इब्रानिन 5

1 हर अक्ठी पुजारी मनसेन मसे चुने जथै, अउ जउन भगवान सबंध के बातन हे मनसेन के अगुवाई करै के निता ठहराय जथै, जेखर लग ऊ उपहार अउ पाप के माफ के निता बलि चढावा। 2 ऊ बिना समझदार अउ भुलाय भटके मनसेन के संग कोवड बेउहार के सकथै, काखे ऊ खुदय ढिलवन लग घररेहर हबै। 3 इहैनिता उके अपन पापन के निता अउ ओसनेन मनसेन के पापन के निता बलि चढामैके पडथै। 4 कउनो अपन खुद हइ इज्जत के पद नेहको अपनाथै, पय सबझन हारुन के जसना भगवान के दवारा बोलाय जथै।

5 इहैनिता मसीह अपन मन लग परधान याजक बनके महिमा नेहको पाथै, पय भगवान उके पुजारी बनाइस, फेर अउ ऊ कथै,

"तै मोर टोरवा हबस,

मै आज लग तोर बाफ बन गय हव।"

6 अउ अक्ठी आने जिघा हे ऊ कथै,

"तै मलिकिसिदक के जसना,

जुगजुग के निता पुजारी बने रही।"

7 यीसु हइ दुनिया अपन देह हे रहत चिल्लाय-चिल्लाय के अउ आंसू बोहोय-बोहोय के भगवान लग, जउन उके मरै लग बचाय सकथै, पराथना अउ बिनती करिस अउ आदरपूरवक समरपन के कारन सुने गइस। 8 टोरवा होय भरमा ऊ दुख सहि के आदेस के मानै के सिखिस, 9 अउ अक बेर सिध्द बन जाय लग उन सबझन के निता जउन ओखर आदेस के मानथै, ऊ सबरोज के मुकति के कारन बन गइस। 10 अउ भगवान के दवारा मलिकिसिदक के जसना उके पुजारी के पद मिलिस।

नियाव छांडै के खिलाप चेतावनी

11 एखर बारे हे हमही बोहत कुछु कहैके हबै, पय इन बातन के समझै के कठिन हबै, काखे तुम समझै हे असली हबा अउ बोहत सुने लगे हबा। 12 हइ टेम तक तुमही गुरू हुइ जायके चाही, पय हइ जरूरी हुइ गय हबै कि कउ तुमही फेरै भगवान के बचन सिखामै, तुमही भात खायका नेहको बकि दूध के जरूरत हबै। 13 जउन दूध पिये के आसरित रथै, ऊ लरका हबै उके भगवान के बचन के चिनारी नेहको होय हबै। 14 पय ठोस खाना सियान मनसेन के निता हबै, जेहमा लगेतार परयोग करके खुद के बुराई लग अलगे करै के निता परयास करे हबै।