1 Nɔ bɛ haʼ nɔ ghɔ, bəke, b̈ii ké ŋwɔŋtə-ii tʉ bələŋ-bii mbɔ kaʼ bɔ̂ŋ gòʼ təmə kə́ tʉ́ʼ mbʉ kəŋgieNyii fɛ, nuʼ-yii chìi bɔ̂ŋ bɛ́ŋ Klai, kaʼ bii buŋ gòʼ təmə kə́ gìegìe tʉ bɔŋ fɛ, 2 bʉʼka bɔ̂ŋ bu nyíɛ nuʼ tʉ́ʉnə-yii ghɔŋbə kuŋhə ndə bii tʉʼ kɔ́ tʉ Nyii.

3 Kə bii mə shʉ̀tə ŋwɔŋtə-ii bə ndə məbʉ̀ʉ haʼ njəŋmbi, ndə mə-kə́-shʉ̀tə tʉkə-i daa byuunɔ nə ghʉəʼ-kwii-chuɔŋ-chyʉʉchyʉʉ-bə byuunɔ mbʉətə ndyihə fɛ. 4 Bɔŋ məbʉ̀ʉ yii nɔ kie ndə məgwè bə mu mbʉə-bii ndə bɛ məbʉ̀ʉ ndə shʉ-i mə nə kwùhə fɛ ndə ĩ gwè hə ndə mbuɔnəbə ghɔŋbə fyii yùtə ndə i chyʉ́ʉ shʉ-Nyii daa. 5 Bʉʼka nɔ bɛ ntɛ nɔ ndə bəke ndə bɔ̂ŋ kə bɛ ŋkʉʉ vɛʼ bəshʉ, ndə bɔ̂ŋ kə yʉ́əʼnə ndəŋ Nyii, nə kə́ shʉ̀tə ŋwɔŋtə-ʉə ndə məbʉ̀ʉ, kə́ bɛ məké ŋwɔŋtə-ʉə tʉ bələŋ-bʉə, 6 haʼ ndə Sala kə yʉ́ chu Ablahaŋ kə́ tíi ɔ nə tiekətʉ-e. Kaʼ bii kə́ fɔ̀ʼ bʉʉ təmə kə́ fàa nubɛʼkə fɛ, i dʉ̀ʼ mbɔ bii nɔ bɛ vâa-Sala.

7 Nɔ bɛ haʼ nɔ ghɔ, bələŋ, bii kie ndə mədùʼ biibə bəke-bii nə ndaa bʉʼka mbɔ bɔ̂ŋ nɔ lʉ́ʉtə chàa bii. B̈ii kɔ́ kuŋhə tʉ bɔŋ, bʉʼka bii bɔŋ bu yi kie kɔ-Nyii-kə mɔ̀ʼ ndə ĩ gwè nə məchímbi. B̈ii fɔ̀ʼ yɔ̄ŋ-yə mbɔ məghaaNyii-yii mə byùutə fɛ.

8 Ndə məlìʼ, b̈ii bənchəŋ nɔ kie ndə məkie ntɛ ŋkwɔʼtə imɔʼ, kie tʉvyiikə, kie ŋkʉ̂ʉ tʉ ŋwɔŋtə-ii ndə bəliŋ, kie buuŋjyu bɔŋleʼ lʉ̀ ŋwɔŋ-yii sê tʉ bəbɛʼbʉə. 9 Kə bii mə kə́ tyú bʉ̂ʼʉ nə bʉ̂ʼʉ fɛ byuunɔ byʉ̀hə nchɛŋ nə nchɛŋ fɛ, bii bɔŋ kie ndə mətúu bə biʼbə kɔ́ tʉ bɔŋ, bʉʼka Nyii nɔ kə kɔ̀ʼnə bə ndə məkɔ́ biʼbə tʉ bii ndʉʉ ndə ɔ kə tíi bii. 10 Bʉʼka ŋwɔʼnə-Nyii nɔ ghɔ̀ŋ mbɔ,

"Wo ndə ɔ kʉ̀ʉ məchímbi jyujyu ghɔŋbə mənyíɛ chî-jyujyu-bə,

ɔ nɔ kie ndə məyá chu-i ndə kwə́ʼ bʉəbʉə,

bɔŋleʼ bɔ́nə wuochubə-i ndə mə-kə́-chʉ̀ə lɛɛŋkə.

11 Ɔ̈ shìe liɛŋ-ɛŋ ndəŋ bʉ̂ʼʉ kə́ fɔ̀ʼ nu-jyujyu-bə.

Ɔ̈ kʉ́ʉ fyiighʉ́ənə bɔŋ kə́ kɔ̀ɔtə ndə məkie.

12 Bʉʼka Tiekətʉ nɔ tʉ́ʼ shʉ-i ndəŋ bʉə ndə bɔ̂ŋ bɛ ndyʉndyʉ,

bɔŋleʼ ŋɔ́ʼhə tyunəbə-i ndə məyʉ́ gwia-yʉə.

Bɔŋ T̃iekətʉ nɔ shìe liɛŋ-ɛŋ tʉ bʉə ndə bɔ̂ŋ tʉʼ chìi bʉ̂ʼʉ."*

13 Nduɔ, bɛ nda ndə bəkɔ ɔ lə́ŋhə bii, kaʼ bii kie fyii ndə mə-kə́-fɔ̀ʼ bʉʉ? 14 Bɔŋ kaʼ buŋ bɛ mbɔ bii kie ndə mənyíɛ ŋgʉəʼ bʉʼka mətə́nə ndyʉndyʉ, bii bu kie biʼbə. Kə bii mə kə́ fàa wobɛʼ təmiyɔŋ, byuunɔ i kə́ chɔ́ŋhə bii fɛ. 15 Bɔŋ bii nɔ kie ndə məkóʼhə Klai ghɔʼ ndə Tiekətʉ mu fyiihə-ii. Kaʼ wo bíʼtə luu tʉ bii ndə bii yʉ́əʼnə ndəŋ Klai, b̈ii shʉ̀tə ŋwɔŋ-yii ndə məfʉ̀ʼtə tʉ ɔŋ. 16 B̈ii bɔŋ bə̀ŋhə nə mbuɔnəbə leʼnə faakə bɔŋleʼ kie ŋkwɔʼtə tʉ́ʉnə, mbɔ ndʉʉ ndə bə tʉʼ bʉ́əhə yie-yii, bʉə ndə bɔ̂ŋ tʉʼ bʉ́əhə nuʼ jyujyu-yii bʉʼka mbɔ bii tʉʼ gɛ̀ hə bɔ̌ŋ Klai, yi kie tʉvyiikə. 17 I nɔ bʉ̀ʉ ndə mənyíɛ ŋgʉəʼ bʉʼka bii tʉʼ fɔ̀ʼ bʉʉ, kaʼ bɛ ŋkʉʉnə-tʉʉ-Nyii, tə chàa mbɔ b̈ii nyíɛ ŋgʉəʼ bʉʼka mbɔ bii fɔ̀ʼ bʉ̂ʼʉ.

18 Bʉʼka Klai ghɔ nɔ kə nyíɛ ŋgʉəʼ vɛʼ mɔʼ tə mbi nə lìʼ bʉʼka bʉ̂ʼtə, wo ndə ɔ bɛ ndyʉndyʉ nyíɛ ŋgʉəʼ bʉʼka bʉə ndə bɔ̂ŋ gòʼ təmə bɛ ndyʉndyʉ fɛ, mbɔ ɔ chʉʼ gwè nə bʉʼʉ tʉ Nyii. Bə nɔ kə yí ɔ ndəŋ mbɔʼ-mbʉə, ɔ bɔŋ bʉ̀nə bɛ ŋɛnə ndəŋ lyʉʉhəkə-i. 19 Nə lyʉʉhəkə-i ndə i bɛ ŋɛnə, ɔ gɛ̀ lɔ̀ʼ ntəŋjyujyu tʉ lyʉʉhəbə ndə bɔ̂ŋ kə bɛ mu njaa-chaŋ. 20 Bɔ̂ŋ kə yʉ́ chu-Nyii fɛ, ndʉʉ ndə Nyii kə yá fyii ndə chî-Nua-bə fɛ, chîbə ndə Nua kə́ bɔŋ buukwɛʼtəŋkə-i. Nɔ kə bɛ haʼ bʉə fɔ̂ŋ ndə Nyii nə kwáa bɔŋ tíŋ hə ndəŋ fɔŋ muu-ghɔ̄. 21 Fɔŋ muu-ghɔ̄ nɔ nə bɛ ndə məfì muu ndə i tʉʼ kwáa bii nduɔ. Mbʉ məfì muu kaa mə sʉ̀ bɛbə mbʉə mbɔ itʉ́ʉnə fɛ. Bɔŋ i nɔ bɛ ndə məfʉ̀ʉtə Nyii ndə məkɔ́ bii nə fyii-tʉʉnə-hə,* bʉʼka bə nɔ kə bʉ̀nə kóʼhə Jiso Klai ndəŋ kwú. 22 Ɔ nɔʼ gɛ̀ yuo, kə́ bɛ kwiiləŋ Nyii nduɔ, kə́ gìe kətʉ bʉəntəŋNyii, bəntəŋbəshʉ yuo leʼnə ghʉəʼbə.