लूका 8

याइर के टोरिया अउ खून बोहै बाले बिमार डउकी

40 जब यीसु फेरै लउटथै, ता मनसे ओखर सोगत करथै, काखे उन सगलू मनसे यीसु के ओरगथै। 41 ता ऊ टेम बिनती भवन हे याइर नाम के अक्ठी मुखिया आइस, अउ यीसु के गोड लग गिरके बिनती करै लगिस कि ऊ ओखर इहां जाय के किरपा करे। 42 काखे ओखर बारह साल के टोरिया मरै बाले रथै, यीसु ओखर संग कढ गइस, गली हे मनसेन के भीड चउगिरदा पल्ला यीसु के दबाय डारथै। 43 उहां अक्ठी डउकी बारह साल लग खून बोहय के नांगा हे रथै, ऊ अपन सगलू जीवन भर मेहनत के कमाई गुनिया हे खरचा कर चुकथै, अउ कउनो उके निक्खा नेहको कर सकिन। 44 ऊ डउकी पाछू ले आयके यीसु के कपडा के चुप्पे लग छि लेथै, अउ उहै टेम ओखर खून बोहय के बन्द हुइ गइस। 45 यीसु कथै, "मोके कोनहर छिय हबै?" जब सगलू मनसे मना करथै, ता पतरस अउ ओखर संगी यीसु लग कथै, "हे स्वामी मनसेन के बोहत भीड हबै, अउ तोर गोड तरी गिरे पडथै अउ तैहां पूछथस कि मोके कोनहर छिय हबै।"

46 पय यीसु कथै, "कोनो मोके बिस्वास लग छिय हबै, काखे कि मै अनुभव करे हव कि मोर लग सक्ति निकरे हबै।" 47 जब डउकी हइ देखथै मै नेहको लुक सकथों, ता ऊ डेरात आइस अउ यीसु के गोड हे गिर जथै, अउ सगलू मनसेन के आगू गुठेइस कि परभु मै तोके छिय हबो, काखे मोके बारह साल लग नांगा हे रहों, अउ मै अपन सगलू डेरा के गुनिया पंडा हे लुटाय चुके हबो, पय निक्खा नेहको होयों, इहैनिता मै तोर बन्डी के छिय हबो, अउ मै हरबी निक्खा हुइ गय हव। 48 यीसु ओखर लग कथै, "टोरिया तोर बिस्वास तोके निक्खा करे हबै, सान्ति लग घर जा।"

49 यीसु ई बात के कहत रहिस, ता ओतकै टेम बिनती भवन के मुखिया इहां लग अक्ठी मनसे आइस, अउ कथै, "तोर टोरिया मर गय हबै, अब तै गुरू के परसान झइ कर।"

50 हइ सुनके यीसु ओखर लग कथै, "झइ डर बस बिस्वास कर, ऊ चंगा हुइ जही।"

51 जब यीसु याइर के घर छो पहुंचिस ता उन पतरस यूहन्ना याकूब अउ टोरिया के दाय-बाफ के छांड के कउनो के अपन संग घर के भित्तर नेहको आमै देथै। 52 सगलू मनसे रोथै अउ ओखर निता विलाप करथै, यीसु कथै, "झइ रोबा, ऊ मरे नेहको हबै, बलुक टोरिया सोथै।"

53 उन यीसु के खिल्ली उडामै लागथै, काखे उन जानथै कि ऊ मर गय हबै। 54 यीसु टोरिया के हाथ पकड के कथै, "हे टोरिया उठ।" 55 टोरिया के परान लउट आइस अउ उहै टेम उठ बइठिस, यीसु आदेस दइस कि उके कुछु खाय के देया। 56 टोरिया के दाय बाफ चकित हुइ गइन, पय यीसु आदेस दइस कि हइ घटना के चरचा कउनोन लग झइ करबे।