1 उहै टेम हेरोदेस जउन देस के अक्ठी गलील के सासन हेरोदेस के राजा रथै, यीसु के बारे हे सुनथै। 2 ऊ अपन सेबकन लग कथै, हइ बतिस्मा देय बाले यूहन्ना हबै मरे हर मसे जिन्दा हुइ गय, इहै कारन हबै कि चकित के काम करै के सक्ति एहमा मउजूद हबै।

3 हेरोदेस अपन भाई फिलिप्पुस के डउकी हेरोदियास के कारन यूहन्ना के गिरिपतार करिस, अउ उनके बांध के जेल हे बेडवा दइस। 4 काखे यूहन्ना ओखर लग कहे रथै, "भाई के डउकी के रखैके तोर निता उचित नेहको हबै।" 5 हेरोदेस यूहन्ना के मार डालै चाहथै, पय ऊ मनसेन लग डरथै, काखे मनसे यूहन्ना के ग्यानी मनसे मानथै।

6 हेरोदेस के जनमदिन के मउका हे, हेरोदियास के टोरिया पहुनन के आगू नाचके हेरोदेस के बोहत मगन करिस 7 कि ऊ किरिया खाय के, ऊ "जउन कुछु चाहबे उके देयका जुबान दइस।"

8 ओखर दाय उके पहिलेन लग सिखाय दय रथै, इहैनिता ऊ बोलिस, "मोके इहै टेम टठिया हे यूहन्ना बतिस्मा देय बाले के मूड चाही।"

9 हेरोदेस राजा के बोहत दुख हुइस, पय अपन किरिया अउ पहुनन के कारन ऊ ओखर मांग पूर करै के आदेस देथै, यूहन्ना के मूड इके दइ देया। 10 अउ हेरोदेस राजा अपन सुपाहिन के जेल हे पठोय के यूहन्ना के मूड कटवाय दइस। 11 यूहन्ना के मुन्डी टठिया हे लाय गइस अउ टोरिया के दइ दे गइस, अउ ऊ उके अपन दाय के लिघ्घो लइ गइस। 12 यूहन्ना के चेला आइन अउ उन ओखर लोथ लइ गय, उन उके मरघटी हे रखथै अउ जायके यीसु के एखर खबर दइन।

13 यीसु हइ खबर सुनके उहां लग नाह जिहाज हे चढके, अक्ठी पटउरा के पल्ला सूनसान हे कढ गइस, जब मनसेन के एखर पता चलिस, तब उन सहरन लग निकर के पइदल ओखर पाछू चल दइन। 14 जब यीसु नाह जिहाज लग बाहिर निकडके टाठा हे आथै, ता ऊ बोहत मनसे के भीड देखथै, ता उके उनखर हे दया आथै अउ ऊ उनखर नंगहन के निक्खा करथै।

15 संझा होय लग चेला ओखर लिघ्घो आयके कथै, परभु हइ सूनसान जिघा हबै अउ बोहत देरी हुइ गय हबै, इहैनिता भीड के जाय दे, ता गांव हे जायके अपन खाय के निता कुछु खरीद लइ आमै।

16 यीसु जबाब दइस "इनही कहुं जाय के जरूरत नेहको हबै, तुमै करा इनखर निता खाय के जुगाड।"

17 चेला ओखर लग कथै, "हमर लिघ्घो पांचठे रोटी अउ दुइठे मछडी के छांड अउ कुछु नेहको हबै।"

18 यीसु कथै, "उनके मोर लिघ्घो लइ आन।" 19 यीसु मनसेन के चारा हे बइठै के आदेस दइस, तब ऊ पांच रोटी अउ दुइठे मछडी अपन हाथ हे लइके, स्वरग के पल्ला खाना के निता धन्यबाद देय के बाद, रोटी टोर-टोर के चेलन के दइस अउ चेला मनसेन के। 20 सगलू मनसेन पेट भर खथै, अउ एखर अलाबा बचे हर रोटी के खन्डन के चेला बाराठे छन्नी उठाथै। 21 भोजन करै बाले मसे डउकी अउ लरकन के छांड के करीबन पांच हजार डउका रथै।

22 एखर तुरन्त बाद यीसु अपन चेलन के नाह जिहाज हे चढाइस, कि उन नाह जिहाज हे चढके उनखर लग आगू झील के ऊ पार कढ जाय, जब तक ऊ मनसेन के बिदा कर सकै। 23 यीसु मनसेन के बिदा करै के बाद, भगवान बाफ लग बिनती करै के डोंगर छो कढ गइस, अउ संझा होय लग ऊ उछो अकेल्ले रथै। 24 नाह जिहाज ऊ टेम झील के टाठा लग झील के बीचोबीच हे जाय चुकथै, ऊ लेहरा लग नाह जिहाज डोलथै, काखे हबा आगू लग चलथै।

25 सुब्बेन लगभग तीन अउ छय बजे के टेम के बीच, यीसु झील हे चलत उनखर लिघ्घो आइस। 26 ओखर चेला जब यीसु के झील हे चलत देखथै, ता उन चकराय के अपने हे गुठेमै लगथै, हइ तो कउनो भुतवा हबै, अउ उन डर के मरे किरराय उठिन।

27 यीसु उनखर लग हरबी कथै, हिम्मत धरा, मै यहों, झइ डर।

28 पतरस ओखर लग कथै, परभु अगर तहिन हबस ता मोके आदेस दे, कि मै पानी हे रेंगत तोर लिघ्घो आय जांव।

29 यीसु कथै, "आ जा।" पतरस नाह जिहाज लग उतरथै, अउ पानी हे रेंगत यीसु के पल्ला बढिस। 30 ऊ जब तेज हबा देखथै, ता ऊ डर गइस, जब ऊ बुडै लगिस ता किरराय के कथै, "हे परभु मोके बचा।"

31 यीसु हरबी हाथ बढाय के उके पकड लेथै अउ कथै, "हे चुटु बिस्वास करे बाले, तै संका काखे करथस।"

32 तब उन दुनो नाह जिहाज हे चढ जथै अउ हवा रुक गइस। 33 जउन चेला नाह जिहाज हे रथै, उन यीसु के परनाम करथै अउ कथै, "तै सही हे भगवान कर टोरवा हबस।"

34 दहार पार करके उन गन्नेसरत गांव के भुंइ हे आइन। 35 उहां के मनसे यीसु के चीन लइन अउ अगल बगल के सगलू गांव हे खबर फइलाय दइन, अउ सबमेर के नंगहन के यीसु के लिघ्घो लानथै। 36 अउ ओखर लग बिनती करै लग जथै, कि ऊ उनके अपन खुरथा पइजामा के छोर के छियदे अउ जेतका झन छीथै, अउ सगलू मेर के नंगहा लग निक्खा हुइ गइन।