1 जब आठै खाय के यहूदी तेउहार के पचासमा रोज आथै, ता सगलू चेला अक जिघा जुडथै, 2 ता अचनकै बडी बडेरा के जसना आरो बादर लग सुनाई दइस अउ सगलू घर जिहां उन बइठे हर रथै, गूंज उठिस। 3 अउ आगी के धांग के जसना फइलत अउ जीभ उहां फटत दिखाई देय लगथै, ऊ आगी के अलगे-अलगे जीभ हर अक झन के उप्पर आय ठहरिस। 4 उन सगलू पवितर आतमा लग भरपूर हुइ गइन अउ जउन आरो के बरदान पवितर आतमा उनही दइस, ओखर जसना कइन मेर भासा हे बोलै लगिन।

5 बादर के तरी रहै बाले उन यरुसलेम हे दुनिया कर सगलू देसन लग आय हर यहूदी रहे करथै। 6 जब हइ आरो गरजथै, तब अक्ठी बडी भीड अक जिघा हुइ गइस, ऊ चकराय गइस काखे बिस्वास करै बाले भाइन के उन अपन खुदय के भासा बोलत सुनथै। 7 ऊ सगलू अचम्भित हुइके गुठेमै लग जथै, देखा, हइ जउन बोलथै का सगलू गलीली परान्त के नेहको? 8 फेर हमर लग हर अक झन हमर अपन बोली भासा हे बोलत कसना सुनथन? 9 हम पारथी, मेदी, एलामी, मेसोपोटामिया कर निबासी, यहूदिया अउ कप्पदूकिया, पुन्तुस अउ आसिया, 10 फ्रूगिया, पंफूलिया, मिस्र अउ लीबिया देस जउन कुरेने के अगल-बगल हबै, इन सब परदेसन के मनसे रोम लग आय हर यातरी जेहमा पइदाइसी रोमी रथै। 11 अउ यहूदी अच्छी धारन करैबाले मनसे क्रेती अउ "अरब कर रहैबाले हम सबझन भगवान कर चकित के काम के अपन-अपन भासा हे सुनथन" 12 उन सब मनसे चकित अउ सक हे पड जथै अउ अक दूसर लग पूछै लग जथै कि "हइ सब काहिन बात हबै?" 13 पय दूसर मनसे चेलन के मजाक उडाउत कथै, "इन सबझन बोहत दारू पी हबै।"

14 फेर उन ग्यारह झन के संग पतरस ठाढ होथै अउ ऊंच आरो लग मनसेन के सम्बोधन करत कथै, हे यहूदी संगी अउ यरुसलेम के सगलू संगी मोर बात के धियान सुना अउ मोके हइ बात के मतलब गुठेमै देया। 15 ऊ मनसे नसा हे नेहको हमै, जसना तुम समझथा काखे अबे तो सकरहा कर नव बजे हबै। 16 पय ऊ बात हबै, जेखर बारे हे योएल नबी ग्यानी मनसे के दवारा गुठे रथै,

17 भगवान हइ कथै, कि मै आखरी के रोज,

हे सगलू मनसे हे अपन आतमा दइहों,

ता तुम्हर टोरवा टोरिया आगू कर बात गुठेही,

अउ तुम्हर जबान दरसन देखही,

अउ तुम्हर सियान सपना देखही।

18 उन रोज हे अपन हरवाह,

अउ हरवाहिन हे अपन आतमा दइहों,

अउ उन आगू कर बात गुठेही।

19 अउ मै उप्पर बादर हे चकित कर काम,

अउ तरी भुंइ हे चिन्हा मतलब खून,

आगी अउ कुहिटा कर बादर दिखाहुं।

20 बेरा अंधियार,

अउ जोधइया खून कर जसना ललका हुइ जही,

परभु के महान अउ महिमा आमै के आगू लग।

21 जउन कउ परभु कर नाम लेही उके परभु बचाही।

22 "हे इस्राएली भाई, मोर बातन के धियान लग सुना, भगवान यीसु नासरी के दवारा तुम्हर बीच केतका चकित के काम करे हबै अउ चिन्हा दय हबै, जउन भगवान तुम्हर बीच ओखर दवारा करके दिखाय हबै, एखर लग साबित होथै कि ऊ भगवान के तरफ लग आय हबै।" 23 ऊ यीसु के भगवान सही योजना अउ निस्चित ग्यान के जसना तुमही धराय गय हबै अउ तुम पापी मनसेन के सहयोग लग उके क्रूस हे टंगाय के मार डाला। 24 पय भगवान उके मरै के पीरा लग छंडाइस अउ फेरै लग जियाइस, मिरतू हे एतका सक्ति नेहको रथै, कि उके बन्दी बनाय के रखै। 25 काखे कि दाऊद ओखर बारे हे कथै,

मै परभु के सबरोज अपन आंखी हे देखत रहों,

काखे कि ऊ मोर दहिना पल्ला हबै, ता मै झइ हिलो।

26 इहैनिता मोर मन मगन हबै,

अउ मोर जीभ मगन हबै,

मोर देह आसा हे जीय।

27 काखे परान के नरक हे पवितर बिस्वास करैबाले,

सेबकन के मरघटी हे सरै नेहको देही।

28 तै मोके जीवन के पल्ला जाय के गली दिखाय हबै,

तै मोके अपन दरसन के दवारा मगन लग भर दइहे।

29 हे मोर भाइयो, मै अपन पुरखा दाऊद राजा कर बारे हे तुम्हर लग हिम्मत के संग गुठे सकथों, कि ऊ तो मर गइस अउ गाडे गइस अउ ओखर मरघटी आज तक हमार इहां मउजूद हबै। 30 ऊ अक्ठी ग्यानी मनसे रहिस, ऊ जानथै कि भगवान मोर लग किरिया के संग हे उके टीमा दय कि ओखर पुरखन मसे कउनो अकझन के ओखर राजगद्दी हे बइठाही। 31 इहैनिता जउन मसीह के भभिस्य हे घटै बाले हबै, उके देखत दाऊद हइ कथै,

"ओहमा मिरतू दुनिया नरक हे नेहको छांडिस,

अउ न ओखर देह के मरघटी हे सरै दइ"

32 इहै यीसु कर भगवान जिलाथै, जेखर हम सगलू झन हइ बात के गवाह हबन। 33 भगवान के दहिना हाथ लग ऊंच पदवी पाय के यीसु परम बाफ के टीमा के जसना पवितर आतमा पाइस, फेर ऊ हइ आतमा के हमर हे उडेल दइस, जेही अब तुम देखथा अउ सुनथा। 34 काखे कि दाऊद तो स्वरग हे नेहको गइस पय ऊ खुदय कथै,

परभु भगवान मोर परभु लग कथै,

मोर दहिना पल्ला बइठे रहा,

35 जब तक कि मै तोर बैरी के तोर गोड तरी के चउकी नेहको बना देहुं।

36 इहैनिता सगलू इस्राएल सही हे जान लेया कि भगवान हइ यीसु के तुम क्रूस हे लटकाय दय रथा, परभु अउ मसीह दुनो ठहराय रथै।

37 मनसे जब हइ सुनथै ता उन चकित होथै पतरस अउ चेलन लग कथै, "हे भाइयो हमके काहिन करै चाही?" 38 तब पतरस उनखर लग कथै, "मन बदला अउ अपन पापन के छमा पामै के निता तुम्हर मसे हरेक झन के यीसु मसीह के नाम लग पानी हे बतिस्मा ले चाही अउ तुमही पवितर आतमा के बरदान मिलही। 39 काखे कि हइ टीमा तुम अउ तुम्हर लरका अउ ऊ सगलू दुरिहां कर मनसे के निता हबै, जिनही परभु हमर भगवान अपन लिघ्घो बुलाय हबै।"

40 पतरस अउ बोहत लग बचन दवारा उनही चेतन्त करथै अउ बिनती के संग उनखर लग कथै, "हइ नास होमै बाले पुरखन लग अपन खुद के बचाय रखिहा।" 41 उनखर मसे बोहत झन ओखर बात के सुनके बिस्वास करिन अउ उनही पानी लग बतिस्मा दइस, हइमेर ऊ रोज उनखर संग करीबन तीन हजार मनसे जुड गइन।

42 अउ बिस्वास करै बालेन के साझा जीवन चेलन लग दिमाक पामै अउ संगति रखै अउ रोटी टोरै अउ बिनती करै हे मगन रथै। 43 चेलन कर दवारा बोहत लग चकित के काम के चिन्हा परगट अउ हर अक्ठी मनसे चकित लग भर गइन। 44 अउ सगलू बिस्वास करैबाले लगेतार संगति हे रथै अउ उनखर लिघ्घो जउन कुछु रथै, उन उके अपनै हे बांटचोंट लेथै। 45 उन अपन धन डेरा अउ चीजन के बेच भांज के अउ ओखर लग मिलै बाले पइसा के हर अकझन के जेखर जसना जरूरत रथै बांट देथै। 46 उन सबरोज बिनती भवन हे अक संग मिलथै, उन अपन घर हे अक संग खाना बांटचोंट के अउ सच्चे मन लग मगन के संग मिलजुल के खाना खथै। 47 सगलू मनसे के अच्छी भावना के मगन लेत भगवान कर भजन करत जउन रोजदिन परभु के दवारा मुकति पाथै, उनखर संग जोड देथै।