1 उहै रोज यीसु ऊ घर के छांड के झील के टाठा हे सिक्छा देय के निता बइठ गइस। 2 ओखर लिघ्घो एतका बडा मनसेन के भीड जुड जथै, कि यीसु अक्ठी नाह जिहाज हे बइठ जथै, अउ सगलू भीड झील के पाखा हे ठाड रथै। 3 अउ यीसु किस्सा सुनाय के,

उनही बोहत कुछ बात सिखोय लागथै, "अक्ठी किसान बिजहा बोमै निकरथै। 4 बोउत टेम कुछ बिजहा गली के पाखा हे गिरथै, अउ चिरइया आय के उके खा लेथै। 5 कुछ बिजहा पथरहली भुंइ हे गिरथै, अउ खूब माटी नेहको मिलै के कारन हरबी दाना फुटुक जथै, काखे उहां माटी गहिड हे नेहको रथै। 6 पय जब बेरा निकडथै अउ खूब घाम लगै लग पउधा झुराय जथै, काखे ऊ जर नेहको पकडे रथै। 7 कुछ बिजहा पुडरा के बीच हे गिरथै, पय पुडरा बढके उके दबाय देथै।" 8 अउ कुछ बिजहा निक्खा भुंइ हे गिरथै अउ ऊ बढके बढिहा फडुहा लानथै, कोनो तीस गुना, कउनो साठ गुना अउ सव गुना। यीसु समुन्दर के टाठा हे भीड के संदेस देथै

9 जेखर "कान होय ऊ सुन ले।"

10 फेर यीसु कर चेला आय के ओखर लग पूछथै, "तै काखे मनसेन के किस्सा हे सिक्छा हे बात करथस?"

11 यीसु चेलन के जबाब देथै, हइ इहैनिता हबै कि स्वरग राज के लुके हर के जानै के ग्यान तुमही दय गय हबै, उन मनसेन के नेहको। 12 काखे जेखर लिघ्घो हबै, उके अउ दय जही अउ ओखर लिघ्घो बोहत हुइ जही, पय जेखर लिघ्घो नेहको हबै, ओखर लग वहु लइ ले जही जउन ओखर लिघ्घो हबै। 13 इहैनिता मै उनखर लग किस्सा के परयोग करके बात करथो, काखे ऊ देखथै तउभरमा ऊ अंधरा बनथै अउ सुनथै, तउभरमा ऊ नेहको सुनथै अउ नेहको समझथै। 14 उनखर बारे हे यसायाह ग्यानी मनसे आगू कर बात कहे हर उनखर हे पूर होथै,

तुम सुनिहा जरूर, पय नेहको समझिहा,

तुम देखत तो रइहा पय तुमही कउनो ग्यान नेहको होही।

15 काखे हइ मनसेन के मन बेकार हुइ गय हबै

अउ हइ कान लग बोहत सुनै लगे हबै,

उन अपन आंखी मूंद लय हबै,

जेखर लग कहुं असना झइ होय कि आंखी लग देखै,

अउ कानन लग सुनै,

अउ दिमाक लग समझै,

अउ मोर पल्ला लउट आमै,

ता मै उनही निक्खा कर दो।

16 पय धन्य हबै तुम्हर आंखी काखे उन देखथै, अउ धन्य हबै तुम्हर कान काखे उन सुनथै। 17 मै तुम्हर लग सही कथो, ग्यानी मनसे अउ धरमी मनसे जउन बातन के देखै चाहथै, अउ उन नेहको देख पाइन, पय तुम देखथा अउ जउन बातन के उन सुनै चाहथै, उनही तुम सुनथा, पय उन नेहको सुन पाइन।

18 "अब तुम बिजहा बोमै बाले किसान के किस्सा कर मतलब सुना। 19 ऊ बिजहा जउन गली कर टाठा हे गिरे रथै, ओखर मतलब हबै, कि जब कउ स्वरग कर राज के संदेस सुनथै, अउ उके नेहको समझथै, ता भुतवा आय के ओखर मन हे जउन बिजहा बोय रथै उके चुराय लइ जथै। 20 ऊ बिजहा जउन पथरइला भुंइ हे गिरथै, ओखर मतलब हबै ऊ मनसे जउन संदेस सुनथै, अउ उके खुसी लग हरबी अपनाय लेथै। 21 पय ओखर तरी तक जर हे नेहको रथै, अउ चुटु देर तक रही पाथै, जब संदेस के कारन कस्ट अउ दिग्गत आथै, ता ऊ जलदिन घबरा जथै। 22 पुडरा हे गिरे हर बिजहा कर मतलब हबै, ऊ मनसे जउन संदेस के सुनथै, पय दुनिया के चिंता अउ डेरा के लालच हे आय के परभु कर बचन के छांड देथै, अउ ऊ मनसे आगू नेहको बड पाथै। 23 निक्खा भुंइ हे गिरे हर बिजहा कर मतलब हबै, ऊ मनसे जउन संदेस के सुनथै अउ समझथै ऊ आगू बड जथै, ऊ बिजहा तीस गुना अउ साठ गुना अउ सव गुना फडुहा लानथै।"

24 यीसु उनही अक्ठी अउ किस्सा सुनाथै, "स्वरग कर राज ऊ मनसे के जसना हबै, जउन अपन खेत हे बढिहा बिजहा बोय रथै। 25 पय जब मनसे सोय रथै, तब ओखर बैरी आथै अउ गोहूं के बीच हे चारा बोय के कढ गइस। 26 जब गोहूं फुटकथै अउ ओहमा बाली आथै, ता जंगली बिजहा के चारा दिखाई दइस। 27 ता खेत के मालिक के लिघ्घो आयके ओखर हरवाह ओखर लग कथै, मालिक, तै खेत हे बढिहा बिजहा बोय रहस न? फेर हइ जंगली चारा के पउधा कछो लग आइस? 28 तब मालिक उनखर लग कथै, हइ कोनो बैरी के काम हबै, ओखर हरवाह ओखर पूछथै, तै काहिन चाहथस कि हम जाय के चारा के नींद दइ? 29 मालिक जबाब दइस, नेहको, असना झइ होय कि जंगली चारा उखालत टेम गोहूं उखाल डारा। 30 गोहूं अउ जंगली चारा के काटै तक संग बढै देया, ऊ टेम मै मजदुरिहन के आदेस देहुं, जंगली चारा अक्ठी जिघा करके बोझा बांध देया, कि उनके लेस दय जाय, पय गोहूं मोर कोठला हे अक्ठी जिघा करा।"

31 यीसु उनखर आगू अक्ठी अउ किस्सा कथै, कि "स्वरग कर राज राई के दाना कर जसना हबै, जेही कोनो मनसे लइके अपन खेत हे बोय दय हबै। 32 राई बिजहा सगलू बिजहा लग नान तो हबै, पय बढके सगलू सबजी भाजिन लग बड्डे हुइ जथै, अउ असना रूख बनथै, कि बादर के चिरइया आयके ओखर डगइल हे सोथै।"

33 यीसु अक्ठी अउ किस्सा सुनाथै, कि "स्वरग कर राज ऊ खमीर कर जसना हबै, जेही कोनो डउकी लइके तीन किलो पिसान हे मिला देथै, धीरे-धीरे ऊ खमीर हुइ गइस।"

34 यीसु किस्सन हे हइ सगलू बात मनसेन लग कथै, ऊ बिगर किस्सा के उनखर लग कुछु नेहको कथै। 35 जेखर लग ग्यानी मनसे के हइ बात पूर हुइ जाय,

मै किस्सा के दवारा बोलहुं,

दुनिया के सुरुवात लग जउन लुके हबै, उके मै परगट करहुं।

36 यीसु मनसेन के बिदा करके घर आथै, ता उनखर चेला ओखर लिघ्घो आयके कथै, खेत के जंगली चारा के किस्सा हमके समझाय दे।

37 यीसु उनके जबाब देथै, बढिहा बिजहा बोमै बाले मनसे कर टोरवा हबै। 38 खेत दुनिया हबै, बढिहा बिजहा राज के लरका हबै, जंगली चारा भुतवा कर लरका हबै। 39 बोमै बाले बैरी भुतवा हबै, कटनी दुनिया कर आखरी हबै मजदूर स्वरगदूत हबै। 40 जउन मेर मनसे जंगली चारा के पउधा अक जिघा करके आगी हे लेस देथै, ओसनेन दुनिया कर आखरी हे होही। 41 मनसे कर टोरवा अपन स्वरगदूतन के पठोही अउ उन ओखर राज मसे सब मनसे ठोकड के कारन बनथै, अउ अधरम करै बालेन के अक जिघा करही। 42 उनही आगी के कुन्ड हे डाल देही, उहां उन मनसे लगेतार रोहीं अउ दांत चबाउत रइहीं। 43 तब धरमी मनसे अपन बाफ भगवान कर राज हे, बेरा के जसना चमकही। जेखर कान होय ऊ सुन ले।

44 "स्वरग कर राज खेत हे लुके हर डेरा के जसना हबै, जेही कोनो मनसे पाथै अउ उके लुकाय देथै, अउ मगन हे ऊ अपन सगलू डेरा बेच के ऊ खेत के खरीद लेथै।"

45 "स्वरग कर राज ऊ सेठ के जसना हबै, जउन निक्खा मोती के खोज हे रथै। 46 जब उके अक्ठी कीमती मोती मिलिस, ता ऊ जायके अपन सगलू कुछु बेच दइस अउ ऊ मोती के खरीद लइस।"

47 फेर स्वरग कर राज समुन्दर हे डाले हर ऊ जाला के जसना हबै, जउन हरमेर के मछडी समेट लानथै। 48 जब जाला भर गइस ता ढिमरा उके टाठा हे खींच लानथै, तब उन बइठके निक्खा मछडी चुन चुनके छन्नी हे जमा करथै, अउ बेकार मछडी फटक देथै। 49 दुनिया कर आखरी हे असनै होही, स्वरगदूत आयके अउ धरमी मनसे मसे, पापिन मनसेन के नबेर के अलग करही। 50 अउ उनके आगी के कुन्ड हे डाल देही, उहां उन मनसे रोइहीं अउ दांत पिसहिन।

51 यीसु अपन चेलन लग कथै, "तुम हइ सगलू बात समझथा?" उन जबाब देथै,

जी "हंव।"

52 यीसु अपन चेलन लग कथै, "हइ कारन सगलू नियम के गुरू जउन स्वरग कर राज के चेला बने हबै, ऊ अक्ठी असना घर के मालिक के जसना हबै, जउन अपन मन लग नबा अउ पुरान चीज निकाडथै।"

53 यीसु किस्सा के खतम करके उहां लग कढ जथै। 54 यीसु अपन देस छो आइस अउ मनसेन के यहूदी मंडली हे सिक्छा देय लगथै, चकित हुइके कथै "इके हइ दिमाक अउ अदभुत काम करै के सक्ति कछो लग मिलिस? 55 का हइ कारीगर कर टोरवा नेहको हबै? का मरियम एखर दाय नेहको? का याकूब, यूसुफ, समोन अउ यहूदा एखर भाई नेहको? 56 का एखर सगलू बेहन हमर बीच नेहको रथै? ता हइ सगलू इके कछो लग मिलिस?" 57 उन यीसु के परति गुस्सा लग भर गइन।

हइ बात हे यीसु उनखर लग कथै, अपन सहर अउ अपन घर के अलाबा ग्यानी मनसे कहुं बेज्जती नेहको होथै। 58 मनसेन के अबिस्वास के कारन यीसु ऊ सहर हे बोहत सक्ति के काम नेहको करिस।