1 Mbe nyi zhu ri me Bulus riwa wa tren wen ri tra tren ritu me bla tre Kristo, ga vayi mbu Timoti, hi ri kpan mbu Filimon nga kpan ndu mbu, 2 nga Afiya vayi mbu vruwa, nga vayi mbu riwa a ran ti ka nji ri klukpa mbu riwa nde wan a he Akibus nga wa hu Izhi wawa wa si kabrutu ri ko wen: 3 No A ti mbu Izhi nga Bachi Yeso Kristo no yi dindi ti nga sii sron.

4 A wu vayi won Filimon, me sondu ngɨri ri Izhi meri taka wen rimi bre Izhi won, 5 ritu me wo bibi yosron wen ri Bachi Yeso nga bibi nyɨme wen riwa wu he ri wu ri wa hu Izhi. 6 Me bre Izhi no kabrutu mbu iwayi ka wa hu Izhi ri ngɨzhi to ri tilɨbu riwa ki he ri wu ri son mbu ri kabrutu mbu ri Kristo. 7 A wu vayi won, inyɨme wen no wen kinklan sron nga ran no wen senkpa! Wu no wa hu Izhi senkpa wawu.

8 Ritu ngayin me fe gbengbren bran, ka vayi wen rimi Kristo me fe gbengbren ri la wu kya riwa a he riwa wu ti. 9 Ama ritu nyɨme mbu, me bre wu nye, me ran ri vu no ti wu ran. A he ame Bulus riwa me kunchon nga riwa wa tren wen ri tra tren ritu Yeso Kristo. 10 Me bre ritu Onisimas riwa a he ka ivren won rimi Kristo riwa me he ri tra tren, 11 Ri sen a ran he kya ri wu ran, ama zizan a he kya ri wu nga ri mo ngawen. 12 Me bru ti wu ndu ri ye ri wu riwa wawu he ka isron won riri. 13 Me wa meri ka-u dzi ri ngawon ri nyi riwa me he ri tra tren, ritu la tre Kristo, nga ran dzon wen ti ndu ri nyu wen. 14 Ama me ran wa me ri ti kya riwa a ran he ri to wen ran, Me wa no dzon ritu wu wa wu ri dzon a ran ritu wa vuu no dzon ran. 15 A zhu ka Onisimas a kado ri vi hari ritu riwa ari bru ye ri wu ri wawu nye. 16 Onisimas ran he gran ri wu ka kre ran. A han gran, a he vayi, a zizan ri mo. Zizan ari he kya ri wu, ari he ka gran nga ka vayi rimi Bachi. 17 Ritu ngamba, ka wu ban wen ri me he kpan ndu wen, wu ka kpa Onisimas zhu bibi riwa wu kpa wen. 18 Ka a ti kya meme ri wu, ko wu hu kyari wu ka bla yo ri tu won. 19 Ame Bulus nye me nghan mbe nyi ri wo won. Me han kya riwa wu hu, Ama ra kpawulusu ri me hu kya ngawen ran. 20 Ritu ngamba vayi won, me bre wu ti ndindi ti nyi ri mo ritu Bachi; Sii wen sron rimi Kristo. 21 Me nyɨme ri wu ri wu hu tre won, ritu wan nye me nghan mbe nyi ri no wu ri to ri wu ti han kya riwa me tre ri no ti. 22 Me bre wu, ka tra tsren dzi ri mo, ritu me yo sron ri Izhi ri wo bre mbi ran no wen me kɨma bru ye ri yi a ran ban vi bran ran.

23 Abafaras riwa a he ri me ri tra tren rinyi ritu Yeso Kristo a ri chi wu, 24 ri Markus, Aristakus, Dimas, nga Luka wawa wa he wa kpan ndu won nye wa chi wu ngawen. 25 No ndindi ti Bachi Yeso Kristo no he ri yi wawu mbi.