1 फरीसी अउ सदूकी मनसे यीसु के लिघ्घो आथै, उन यीसु के परिक्छा के निता यीसु लग बिनती करथै, "तै हमके कउनो स्वरग कर चिन्हा दिखा।" 2 यीसु उनखर लग कथै, "सांझ के टेम तुम कथा, मउसम निक्खा रही, काखे बादर लाल हबै।" 3 सुब्बेन होय लग कथा, "आज आंधी आही, काखे बादर लाल अउ बादर लग घेररे हर हबै, तुम बादर के इसारा के चीन लेथा, पय टेम के चिन्हा के भेद काखे नेहको चीनथा। 4 हइ दुस्ट अउ अबिस्वासी मनसे निसानी खोजथा, पय ग्यानी मनसे योना के निसानी के छांडके अउ कउनो चिन्हा उनही नेहको दय जही।"

अउ यीसु उनही छांड के कढ जथै।

5 यीसु के चेला दहार के दूसर पल्ला जात टेम, रोटी लेय के बिसर जथै। 6 यीसु उनखर लग कथै, "देखा, फरीसी अउ सदूकी के खमीर ग्यान लग बचे रइहा।"

7 ऊ अपनै हे सोचै लग जथै, कि "हम रोटी नेहको लाय हबन इहैनिता यीसु असना कथै।"

8 यीसु उनखर मन के बात जान के कथै, "हे चुटु बिस्वास करै बाले मनसे, तुम हइ काखे सोचथा, कि हमर लिघ्घो रोटी नेहको हबै। 9 तुम अबहुन तक हे नेहको समझ पाय हबा का? सुरता करा कि उन पांच हजार मनसेन के निता पांचठे रोटी हे पुर गय रहिस, अउ केतका छन्नी भर रोटी उठाय रहा। 10 अउ तुमही सुरता नेहको हबै, कि चार हजार मनसेन के निता सातठे रोटी अउ फेर तुम केतका टोपरी रोटी उठाय रहा। 11 काखे नेहको समझथा, कि मै रोटी के बारे हे हइ नेहको गुठेथो, बकि फरीसी अउ सदूकी के खमीर लग सचेत रहैके कथो।"

12 ता चेला समझ गइन कि यीसु रोटी के खमीर लग नेहको, बकि फरीसी अउ सदूकी के सिक्छन लग बचे रहैका कथै।

13 जब यीसु कैसरिया फिलिप्पी हे आथै, ता ऊ अपन चेलन लग पूछथै, "मनसे कर टोरवा के बारे हे काहिन कथै, कि मै कोन हबो?"

14 चेला जबाब देथै, "कुछ मनसे कथै तै पानी हे बतिस्मा देय बाले यूहन्ना हबस, दूसर मनसे कथै, तै एलिय्याह हबस अउ मनसे कथै, तै इरमियाह ग्यानी मनसे मसे कोनो अक्ठी हबस।"

15 यीसु चेलन लग कथै, तुम मोके काहिन कथा कि मै कोनहर हबो?

16 समोन पतरस जबाब देथै, "तै मसीह हबस, तै जिन्दा भगवान कर टोरवा हबस।"

17 यीसु उके कथै, "हे समोन, यूहन्ना के टोरवा तै धन्य हबस, काखे गूदा अउ खून नेहको पय हइ बात कोनो मनसे लग नेहको, बकि मोर बाफ जउन स्वरग हे हबै, हइ बात तोर हे परगट करे हबै। 18 मै तोर लग कथो कि तै पतरस हबस, अउ इहै पथरा हे मै अपन मंडली बनाहुं, अउ नरक के सक्ति ओहमा हाबी नेहको होही। 19 मै तोके स्वरग राज के चाभी देथो, ताकि भुंइ हे जउन कुछु तै बंधहे ऊ भगवान के दवारा स्वरग छो बंधर जही, अउ जउन कुछु तै भुंइ हे खोलबे ऊ स्वरग हे उघरही।"

20 फेर यीसु अपन चेलन के चेताथै, कि तुम कोनो मनसेन के झइ गुठेहा कि मै मसीह हबो।

21 उहै टेम लग यीसु अपन चेलन के गुठेमै लग जथै, कि "मोके यरुसलेम नगर छो जायके पडही अउ जरूरी हबै कि मै उछो पुजारी, सियान अउ गुरू के हाथ लग बोहत दुख उठाय जहुं अउ मार डारे जइहों अउ तीसर रोज जिन्दा हुइ जइहों।"

22 पतरस यीसु के अलगेन लइ जाय के गधार के कथै, "हे परभु भगवान तोर हे दया करै। तोर संग असना कबहुन झइ होय।"

23 यीसु पतरस के पल्ला फिर के कथै, "हे भुतवा मोर आगू लग दुरिहां कढ जा, तुम मोर ठोकड के कारन बनत हबस, तुम भगवान कर बातन हे नेहको बकि मनसेन के बात सोचथस।"

24 फेर यीसु अपन चेलन लग कथै, "जउन कोनो मोर पाछू आमै चाहथै, ता अपन खुद के इंकार अउ पापन के छांड देय, अउ अपन क्रूस उठाय के मोर पाछू हुइ जा। 25 जउन कउ अपन जीव बचामै चाहथै, ऊ उके खोही, पय जउन कउ मोर निता अपन जीवन खोही, उहै उके पाही। 26 अगर कउ अपन जीवन दइके सगलू दुनिया के पाय जही, ता उके काहिन फायदा? अपन जीवन के फेरै लग पामै के निता, कउ भला काहिन दइ सकथै? 27 काखे मनसे कर टोरवा अपन स्वरगदूतन के संग अपन बाफ के महिमा हे जलदी आमै बाले हबै, अउ ऊ अक-अक्ठी मनसेन के उनखर करम के जसना मेर सजा देही। 28 मै तुम्हर लग सही कथो, इछो कुछ असना मनसे ठाड हबै, तब तक नेहको मरही, जब तक उन मनसे कर टोरवा के ओखर राज हे आउत नेहको देख लेही।"