Mateus 26

यीसु के बिरोध साजिस

1 हइ सगलू बातन के कहे के बाद यीसु अपन चेलन लग कथै, 2 "तुम जानथा कि दुइ रोज के बाद फसह के तेउहार हबै, अउ मनसे कर टोरवा बैरिन के दवारा क्रूस हे टंगाय के निता पकडामै बाले हबै।"

3 तब खास पुजारी अउ सियान यहूदी नेता कैफा नाम के खास पुजारी के अंगना हे अक जिघा जुडिन। 4 अउ अपनै हे सोच बिचार करथै, कि यीसु के चुपके लग उके पकडवाय के मरवा डारी। 5 पय उन कथै, "हमके हइ तेउहार के टेम हे नेहको करै के चाही, कहुं असना झइ होय कि मनसे भगदड करै।"

यीसु के अभिसेक

6 जब यीसु बैतनिय्याह हे समोन कोढी के घर छो रथै। 7 ता एतका हे अक्ठी डउकी संगमरमर के खोरिया हे मंहगी महकनी तेल लइके यीसु के लिघ्घो आथै, जब ऊ भात खाय के निता बइठे रथै, ता ओखर मूड हे कुढाय देथै। 8 हइ देखके चेला गुस्साय जथै अउ कहै लग जथै, "हइ महकनी तेल के काखे बरबाद करे गइस? 9 एही निक्खा दाम हे बेच सकत रहन, अउ फेर ऊ पइसा के गरीबन हे बाट देतन।"

10 यीसु हइ बात सुनके अपन चेलन के कथै, "हइ डउकी के काखे तंग करथा? ऊ मोर निता निक्खा काम करै हबै। 11 गरीब मनसे तुम्हर संग हरमेसा रइहिन, पय मै तुम्हर संग हरमेसा नेहको रइहों। 12 ऊ डउकी मोर देह हे जउन महकनी तेल के कुढाय हबै, ऊ मोर देह के गाडे जाय के निता करे हबै। 13 मै तुम्हर लग सही कथो, कि सगलू दुनिया हे जछो-जछो हइ मोर संदेस के परचार करे जही, उछो-उछो एखर काम के सुनाय जही अउ ओही सुरता करे जही।"

यहूदा यीसु के पकडवामै के निता राजी होथै

14 जब यहूदा इस्करियोती जउन बारहठे चेलन मसे अक्ठी रथै, जउन पुजारी के लिघ्घो जायके कथै। 15 अगर मै यीसु के तुम्हर हाथ हे पकडवाय देहुं, ता मोके काहिन दइहा? उन ओही तीसठे चांदी के खोटन्ना गिन के दइ देथै। 16 अउ यहूदा उहै टेम लग यीसु के पकडोमै के मउका ढूंढै लग जथै।

यीसु चेलन के संग तेउहार हे रोटी खथै

17 बेगैर खमीर रोटी के तेउहार के पहिले रोज चेला यीसु के लिघ्घो आयके पूछथै, "तै कछो चाहथस कि हम तोर निता खास तेउहार हे खाय के निता तइयारी करी?" 18 यीसु कथै, "सहर हे अमुक मनसे के लिघ्घो जाय के उके कहबे, कि गुरू कहे हबै मोर टेम लिघ्घो हबै, मै तोर घर हे अपन चेलन के संग तेउहार मनामै बाले हव।"

19 यीसु जसना आदेस दय रथै, चेला ओसनेन करथै अउ तेउहार के तइयारी करिन।

20 जब सांझ हुइ जथै, ता यीसु अपन बारहठे चेलन के संग भात खाय के निता बइठथै। 21 जब उन भात खथै ता यीसु उनखर लग कथै, "मै तुम्हर लग सही कथो कि तुम मसे अकझन मोके पकडोही।"

22 हइ बात सुनके चेला बोहत मुरझाय जथै अउ सगलू चेला ओखर लग पूछै लग जथै, "हे परभु, का ऊ मै तो नेहको हबो?" 23 यीसु जबाब देथै, "जउन मोर संग टठिया हे हाथ डार के खथै, उहै मोके पकडोही। 24 मनसे कर टोरवा के बारे हे जसना किताब हे लिखवरे हबै, पय ऊ मनसे के लानत हबै, जउन मनसे के दवारा मनसे कर टोरवा पकडोय जही, ऊ मनसे के निता केतका निक्खा होतिस कि ऊ पइदा झइ होतिस।"

25 तब पकडोमै बाले यहूदा कथै, "हे गुरू मै जरूर उहै यहों तब ऊ ओखर लग कथै," "तै सही कथस।"

परभु भोज

26 जब उन भात खात रथै, ता यीसु रोटी लेथै अउ आसीस मांग के टोरथै, अउ चेलन के दइके कथै, "लेया, खा हइ मोर देह हबै।"

27 फेर ऊ खोरिया लइके भगवान के धन्यबाद करथै, अउ उनही दइके कथै, "तुम सबझन इके पिया, 28 काखे हइ टीमा के मोर खून हबै, जउन बोहत मनसेन के निता उनखर पाप के छमा करै के निता बहोय जही।