1 Bʉʼka Klai kə nyíɛ ŋgʉəʼ nə mbʉə-e, b̈ii shʉ̀tə ŋwɔŋ-yii haʼ nə ntɛ ŋkwɔʼtə-maa-ɔ̄ŋ ndə ɔ kə kie nɔ, bʉʼka wo ndə ɔ nɔʼ nyíɛ ŋgʉəʼ nə mbʉə-e, nɔʼ mìnə ghɔŋ bʉ̂ʼʉ. 2 Lʉ̀ hə nduɔ gɛ̀ nə shʉbə, bii nɔ kie ndə mə-kə́-chí mbi bə ndə ntɛ ndə Nyii kʉ̀ʉ, kaa ndə ntɛ fia-bʉəbʉə-tə ndə woməsʉʉ kʉ̀ʉ fɛ. 3 Bii nɔʼ kə lʉ̀ ŋgwɔʼmbi bəshʉ i kʉ̀ʼnə ndə məchìi nubə ndə bʉə ndə bɔ̂ŋ gòʼ təmə bɛ́ŋ Nyii fɛ kʉ̀ʉ ndə məfɔ̀ʼ. Məchimbi-yii nɔ kə bɛ ilə́ŋnə nə nu-nyàatəŋwɔŋ-bə, bii kə́ kie ntɔmə ndə nu-bʉəbʉə-bə, məbúu ndʉʼmə, mətʉ́ʼ kie-bəsəŋ-tə, məgɛ̀ mu njaa-məndʉʼ-hə, məgháa bənyii ndə nuʼ-Nyii bɛ́ŋ fɛ.

4 Nduɔ, i nɔ tʉʼ chàa bʉə ndə bɔ̂ŋ gòʼ təmə nɔʼ bɛ́ŋ Nyii fɛ ndə ndʉʉ ndə bɔ̂ŋ nyíɛ təmə bii fúu nuɔ bii bɔŋ ndə məbʉ́əhə ŋwɔŋ-yii yɔ́ŋyɔ́ŋ fɛ, ndʉʉmɛ bɔ̂ŋ kə́ chɛ̀ŋtə bii. 5 Bɔ̂ŋ bɔŋ bu yi túu chu-yʉə tʉ ɔŋ ndə ɔ nɔʼ shʉ̀tə ŋwɔŋ-ɛŋ ndə məkwɛ̀ ŋkwɛ bʉə ndə bɔ̂ŋ bíe ŋɛnə ghɔŋbə bʉə ndə bɔ̂ŋ nɔʼ kwútə. 6 Nɔ bɛ luu nɔ ndə bə kə lɔ̀ʼ ntəŋjyujyu ghɔ tʉ bʉə ndə bɔ̂ŋ nɔʼ kə kwútə, mbɔ buŋ ndə Nyii kə kwɛ̀ sɔ́ʼ-yʉə, bɔ̂ŋ bɔŋleʼ kə kwútə nə mbʉəhə-ʉə haʼ ndə bʉə bənchəŋ kwútə nɔ, bəkɔ bɔ̂ŋ bɛ ŋɛnə mu lyʉʉhəkə haʼ ndə Nyii bɛ ŋɛnə.

7 Ndʉʉ ndə nubə bu lìʼ chɔ inchəŋ nɔʼ kə́ŋhə, nɔ, b̈ii tʉ́ʼ ndaahə-ii isúunə bɔŋleʼ kə́ yá ŋwɔŋ-yii mbɔ bii chʉʼ gháaNyii jyujyu. 8 Fɔŋ ɛŋ kə́ bɛ mbɔ bii nɔ kie ndə mə-kə́-kʉ̀ʉ ŋwɔŋtə-ii shʉ́əshʉ́ə, bʉʼka ŋ̃kʉʉ nɔ bɔ̀ŋtə bʉ̂ʼtə buŋmbi. 9 B̈ii kə́ dʉ̀ʼ buuŋjyu tʉ bʉə ndʉʉ ndə bɔ̂ŋ ŋíi mu njaa-bii təmə kə́ luŋtə fɛ. 10 Wotəmiyɔŋ ndə ɔ kie kɔkə kəghɔ-Nyii, ɔ̈ fɔ̀ʼ nə yɔŋ ndə məkwáa bəbɛʼbʉə, nə yʉʼ wo ndə ɔ tʉʼ lɛ́nə buŋmbi ntɛntɛ-buuŋjyu-hə ndə Nyii tʉʼ dʉ̀ʼ. 11 Ẅo ndə ɔ kie ndə məkwə́ʼ, kwə́ʼ fi nə tʉʼ kwə́ʼ Nyii nə mbəŋ-ɛŋ, ẅo ndə ɔ kie ndə məfɔ̀ʼ tʉ bəbɛʼbʉə, ɔ̈ fɔ̀ʼ nə ghʉəʼkə ndə Nyii kɔ́ tʉ ɔŋ, mbɔ ndə nubə nchəŋnchəŋ, Nyii chʉʼ kie məgʉ́ə tíŋ hə bɔ̌ŋ Jiso Klai, wo ndə məgʉ́ə ghɔŋbə ghʉəʼkə bɛ yi-yə təmə liʼ-i ghɔ fɛ. Ï bɛ haʼ nɔ.

12 Mbʉətə bətieŋkɔŋ-bɔŋ, kə i mə chàa bii ndə ntɛ ŋgʉəʼ shʉ́əshʉ́ə ndə i tʉʼ gwè tʉ bii ndə məmùutə bii, fi nə bɛ ŋkwɔnəntɔ kənu ndə i tʉʼ fyú tʉ bii fɛ. 13 Bɔŋ tʉʉ-yii nɔ kie ndə mə-kə́-bʉ̀ʉ ndə bii fúu nuɔ biibə Klai ndə mənyíɛ ŋgʉəʼ, mbɔ bii yi kie fɔŋ tʉʉjyu ndʉʉ ndə bə bu yi kɛ̀ʼ məgʉə-e.

14 T̈ʉʉ-yii bɛ jyujyu ndə bə tʉʼ chɛ̀ŋtə bii bʉʼka mbɔ bii tʉʼ gɛ̀ hə bɔ̌ŋ Klai, bʉʼka i nɔ dʉ̀ʼ mbɔ Lyʉʉhə-məgʉ́ə-kə, ndə bɛ LyʉʉhəNyiikə, nɔ bɛ mu mbʉə-bii. 15 Bɔŋ kaʼ wo mu b̈ii nyíɛ ŋgʉəʼ, kə i mə bɛ bʉʼka ɔ bɛ shùɔ wo fɛ byuunɔ bɛ lʉʼ fɛ byuunɔ bɛ wo-bʉ̂ʼʉ fɛ byuunɔ bɛ wo ndə ɔ kɔ́ ghɔkə-i ndə nu-wo-kədɔŋ-kə fɛ. 16 Kaʼ wo mu bii kə́ nyíɛ ŋgʉəʼ nə Kʉlʉtɛŋ, tʉkə-i mə vyíi fɛ, ɔ̈ bɔŋ kə́ kɔ́ bə məgʉ́ə tʉ Nyii mbɔ ɔ nɔ tʉʼ bɛ́ŋ yie-Klai. 17 Ndʉʉ nɔʼ kʉ̀ʼnə tʉ Nyii ndə məkwɛ̀ sɔ́ʼ kəwʉʉnəmbi, ɔ bɔŋ kie ndə məchʉ́ʉhə ndəŋ yi-yə bʉə. Kaʼ ɔ chʉ́ʉhə ndəŋ bʉʼʉ, i bu yi bɛ təka tʉ bʉə ndə bɔ̂ŋ gòʼ təmə bɛ́ŋ ntəŋjyujyu ndə i gwè hə kəghɔ-Nyii fɛ? 18 Ndə ŋwɔʼnə-Nyii ghɔ̀ŋ mbɔ,

"Kaʼ i shʉ́ə tʉ bʉə ndə bɔ̂ŋ bɛ ndyʉndyʉ ndə məkie ŋkwaa,

i bu yi bɛ təka tʉ bʉə ndə məchimbi-yʉə gòʼ təmə kə́ kɔ́ kuŋhə tʉ Nyii fɛ ghɔŋbə bʉə-bʉ̂ʼʉ?"*

19 Nɔ ndʉʉmɛ, bʉə ndə bɔ̂ŋ tʉʼ nyíɛ ŋgʉəʼ bʉʼka Nyii bɔŋleʼ kʉ̀ʉ mbɔ i bɛ nɔ, b̈ɔ̂ŋ kɔ́ fyiihə-ʉə tʉ Nyii mbɔŋ-yʉə ndə ɔ bɛ wo ndə ɔ kyinə kɔ̀ʼnə mɔ̀ʼ bɛ́ fɛ ndə bɔ̂ŋ tʉʼ fɔ̀ʼ nu-kʉ̀ʼnə-bə gɛ̀ nə shʉbə.