Layog è iy jishii Masi rog ò rai arone isieng rai
1 Gethek nyie yao, chiihphado? Hamangkhung-aphuii ro bushun ne bajo rey yi pha gethek ne layog shii rai habey? 2 Khuchung magunde asi, gethek ne layog shii iyjong—chiihphado khi-èrek ne sieng ne rai mua phlei? 3 Nathek ne thiegjong, gethek ne Isu Masi rog shii ò rai pha khowo yi shii, ji è gethek ne ai è iy pha rog shii ò rai pha khowo yijong ro. 4 Gethek ro khowo ji re-è, chiihphado, gethek de ai è iy pha ji thang ne ai rog shii wieng muii, Aphuii ro blu biisiie ji è Masi ne iy biisa è dinne hòi pha duiine, ji è gethek de iwo chai shii sieng.
5 Ji pha iidoh è ai mirek duiine gethek de ai rog ò jia shii iy, ji duiine gethek de ai mirek duiine ai rog shii chai hòi din. 6 Chiih-è gethek ne thieg layog pha blu shii awailum ne mua yi pha, gethek ro ihèg chai ne iy pha rog shii awai ro bai shii ruii, ji è gethek ne dinne bajo layog ro khiao arai sha phro. 7 Bran iy mage shii, ai ne layog pha blu è ichad rek phi. 8 Gethek Masi rog shii nya iy dang ne, gethek de ai rog shii sieng phrone gethek è migi rek. 9 Gethek ne thieg Masi iy ne hòi din chiih-è khuchung de a-iy sha phro—Iy pha ji è ai lakhung shii boh akhoh sha phro. 10 Chiih-è ji è, nyieliieshii ai iy dun, layog ne ai lakhung shii blu oi sha ro; chiih-è thuh ai ne ò shii chai sieng ne rai pha ji ne Hamangkhung-aphuii chiang rai ro.