दुस्तीदारेन
1 ओ आखा बायरा मां बेसकी वारु,
तारु लाटेकलु कांखुर जाती रयु?
तुसेक परम करन्यु कांखुर जाती रयु? बताड़,
हामु तार पुठे तीनाक हेरने आवसु।
लाडी
2 मारु परम वाळु आपणी वाड़ी मां जाती रयु,
जां बलसानेन झाड़का उंगे,
चु वाड़ी मां आपणा गाडरा-बुकड़ान टुळा काजे खावाड़ी रयु,
ने सोसनेन फुल काजे भेळु कर रयु।
3 मे मारा परम करन्यान छे, ने मारु परम करन्यु, मारु छे,
चु आपसा गाडरा-बुकड़ा सोसन फुलेन ईचमां चारे।
पांचवो गीत
लाडु
4 ओ मारी लाटेकली, तु तीरसा सहरेन तसी बेसकी वारु छे।
तु यरुसलेम सहरेन तसी बेसकी वारु छे,
ने तु झंडु लीन जातला सीपायड़ान तसी ताकतवाळु छे।
5 आपसा डुळा मारे भीणी सी अथा फेरवी लेदी,
काहाकी तारा डुळा देखीन मारी घाबराण छुट जाय;
तारा कान्या ते गीलाद बयड़ान आड़खे बठी रवला,
बुकड़ान टुळान तसा देखाये।
6 तारा दात तीनु गाडरान टुळान तसा छे,
जे नदीम उंघळीन उपर आवला हय,
तींद्रेम एकेक जवळ्या पीला रवे।
तींद्रेम एक बी पीलो नी मर्यो हय।
7 तारा गाल तारा कान्या पछळ अनारेन चीर्यान तसा देखाये।
8 चां साहाठ राणी, ने अस्सी राखला बायरा छे,
ने गीणाये नी अतरी कुवारली पुरे बी छे।
9 बाकुन मारी पेरवी,
मारी चुखली, बेसकी वारु छे,
ची आपसी मायन एखली पुरे छे,
आपसी मायन लाटेकली छे।
आखी कुवारली पुरे देखीन तुसेक वारु कवे;
राणी ने राखला बायरा देखीन तुसेक बेसका वारु कवे।
10 जी कुण छे, जी संदारे वीजाळान तसी सुबा देय,
जी चांदेन तसी बेसकी वारु छे, ने दाहड़ान तसी चुखी छे,
ने झंडु लीन जातला सीपायड़ान तसी छे, बेसका छेलभात्या छे।
लाडी
11 मे बदामेन झाड़कान घाटी मां फुले देखणे करीन गुयली,
ने अंगुरेन कवळ्ळा डीरा फुट्या की नी फुट्या करीन गुय,
ने अनारेन फुले आया की नी
आयो करीन देखणे करीन गुयली।
12 मेसेक मालुम बी नी पड़्यो ने मारा वीच्यार मेसेक मारा राजकुमारेन घुड़ा-गाडी पर चड़ाय देदा।
दुस्तीदारन्या
13 ओ सुलेम्मीन पुरे6:13 सांती वाळी, पछी आवती रव, पछी आवती रव,
हेरेन करीन की, हामु तुसेक एक हेट्या भाळजे।
लाडी
तुहुंं सुलेम्मीन पुरे काजे एकहेट्या काहा भाळने हींड रया,
ने मानु जो दुय टुळान नाचणु छे?