Mateus 2

दिन उगती लग ग्यानी मनसे आथै

1 यीसु के जनम यहूदिया परदेस बैतलहम सहर हे हुइस, ऊ टेम हेरोदेस राजा रथै, यीसु कर जनम के बाद वैदी*2:1 हाथ देखै बाले मनसे पूरब देस लग यरुसलेम सहर छो आय रथै। 2 यहूदिन के राजा जेखर पइदा होय हबै ऊ कछो हबै? काखे हम दिन उगती छो ओखर तरइया देखे हबन, अउ ओहि हम निहुर के परनाम करै आय हबन।

3 जब हेरोदेस राजा हइ बात सुनथै, ता ऊ बोहत घबडा जथै, अउ यरुसलेम कर मनसेन चिन्ता हे पड जथै। 4 तब राजा यहूदी समाज के खास पुजारी अउ गुरुन के अकजुट करके पूछथै, मसीह कर पइदा कछो हुइ सकथै?

5 उन मनसे राजा लग कथै, "यहूदिया कर बैतलहम हे काखे ग्यानी मनसे कर किताब हे ओसनेन लिखररे गय हबै।"

6 हे बैतलहम, जउन यहूदा के परदेस हे हबै,

तुम कउनो मेर लग यहूदा के अधिकारी सहर मसे नान नेहको हवस,

काखे तुम्हर लग अक्ठी राजा निकडही,

जउन मोर मनसे इस्राएल कर बरेदी होही।

7 तब हेरोदेस ज्योतिसिन के चुपके लग बुलवाय के पूछथै, तरइया ठीक कउन टेम दिखाई दय रहिस? 8 राजा ज्योतिसिन लग हइ कहिके बैतलहम पठोथै, "कि जायके ऊ लरका कर बारे हे ठीक-ठीक पता लगामै, जब मिल जही ता मोके गुठेइहा, ता महुं ओखर परनाम करहुं।"

9 उन राजा कर बात के सुनके उछो लग कढ जथै, अउ जउन तरइया दिन उगती छो देखे रथै, ऊ उनखर आगू-आगू चलै लागथै, अउ जउन जिघा हे लरका रथै, ऊ जिघा के उप्पर जाय के रुक गइस। 10 उन तरइया के देखके बोहत मगन होथै। 11 उन घर के भित्तर जाय के बाद हे, वैदी यीसु के ओखर दाय मरियम के संग देखथै, उन मुंह के बल गिरके ओही निहुर के परनाम करथै, अउ अपन-अपन थइली खोलके उके सोना अउ लोबान अउ गन्धरस के बलि चढाथै।

12 तब उनही सपना हे भगवान वैदिन के चेतन्त कर देथै, कि हेरोदेस के लिघ्घो लउट के झइ जइहा, ता उन दूसर गली लग अपन देस छो कढ जथै।