Nubə ndə i bu fyú Tiekətʉ buŋ bʉ̀nə gwè
1 Nduɔ, te məbʉ̀nə gwè Tiekətʉ-yʉʼʉ Jiso Klai ghɔŋbə məchəŋtə-yʉʼʉ kəyəŋ kəmɔʼ ndə məbɛ bʉʼʉ bɔŋ, baʼa nɔ tʉʼ fʉ̀ʉtə bii, bəliŋ-baʼa, mbɔ 2 kə bii mə kə chʉʼ yùhə ndə məkie mbyuutəmbyuutə mu kətʉ-bii byuunɔ kə́ lə̀ŋnə te wo ndə ɔ ghɔ̀ŋ mbɔ chî-Tiekətʉ-kə nɔʼ gwè fɛ. Kə a mə bɛ́ŋ kaʼ bɔ̂ŋ ghɔ̀ŋ mbɔ LyʉʉhəNyiikə nɔʼ dʉ̀ʼ nukə tʉ baʼa fɛ byuunɔ kaʼ bɔ̂ŋ ghɔ̀ŋ mbɔ baʼa nɔ kə téʼ ntəŋ, byuunɔ baʼa nɔ kə nyɔ̀ʼ mu ŋwɔʼnə. 3 Kə bii mə mɛ̀ʼtə wotəmiyɔŋ fə́ʼhə bii ndəŋ fia təmiyɔŋ fɛ. Chî-ghɔ̄-kə kʉʉ gwè təmə ndyiʼtə-kwɛ̀ŋhə-kə nɔʼ fyú sê, bə kɛ̀ʼ mbʉ wo bʉəbʉə ndə ɔ bu tɛ́ŋ nuʼ-Nyii, kə́ bɛ wo ndə ɔ kie ndə məkwú bɛ́. 4 Ɔ bu chʉ̀əʼhə chu bəfɔ inchəŋ ndə bə tʉʼ tíi nə bənyii byuunɔ fɔbə ndə bə tʉʼ lə̀ʼtə bɔŋleʼ kə́ kóʼhə ŋwɔŋ-ɛŋ ghɔʼ gìe kətʉ-bɔŋ bənchəŋ. Ɔ bu buŋ sʉ́ʉ mu njaafɛ̀ʼndɛŋNyii dùʼ chɔ, kə́ tíi ŋwɔŋ-ɛŋ nə Nyii. 5 Bii bieleʼ kwɛ́nə mbɔ mɔ nɔʼ kə shyíi bii nə nubə-ɔ̄ŋ inchəŋ vɛʼ ndə bʉʼʉ kə bɛ mɔʼɔ fe? 6 Bii bɔŋ kínə nukə ndə i tʉʼ yá yɔ̄ŋ-yə tʉ́ʼ, təmə i nɔʼ fyú sê nduɔ fɛ, mbɔ b̈ə yi kɛ̀ʼ mbʉ wo bʉəbʉə ndə ndʉʉ-i.
7 Bʉʼka nu-bʉəbʉə-bə-ɔ̄ŋ nɔ tʉʼ fɔ̀ʼ nduɔ mu bəliinə, bɔŋ nukə ndə i kie ndə məfyú kʉʉ yi fyú fɛ, tʉ wo ndə ɔ tʉʼ yá nubə-ɔ̄ŋ tʉ́ʼ b̈ə yi fyúhə ɔŋ fia. 8 Ndʉʉmɛ, bə kɛ̀ʼ mbʉ wo bə́ʼ nuʼ, ndə Jiso Tiekətʉ bu yí ɔ nə ŋgie-chu-kə-i, chìi ɔ bɛ njʉnjʉ nə məleʼnə ndə i bu gwè hə ndə məbáa-ɛ. 9 Mbʉ wo bə́ʼ nuʼ bu gwè kə́ fɔ̀ʼ nə Sata nə ghʉəʼkə inchəŋ, kə́ chìi nubəcheʼbə ghɔŋbə nuchíechubə ndə bɛ yi-mbii-yə. 10 Ɔ bu chìi ntɛ-buuŋbʉə-hə inchəŋ ndə məfə́ʼhə bʉə ndə bɔ̂ŋ bɛ ndə məkwú bɛ́. Bɔ̂ŋ bu kwú bɛ́ bʉʼka bɔ̂ŋ nɔ kə tɛ́ŋ ndə məkʉ̀ʉ mbʉ shʉəŋ bɔŋleʼ bɛ́ŋ ï kwáa bɔŋ. 11 Bʉʼka yɔ̄ŋ-yə, Nyii bu chìi mbɔ b̈ə kɛŋ fə́ʼhə bɔŋ, mbɔ bɔ̂ŋ chʉʼ bɛ́ŋ lɛɛŋbə-ɔ̄ŋ, 12 mbɔ bə chʉʼ chʉ̀ə ŋkwɛ-yʉə bənchəŋ bʉəbʉə bʉʼka mbɔ bɔ̂ŋ kə bɛ́ŋ shʉəŋ fɛ, bɔ̂ŋ bɔŋ nɔ nə kɔ́ fyiihə-ʉə bə ndə nubə ndə i gòʼ təmə bɛ ndyʉndyʉ fɛ.