1 रातेन टेमे मे मारी खाट्‌ली पर सुय रवली,

मेसेक परम करन्‌या काजे मे अथीन-अथी हेरने बाजी गुय;

बाकुन चु मेसेक नी जड़्‌यु।

2 मे कय, "मे हय उठीन सहर मां,

ने सयड़क पर ने आड़े-धड़े पर फीरीन मेसेक परम करन्‌याक हेरीस।"

मे तीनाक हेरती रय,

बाकुन चु मेसेक नी जड़्‌यु।

3 जे पहरु देण्‌या सहर मां फीरतेला, चे मेसेक भेळा हया।

मे तीनुक पुछी, "तुहुं मेसेक परम करन्‌या काजे देख्‌या काय?"

4 तीनुक असी कय्‌न मे ईतरीक अगी गुय,

ने थुड़ीक वार हवली ने मेसेक परम करन्‌यु मेसेक जड़ गुयु।

ने मे तीनाक धर पाड़ी ने मे तीनाक जाणी नी देदी, जां लग की मारी माय्‌न घर मतलब मे पयदा हवली

चां लावता लग तीनाक जाणे नी देदी।

5 ओ यरुसलेम सहरेन पुरे,

मे तुहुंंक हयणान ने हयणीन सगुन खावाड़ीन कवाड़ो,

की जत्‌यार लगुन परम आपसुत नी जागे, तत्‌यार लगुन हामु तीनाक नी जागाड़जे।

6 जो काय छे कुळ्‌ळान खम्‌बान तसो, गंधरस ने लुबान सी गंदायण्‌यो,

ने वेपारीन आखी भातीन गंदायण्‌या मसालान बगदु चुपड़ीन,

बयड़ा भीणी सी आवणे बाजी रयु?

7 देखु! जी ते सुलेमानेन पालकी छे।

तेरे च्‌यारु मेर ईस्‌राएली सीपायड़ा माय्‌न

साहाठ जणा चाल रया।

8 जे आखान-आखा कमर मां तलवार बांद रया

ने लड़ाय मां हुनर छे।

तींद्‌रे मां एकेक जणु बीहीन

कमर मां तलवार टांग रवे।

9 सुलेमान राजु आपसा वाटे लबानोन झाड़कान लाकड़ान,

एक पालकी बणाय मांगलु छे।

10 हेरा खांबा चांदी सी ढाकला छे,

हेरे उपर सना सी थीगळा पुथल्‌या छे।

हेरा टकीयान रातला जामण्‌या रंगेन कापड़ा सी ढाकलो छे,

जेरेसी यरुसलेमेन बायरा परम सी जुड़ला छे।

11 ओ सीयोन सहरेन पुरे, खयड़े आय्‌न राजा सुलेमान काजे देखु।

चु तेरी माय पागड़ी आपली, ची पागड़ी पेहरी रयु,

तीनी पागड़ी काजे ची ईयावेन दाहड़े खुस हय्‌न तीनाक पेहरावली।