1 ओ मारी घाटाळी, ओ मारी लाडी,

मे आपणी वाड़ी मां आवलु छे,

मे मारो गंदरस ने बलसान भेळो कर लेदु;

मे मुहाळेन रस भेळु छातड़ो खाय लेदु,

मे दुद ने अंगुरेन रस पी लेदु।

ए दुस्‌तीदार्‌या, तुहुंं बी खावु, ए लाटेकला, पीवु, ततरो पीणे लागे ततरो पीयु!

2 मे सुवतेली, बाकुन मारो मन जागतेलो।

सामळ! मारु लाटेकलु! बारनो ठुक रयु, ने कय रयु, "ओ मारी घाटाळी,

ओ मारी लाटेकली, ओ मारी पेरवी,

ओ मारी चुखली, मार वाटे झपलु उगाड़;

काहाकी मारो मुणको उस्‌टा सी भीग रयो,

ने मारा कान्‌या राते उस्‌टान पाणी सी गीला हय गुयला।"

3 मे मारा पुथल्‌या छुड़ देदी,

मे तीना पुथल्‌याक कसी पेहरो?

मे ते मारा पाय धुय लेदी,

हय तीनु पाय काजे कादवाळा कसी करो?

4 मारु लाटेकलु, आपसान हात बारनान डुचाम भर देदु,

तत्‌यार मारो मन तेर वाटे मनवाय गुयो।

5 मे मारा लाटेकला वाटे बारनो उघाड़ने उठी,

तत्‌यार मारा हातेम सी गंदरस चुही पड़्‌यो,

ने मार आंगळ्‌ये सी चुहीन गंधरस कुंडी पर पड़्‌यो।

6 मे मारा परम करन्‌या वाटे बारनो उघाड़ी,

बाकुन मारु लाटेकलु पेहलुत चां सी जाती रयु।

ने मे तेरो बुल सामळने हींडतेली।

ने मे तीनाक हेरी, बाकुन चु नी जड़्‌यु; मे तीनाक आयड़ी,

बाकुन काय बी जपाप नी आप्‌यु।

7 सहरेम पेहरु देण्‌या मेसेक भेळा हया,

चे ते मेसेक ठुक्‌या ने आदमुळ्‌तु कर देदा;

अवारकुटेन पेहरु देण्‌या मारु चादरु हापकी लेदा,

8 ए यरुसलेम सहरेन पुरे, तुहुंं सगुन खाय्‌न असी कहुं,

कदी मारु परम करन्‌यु, तुहुंंक जड़ जासे, ती तीनाक कय देजु की,

तुसेक परम करने वाळी काजे, परमेन जुर सी कमजुर छे।

9 ओ आखा बायरा मां सी बेसकी वारु,

तुसेक परम करन्‌यु, दीसरा परम करन्‌या सी

काहनी वातेम अलग छे?

तु हामुक असी सगुन काहा खावाड़ रय?

10 मेसेक परम करन्‌यु घाटाळु ने काठु,

चु दस हजार मां सी बी बेसकु वारु छे।

11 तेरो मुणको ते चुखला सोना मुजुक छे;

तेरा टांगायता कान्‌या ते

कागळान तसा काळ्‌ळा छे।

12 तेरा डुळा तीनु पेरवान तसा छे,

जे दुद मां उंघळीन नदी धड़े हारे-दुरे टुळान-टुळा बठी रया हय।

13 तेरा गाल जड़ी-बुटी,

ने मसाला सी भरली वाड़ीन तसा छे।

हेरा हुटड़ा चुहणे वाळी लुबान सी,

भीगला सोसन फुलेन तसो छे।

14 तेरा हात ते तीना सनान तसा छे,

तेरेमां मंहगली मणी बसाड़ली छे।

तेरो डील ते हातीन दात मां

नीलम सी बसाड़लो छे।

15 तेरा पाय ते सना पर बसाड़ला

झीकर्‌या दगड़ान खम्‌बान तसा छे।

चो ते लबानोन बयड़ान तसु वारु,

ने देवदारेन झाड़कान तसु गमे असु छे।

16 तेरी बुली बेसकी सुवाळी छे,

ने चु बेसकु वारु छे।

ए यरुसलेम सहरेन पुरे,

जुत मारु लाटेकलु ने जुत मारु दुस्‌तीदार छे।