यीसु पंडित अउ फरीसी कर बारे हे चेतन्त करथै
1 ऊ टेम यीसु अपन चेलन लग अउ मनसेन के भीड लग कथै, 2 गुरू कर हक मतलब गुठेमै बाले, अउ फरीसी मूसा कर राजगद्दी हे बइठे हबै। 3 इहैनिता उन तुम्हर लग जउन कुछु कइहिन उहै करिहा अउ मनिहा, पय उनखर लग कउनो काम झइ करइहा, अउ न उनखर जसना काम करिहा, काखे उन कथै पय नेहको करथै। 4 उन मनसेन के खान्दा हे एतका गरू लाद देथै, कि उन उके उठाय के रेंगों नेहको सकै, अउ मनसेन हे दबाव दिखाथै कि उन उके लइके रेंगै। पय उन खुद उनखर मसे कउनो मेर के अंगठी तक नेहको डोलामै चाहथै। 5 उन निक्खा काम इहैनिता करथै, कि मनसे उनही देखै, सहीमा ऊ अपन तबीज के चउडा अउ अपन खुरथा पइजामा के झालर के जसना लम्बा बनाथै, ताकि मनसे उनही धरमी मनसे समझै। 6 उन तेउहार हे सब लग ऊंच जिघा पामै के चाहथै, अउ मंडली हे खास राजगद्दी चाहथै। 7 बजार हे बडा इज्जत के संग नमस्ते करामै के चाहथै, अउ चाहथै कि मनसे उनही गुरू कहिके बुलामै।