ने जी माछी पेहेल नीकळे, हीनीक लीन; तेरो मुंहडो उघाड़ने सी तुसे काजे एक सीक्‌कु जड़से, तीना सीक्‌का काजे लीन मारे ने तारे वाटेन करीन आप देजी।"