प्रेरितो 6

सातठे सेबकन के चुनथै

1 कुछ रोज बाद चेलन के गिनती बढथै ता यूनानी भासा बोलै बाले बिस्वासी अउ इब्रानी बोलै बाले यहूदी बिस्वासी हे अक्ठी झगडा हुइ जथै, काखे यूनानी बोलै बाले यहूदी बिस्वासी हइ दाबा करथै, उनखर सेबा हे बिधवन डउकिन कर रोज दिना के खाय पीय बाले चीजन हे अनदेखा करथै। 2 बारहठे चेला, चेलन के सगलू मंडली के अक जिघा बुलाय के कथै, हमर निता भगवान के बचन के सेबा के छांडके खाय पीय अउ पइसन के जुगाड करै के जरूरी नेहको आय। 3 इहैनिता भाई बेहन तुम अपन बीच लग सातठे डउकन के अपनै मसे चुन लेया, जउन पवितर आतमा अउ दिमाक ग्यान लग भरपूर होय, कि हम उनही हइ काम के निता जबाबदारी दइ। 4 पय हमर धियान बिनती हे अउ बचन के सेबा हे लगे रहिबे।

5 हइ सलाह लग सगलू मंडली बोहत मगन हुइन, उन स्तिफनुस नाम के मनसे के अउ जउन बिस्वास अउ पवितर आतमा लग भरे रथै अउ फिलिप्पुस, प्रुखुरूस, नीकानोर, तीमोन, परमिनास, अन्ताकियावासी, नीकुलाउस के, जउन यहूदी धरमी काम करै बाले के अपनाय लेथै, उके चुन लेथै। 6 उनही चेलन के आगू ठाड करथै अउ उन बिनती करके उनखर हे अपन हाथ धरिन।

7 अउ हइ मेर भगवान के बचन लगेतार फइले लगिस अउ यरुसलेम हे चेलन के गिनती बोहत बढ गइस, पुजारी के अक्ठी बडका समूहो हइ बिस्वास हे बढै लगिन।

स्तिफनुस के पकरथै

8 स्तिफनुस अक्ठी असना मनसे रथै, अनुगरह अउ सक्ति लग भरपूर रथै, ऊ मनसेन के बीच बडा-बडा चकित के काम अउ चकित के चिन्हा परगट करे करथै। 9 पय आजाद करे हर यहूदी मनसे के मंडली कुछ मनसे जउन लिबिरतीनो कहाथै, कुरेनी अउ सिकन्दरिया अउ किलिकिया आसिया इलाका लग आय हर यहूदी रथै, उन स्तिफनुस के बिरोध हे बाद बिबाद करै लगिन। 10 पय ऊ आतमा जेखर लग बात करत रथै अउ ओखर दिमाक के आगू नेहको टिक पाथै। 11 फेर उन कुछ मनसेन के लालच दइके बुलवाइन, "हम मूसा अउ भगवान के बिरोध हे निन्दा के बात कहत सुने हबन।" 12 हइ मेर उन मनसेन के सियान नेतन के अउ यहूदी धरमी गुरुन के उकसाइन, फेर उन आयके उके पकर लइन अउ यहूदी पंचायत के आगू लानथै। 13 उन ऊ ठगरा गवाहन के लानिन जउन कथै, "हइ मनसे हइ पवितर जिघा अउ नियम के बिरोध हे बोलथै। 14 हम इके कहत सुने हबन यीसु नासरी हइ बिनती भवन के नास कर देही अउ हमर परम्परा के बदल दइ जेही हमके मूसा दय हबै।" 15 ता सगलू मनसे जउन पंचायत हे बइठे रथै, उके धियान लग देखथै, ता ओखर चेहरा स्वरगदूत के जसना दिखथै।